អន្តរជាតិ
វៀតណាមថា ក្រុមហ៊ុនហ្វេសប៊ុករឹតត្បិតការផ្សាយព័ត៌មានមួយចំនួនតាមសំណើខ្លួន
×![]()
ដោយ៖ ងួន សុភាវត្តី
មន្ត្រីរដ្ឋាភិបាលវៀតណាមបាននិយាយកាលពីថ្ងៃទី១៥ ខែសីហាថា ក្រុមហ៊ុនហ្វេសប៊ុកកំពុងរឹតត្បិតការចូលប្រើប្រាស់មាតិកាមួយចំនួននៅវៀតណាម។ ចំណាត់ការរបស់ក្រុមហ៊ុនបច្ចេកវិទ្យាអាមេរិក ធ្វើឡើងតាមសំណើរបស់ក្រុងហាណូយ ដែលកំពុងតែបើកយុទ្ធនាការរឹតបន្តឹងការប្រើប្រាស់អ៊ីនធឺណិតក្នុងស្រុក។
មន្ត្រីរដ្ឋាភិបាលវៀតណាមបាននិយាយកាលពីថ្ងៃទី១៥ ខែសីហាថា ក្រុមហ៊ុនហ្វេសប៊ុកកំពុងរឹតត្បិតការចូលប្រើប្រាស់មាតិកាមួយចំនួននៅវៀតណាម។ ចំណាត់ការរបស់ក្រុមហ៊ុនបច្ចេកវិទ្យាអាមេរិក ធ្វើឡើងតាមសំណើរបស់ក្រុងហាណូយ ដែលកំពុងតែបើកយុទ្ធនាការរឹតបន្តឹងការប្រើប្រាស់អ៊ីនធឺណិតក្នុងស្រុក។
ប្រព័ន្ធផ្សព្វផ្សាយសង្គមត្រូវបានគេប្រើប្រាស់យ៉ាងទូលំទូលាយនៅក្នុងប្រទេសវៀតណាម។ ទោះបីជាមានការផ្លាស់ប្តូរសេដ្ឋកិច្ចនិងការបើកចំហអោយមានការផ្លាស់ប្តូរសង្គមក៏ដោយក៏គណបក្សកុម្មុយនិស្តកំពុងកាន់អំណាច នៅតែបន្តត្រួតពិនិត្យប្រព័ន្ធផ្សព្វផ្សាយយ៉ាងតឹងរ៉ឹង និងមិនអត់ធ្មត់ចំពោះការរិះគន់ឡើយ។
រដ្ឋមន្ត្រីព័ត៌មានវៀតណាម លោក Nguyen Manh Hung បានថ្លែងក្នុងកិច្ចប្រជុំសភាថា ក្រុមហ៊ុន Facebook បានបំពេញសំណើរបស់រដ្ឋាភិបាលវៀតណាម ៧០ទៅ៧៥ភាគរយហើយ ។ សំណើដែលលោកលើកឡើង គឺជាសំណើដែលរដ្ឋាភិបាលវៀតណាមប្រាប់ក្រុមហ៊ុន Facebook អោយរឹតបណ្តឹងការផ្សព្វផ្សាយមាតិកាមួយចំនួនដែលអាចប៉ះពាល់ដល់ច្បាប់ក្នុងប្រទេស។
កាលពីខែឧសភា ក្រុមហ៊ុនអាមេរិកមួយនេះប្រកាសថា ខ្លួនបានបង្កើនបរិមាណមាតិកាដែលត្រូវត្រួតពិនិត្យពេលចូលប្រើនៅប្រទេសវៀតណាមជាង ៥០០ភាគរយនៅឆមាសទី ២ នៃឆ្នាំ ២០១៨ ។
ក្នុងរយៈពេលប៉ុន្មានឆ្នាំចុងក្រោយនេះ វៀតណាមបានរឹតបន្តឹងការប្រើប្រាស់អ៊ីនអឺណិត ខណៈច្បាប់អ៊ីនធឺណិត ចូលជាធរមាននៅក្នុងខែមករា។ ច្បាប់សន្តិសុខតាមអ៊ីនធឺណិតនេះ តម្រូវឱ្យក្រុមហ៊ុនដូចជា ហ្វេសប៊ុក បង្កើតការិយាល័យក្នុងស្រុកនិងរក្សាទុកទិន្នន័យនៅក្នុងប្រទេស។
រដ្ឋមន្ត្រីព័ត៌មានវៀតណាម ក៏បានលើកឡើងក្នុងអង្គប្រជុំនោះថា YouTube បានបំពេញសំណើរបស់វៀតណាមបាន៨០ ទៅ៨៥ភាគរយហើយដែរ។លោកក៏បាននិយាយផងដែរថា វៀតណាមបានកសាងមជ្ឈមណ្ឌលមួយដើម្បីត្រួតពិនិត្យខ្លឹមសារនៃគេហទំព័រព័ត៌មាន និងបណ្ដាញសង្គមដែលអាចតម្រៀបទិន្នន័យរាប់លានទៅជាប្រភេទដូចជា“ វិជ្ជមាន” និង“ អវិជ្ជមាន” ។
លោក Hung បាននិយាយថា៖ «សមាមាត្រនៃព័ត៌មានអវិជ្ជមានមាន ៣០ ភាគរយប៉ុន្តែឥឡូវយើងបានចាត់វិធានការសមាមាត្រដែលព័ត៌មានអវិជ្ជមានគឺនៅក្រោម ១០ ភាគរយ» ។
កាសែតអនឡាញ VnExpress បានរាយការណ៍ថាមានតែគណនីដែលបានផ្ទៀងផ្ទាត់ភាពត្រឹមត្រូវនិងមានអត្តសញ្ញាណច្បាស់លាស់ប៉ុណ្ណោះដែលត្រូវបានអនុញ្ញាតឱ្យផ្សាយបន្តផ្ទាល់វីដេអូនៅលើ Facebook ៕
© រក្សាសិទ្ធិដោយ thmeythmey.com
