អ្នកនាំពាក្យប៉ូលិស៖ ផែនការចាប់អ្នកប្រឆាំង យើងរៀបចំរួចហើយ

ជាតិ

នយោបាយជាតិ

អ្នកនាំពាក្យប៉ូលិស៖ ផែនការចាប់អ្នកប្រឆាំង យើងរៀបចំរួចហើយ

17, Aug 2019 , 11:59 am

រូបភាព

ដោយ: ថ្មីៗ

ឧត្តមសេនីយ៍ឯក ឆាយ គឹមខឿន អគ្គស្នងការរងនិងជាអ្នកនាំពាក្យអគ្គស្នងការដ្ឋាននគរបាលជាតិ អះអាងជាថ្មីថា ផែនការនៃការដាក់កម្លាំងប្រដាប់អាវុធទាំងខាងនគរបាល និង កងទ័ព រួមទាំងកម្លាំងផ្នែកអន្តោប្រវេសន៍ ដែលឈរជើងនៅតាមច្រកព្រំដែននានា ត្រូវបានរៀបចំរួចរាល់ហើយ ដើម្បីចាប់លោក សម រង្ស៊ី និងបក្សពួកគេ ប្រសិនបើពួកគេ វិលមកកម្ពុជាវិញ នៅថ្ងៃទី៩ ខែវិច្ឆិកា ឆ្នាំ២០១៩ ដូចការប្រកាសមែន។

ក្នុងកិច្ចសម្ភាសជាមួយសារព័ត៌មានថ្មីៗតាមទូរសព្ទ នៅព្រឹកថ្ងៃទី១៧ ខែសីហានេះ លោក ឆាយ គឹមខឿន លើកឡើងថា ការចាប់ក្រុមអ្នកប្រឆាំងនេះ គឺជាការអនុវត្តតាមដីការបស់តុលាការ។ ប៉ុន្តែ លោក បញ្ជាក់ថា អ្នកដែលគ្មានឈ្មោះក្នុងដីកា នឹងមិនត្រូវចាប់ខ្លួនឡើយ។

អ្នកនាំពាក្យនគរបាលរូបនេះ សង្កត់ធ្ងន់ដូច្នេះថា៖«ផែនការ គឺយើងមានហើយ សម្រាប់ពួកនេះ។ ឲ្យតែមក មកតាមណាក៏ដោយ តាមផ្លូវគោក ផ្លូវទឹក ឬផ្លូវអាកាស.....»។

នៅដើមខែកក្កដា ឆ្នាំ២០១៩នេះ នាយឧត្តមសេនីយ៍ នេត សាវឿន អគ្គស្នងការនគរបាលជាតិ និង នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានបើកកិច្ចប្រជុំរួមគ្នា ស្តីពីការត្រៀមកម្លាំង ដើម្បីចាប់អ្នកប្រឆាំង ពេលពួកគេធ្វើមាតុភូមិនិវត្ត។

លោក សុខ ឥសាន អ្នកនាំពាក្យគណបក្សប្រជាជនកម្ពុជា រង់ចាំមើលថា លោក សម រង្ស៊ី និង បក្សពួក ពិតជាហ៊ានមកកម្ពុជាមែនឬក៏អត់។ លោក សរសេរទៅកាន់អ្នកកាសែត ក្នុងបណ្តាញទំនាក់ទំនងតេឡេក្រាម នៅថ្ងៃទី១៧ ខែសីហានេះ ដូច្នេះថា៖«បើមកមែនគឺ មកជាប់ខ្នោះ បើមិនមកទេ គឺជាមនុស្សមហាកំសាក»។

លោក សម រង្ស៊ី មានជំនឿថា វត្តមានរបស់លោក នឹងធ្វើឲ្យកម្ពុជាមានការផ្លាស់ប្តូរ និងដំណោះស្រាយនយោបាយ ហើយក៏អាចទប់ស្កាត់ទណ្ឌកម្មរបស់អន្តរជាតិផងដែរ។ លោក ប្រកាសកន្លងមកថា ពលរដ្ឋខ្មែរនៅតាមបណ្តាប្រទេសនានា នឹងមកជាមួយលោក ហើយពលរដ្ឋក្នុងស្រុក ត្រៀមទទួល។ លើសពីនេះ លោក ថែមទាំងអះអាងថា មានអ្នកនយោបាយបរទេស យល់ព្រមមកជាមួយលោកទៀតផង។

សម្តេចនាយករដ្ឋមន្ត្រី ហ៊ុន សែន ព្រមានកន្លងមកថា «គុកនិងខ្នោះ» ត្រៀមសម្រាប់លោក សម រង្ស៊ី រួចហើយ។ ប្រមុខរដ្ឋាភិបាល ធ្លាប់បញ្ជាក់ថា ជនបរទេសដែលពុំមានទិដ្ឋាការ នឹងមិនអនុញ្ញាតឲ្យចូលកម្ពុជាឡើយ។

គណៈកម្មាធិការចិន្ត្រៃយ៍នៃអតីតគណបក្សប្រឆាំង បានបើកកិច្ចប្រជុំនៅក្រៅប្រទេស នៅថ្ងៃទី១៦ ខែសីហា ហើយក៏កំណត់ជាផ្លូវការថា ពួកគេ នឹងមកកម្ពុជា នៅថ្ងៃទី៩ វិច្ឆិកា ឆ្នាំ២០១៩ ដែលជាថ្ងៃទីបុណ្យឯករាជ្យជាតិលើកទី៦៦។ លោក អេង ឆៃអ៊ាង អនុប្រធាននៃអតីតគណបក្សប្រឆាំង បញ្ជាក់ក្នុងកិច្ចសម្ភាសជាមួយ VOA ថា អតីតគណបក្សប្រឆាំង ពិតជាបានកំណត់គម្រោងធ្វើមាតុភូមិនិវត្តនេះមែន។ យ៉ាងណាក៏ដោយ មជ្ឈដ្ឋានខ្លះ ហាក់មិនទាន់ជឿនៅឡើយទេ ថាអ្នកប្រឆាំង នឹងហ៊ានចូលស្រុកដូចការប្រកាស៕

អត្ថបទទាក់ទង

លោក សម រង្សុី ប្រកាសផ្លូវការ មកកម្ពុជា «នៅថ្ងៃ៩វិច្ឆិកា»

មេប៉ូលិស-មេទ័ព ដាក់កម្លាំងរួមគ្នា «នៅគ្រប់ច្រក» ចាំចាប់ក្រុមប្រឆាំងពេលចូលស្រុក