កូរ៉េខាងជើង បាញ់មីស៊ីលពីរគ្រាប់ទៀត ក្រោយលោក គីម ផ្ញើសំបុត្រឲ្យលោក ត្រាំ

អន្តរជាតិ

កូរ៉េខាងជើង បាញ់មីស៊ីលពីរគ្រាប់ទៀត ក្រោយលោក គីម ផ្ញើសំបុត្រឲ្យលោក ត្រាំ

10, Aug 2019 , 10:44 am

រូបភាព

ប្រធានាធិបតីអាមេរិក ដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន នាជំនួបនៅតំបន់គ្មានយោធា។ រូបភាព AFP

ដោយ: តន ចាន់រិទ្ធារ៉ា

កូរ៉េខាងជើង នៅថ្ងៃព្រឹកថ្ងៃទី១០ ខែសីហា បានបាញ់មីស៊ីលចម្ងាយខ្លីចំនួនពីរគ្រាប់ទៀត។ នេះជាការបាញ់លើកទីប្រាំហើយក្នុងរយៈពេលពីរសប្ដាហ៍មកនេះ។ ការបាញ់លើកចុងក្រោយនេះ ទំនងជាការសម្ញែងកម្លាំងដាក់សមយុទ្ធរួមគ្នាអាមេរិក-កូរ៉េខាងត្បូងផង និងជាការសាកល្បងអាវុធផង។ អ្វីគួរឲ្យចាប់អារម្មណ៍នោះ ការបាញ់នេះ ធ្វើឡើងក្រោយមេដឹកនាំកូរ៉េខាងជើង គីម ជុងអ៊ុន ផ្ញើសំបុត្រឲ្យលោក ដូណាល់ ត្រាំ ។

ក្នុងរយៈពេលត្រឹមពីសប្ដាហ៍ កូរ៉េខាងជើង បាញ់មីស៊ីលដល់ទៅ៥ដង។ ការបាញ់លើកចុងក្រោយធ្វើឡើងថ្ងៃទី១០ ខែសីហាតែម្ដង។ ដូចបួនដងមុនដែរ មីស៊ីលចម្ងាយខ្លីចំនួនពីរគ្រាប់ ត្រូវបានបាញ់ចេញនៅព្រឹកព្រលឹម តែលើកនេះបាញ់ចេញពីឆ្នេរភាគខាងកើតក្នុងក្រុង Hamhung នៃខេត្ត Hamgyong ខាងត្បូង។ បើតាមយោធាកូរ៉េខាងត្បូង មីស៊ីលទាំងពីរ ហោះបានចម្ងាយប្រហែល៤០០គីឡូម៉ែត្រ មុនធ្លាក់ចូលសមុទ្រខាងកើត។

ការបាញ់នេះ ធ្វើឡើងស្របពេលដែលអាមេរិក និងកូរ៉េខាងត្បូងកំពុងធ្វើសមយុទ្ធរួមគ្នា។ នៅពេលសមយុទ្ធចាប់ផ្ដើម កូរ៉េខាងជើងក៏បានបាញ់មីស៊ីលពីរគ្រាប់ដើម្បីបង្អួតកម្លាំង និងជាសារព្រមានទៅកាន់កូរ៉េខាងត្បូងផងដែរ។ សម្រាប់ការបាញ់ចុងក្រោយនៅកូរ៉េខាងជើងនេះ វិមានប្រធានាធិបតីកូរ៉េខាងត្បូង ចាត់ទុកជាការបសម្ញែងអានុភាពយោធាជាថ្មីដាក់សមយុទ្ធនៅកូរ៉េខាងត្បូង និងជាសាកល្បងសមត្ថភាពអាវុធទើបអភិវឌ្ឍបានផង។

ខណៈស្ថានការណ៍នៅឧបទ្វីបហាក់ឡើងកម្ដៅបន្តិចម្ដងៗនោះ នៅអាមេរិកឯណោះ លោកប្រធានាធិបតី ដូណាល់ ត្រាំ និយាយថា លោក ទើបទទួលបានសំបុត្រមួយច្បាប់ពីមេដឹកនាំកូរ៉េខាងជើង គីម ជុងអ៊ុន តែមិនប្រាប់ថាអ្នកយកឲ្យលោកទេ។ ប្រាប់អ្នកសារព័ត៌មាននៅថ្ងៃទី៩ ខែសីហា លោក ត្រាំ បញ្ជាក់ថា សំបុត្របីទំព័ររបស់លោក គីម គឺល្អតាំងពីលើដល់ក្រោម និងមានលក្ខណៈវិជ្ជមាន។ លោកក៏ព្រលយទៀតថា មេដឹកនាំអាមេរិក និងកូរ៉េខាងជើង អាចនឹងជួបគ្នាឆាប់ៗទៀតផង។

តាមរយៈសំបុត្រដដែលនេះ ប្រមុខដឹកនាំវ័យក្មេងកូរ៉េខាងជើង ក៏បានបង្ហាញការមិនពេញចិត្តនឹងសមយុទ្ធរួមគ្នារវាងអាមេរិក និងកូរ៉េខាងត្បូងដែលកំពុងធ្វើ ហើយនេះជាមូលហេតុដែលកូរ៉េខាងជើងបាញ់មីស៊ីលជាបន្តបន្ទាប់បែបនេះ។ នេះបើតាមការបញ្ជាក់លោក ត្រាំ ។ ពាក់ព័ន្ធសមយុទ្ធនេះ លោក ត្រាំ ក៏បែរជានិយាយថា លោកក៏មិនពេញចិត្តដែរ ព្រោះលោកផ្ទាល់ក៏មិនចង់ចំណាយលុយលើល្បែងសង្គ្រាមបែបនេះដែរ។

ទោះជាបែបណា ការបាញ់មីស៊ីលផ្ទួនៗរបស់ក្រុងព្យុងយ៉ាង ធ្វើឲ្យលេចជាកង្វល់ពាក់ព័ន្ធការចរចានៅថ្ងៃខាងមុខ ខណៈមេដឹកនាំអាមេរិក និងកូរ៉េខាងជើងព្រមព្រៀងបន្តការចរចាទៅហើយនោះ។ ប៉ុន្តែសម្រាប់លោក ត្រាំ ការបាញ់មីស៊ីលចម្ងាយប៉ុណ្ណេះ មិនមែនជាបញ្ហារាំងស្ទះអ្វីទេ ព្រោះអ្វីដែលលោក គីម បានសន្យា គឺផ្អាកការបាញ់មីស៊ីលបាលីស្ទិកចម្ងាយឆ្ងាយឯណោះ។ ដូចនេះ បរិយាកាសចរចា នៅតែមានដដែល៕