ជាតិ
តុលាការ មិនឲ្យលោក រ៉ុង ឈុន ចូលជួបយុវជន គង់ រ៉ៃយ៉ា និង សួង នាគព័ន្ធ ក្នុងពន្ធនាគារ លោក រ៉ុង ឈុន ទីប្រឹក្សាសមាគមគ្រូបង្រៀនកម្ពុជាឯករាជ្យ
× ភ្នំពេញ៖ លោក ឯក ប៉ូលីហ្វីល ចៅក្រមស៊ើបសួរនៃសាលាដំបូងរាជធានីភ្នំពេញ មិនអនុញ្ញាតឱ្យលោក រ៉ុង ឈុន ទីប្រឹក្សាសមាគមគ្រូបង្រៀនកម្ពុជាឯករាជ្យ និងសហការី ចូលជួបសួរសុខទុក្ខ យុវជន គង់ រ៉ៃយ៉ា និង យុវជន សួង នាគព័ន្ធ នោះទេ ដោយលើកហេតុផលថា សំណុំរឿង របស់អ្នកទាំងពីរ កំពុងស្ថិតក្នុងចំណាត់ការស៊ើបសួរ និងស្រាវជ្រាវប្រមូលភស្តុតាងនានា។ ម្យ៉ាងវិញទៀត សាក្សីដែលពាក់ព័ន្ធក្នុងសំណុំរឿងនេះ មិនទាន់ចូលផ្តល់ចម្លើយបំភ្លឺដល់តុលាការនៅឡើយ។
ក្នុងលិខិតដែលជូនទៅលោក រ៉ុង ឈុន កាលពីថ្ងៃ១៦ខែសីហា ចៅក្រមស៊ើបសួរ បានបញ្ជាក់ថា ស្ថិតនៅក្នុងដំណាក់កាលនេះ អ្នកដែលអាចចូលសួរសុខទុក្ខ យុវជន គង់ រ៉ៃយ៉ា និង យុវជន សួង នាគព័ន្ធ គឺមានតែមេធាវី និងក្រុមគ្រួសារប៉ុណ្ណោះ។ ថ្មីៗនេះ លោក រ៉ុន ឈុន ដាក់លិខិតទៅចៅក្រមស៊ើបសួរ ដើម្បីសុំចូលជួបអ្នកទាំងពីរ នៅថ្ងៃទី២២ ខែកក្កដា។
យុវជន គង់ រ៉ៃយ៉ា (ខាងឆ្វេង) និង យុវជន សួង នាគព័ន្ធ
សូមរម្លឹកថា យុវជន គង់ រ៉ៃយ៉ា ត្រូវបានចៅក្រមស៊ើបសួរ សម្រចឃុំនៅពន្ធនាគារព្រៃសជាបណ្តោះអាសន្ន កាលពីដើមខែកក្កដា ឆ្នាំ២០១៩ ក្រោមបទចោទញុះញង់ឲ្យប្រព្រឹត្តបទឧក្រិដ្ឋជាអាទិ៍ ដោយសារតែអំពាវនាវលក់អាវយឺត ដែលមានរូបនិងទ្រឹស្តីរបស់លោកបណ្ឌិត កែម ឡី។ រីឯ លោក សួង នាគព័ន្ធ បានជាប់នៅឃុំនៅពន្ធនាគារព្រៃសជាបណ្តោះអាសន្ន កាលពីខែកក្កដាដូចគ្នា ក្រោមបទញុះញង់ ព្រោះផ្សាយខិត្តប័ណ្ណថា «បញ្ឈប់ការសម្លាប់ក្រៅប្រព័ន្ធច្បាប់» នៅក្នុងថ្ងៃរម្លឹកខួបបីឆ្នាំនៃការបាញ់សម្លាប់លោកបណ្ឌិត កែម ឡី៕
© រក្សាសិទ្ធិដោយ thmeythmey.com