ជាតិ
សង្គមជាតិ
រដ្ឋមន្ត្រីកសិកម្ម នឹងបំពាក់ប្រព័ន្ធ GPS លើទូកនេសាទ ដើម្បីតាមដានការនេសាទខុសច្បាប់
×![]()
ដោយ: ភួង វ៉ាន់ថា
ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ កំពុងរៀបចំប្រព័ន្ធចុះបញ្ជី និងបំពាក់ប្រព័ន្ធ GPS លើទូកនេសាទទាំងអស់ ដើម្បីតាមដានបទល្មើសនេសាទ ទាំងក្នុងតំបន់ទឹកសាប និងសមុទ្រ។ រដ្ឋមន្ត្រីកសិកម្ម ថ្លែងបែបនេះក្នុងពិធីប្រកាសដាក់ឱ្យអនុវត្តកម្មវិធីអភិវឌ្ឍន៍វិស័យជលផល ដែលទទួលបានជំនួយហិរញ្ញប្បទានឥតសំណងពីសហភាពអឺរ៉ុប ក្នុងទំហំទឹកប្រាក់ ១២២ លានអឺរ៉ូ ( ជាង១៣៥ លានដុល្លារ) កាលពីព្រឹកថ្ងៃទី ២១ ខែសីហា ឆ្នាំ២០១៩។ 
រដ្ឋមន្ត្រីក្រសួងកសិកម្ម លោក វេង សាខុន បាននិយាយថា បទល្មើសនេសាទ និងការប្រែប្រួលអាកាសធាតុ បានបណ្ដាលឱ្យទិន្នផលត្រីក្នុងប្រទេសកម្ពុជាមានការធ្លាក់ចុះ។ ដោយមើលឃើញពីបញ្ហា ទើបរដ្ឋមន្ត្រីក្រសួង បានដាក់ចេញផែនការជាក់លាក់មួយ ក្នុងការការពារទិន្នផលត្រីសម្រាប់ពលរដ្ឋកម្ពុជា ក្នុងទិសដៅជំរុញការនាំចេញទៅកាន់ទីផ្សារពិភពលោក តាមរយៈការចុះបញ្ជី និងបំពាក់ប្រព័ន្ធ GPS ដើម្បីឲ្យមន្ត្រីជំនាញមានភាពងាយស្រួលតាមដានលើករណីបទល្មើសនេសាទ។
បើតាមលោក វេង សាខុន ក្រសួងនឹងពង្រឹងការងារបន្ថែមទៀតជាមួយភាគីពាក់ព័ន្ធ ,ប្រជាសហគមន៍ ,អង្គការសង្គមស៊ីវិល និងវិស័យឯកជនជាដើម ក្នុងការរួមគ្នាអភិវឌ្ឍន៍វារីវប្បកម្មឲ្យកាន់តែទំនើប និងកាត់បន្ថយការប្រែប្រួលអាកាសធាតុ។ បន្ថែមពីនេះមន្ត្រីជំនាញទាំងអស់ នឹងត្រូវបណ្ដុះបណ្ដាលសមត្ថភាព ទាំងផ្លូវច្បាប់ និងការអនុវត្តច្បាប់ ក្នុងការបង្ក្រាបបទល្មើសនេសាទឱ្យមានប្រសិទ្ធភាព។
រដ្ឋមន្ត្រីកសិកម្មរូបនេះ បាននិយាយថា៖« សព្វថ្ងៃនេះយើងបានកំណត់ថា យើងមិនអាចចាប់ត្រីលើសពី ៦០០ពាន់តោនទេ ពីទឹកសាប ។ដូច្នេះបានជាយើងពង្រីកការធ្វើវារីវប្បកម្មឱ្យបានច្រើន ដែលយើងព្យាករថា ក្នុងឆ្នាំ២០៤០ អាចចាប់រហូតដល់ជាង ៦០០ពាន់តោន ដើម្បីផ្គត់ផ្គង់ពលរដ្ឋយើងផង និងការនាំចេញផង»។
លោក ចច អេដហ្គា ( George EDGAR) ឯកអគ្គរដ្ឋទូតសហភាពអ៊ឺរ៉ុប បាននិយាយថា ការបន្តផ្តល់ជំនួយលើគម្រោងវិស័យជលផលនេះ ព្រោះសហភាពអឺរ៉ុបចង់ឃើញកម្ពុជាមានការគ្រប់គ្រងវិស័យជលផលប្រកបដោយចីរភាព និងជួយលើកស្ទួយជីវភាពប្រជាពលរដ្ឋកម្ពុជា។
ក្រសួងកសិកម្ម បានទទួលគម្រោងថ្មី ពី EU និង AFD ដែលមានទំហំទឹកប្រាក់១២២ លានអ៊ឺរ៉ូ ( ជាង១៣៥ លានដុល្លារ)សម្រាប់អនុវត្តលើគម្រោង ទី១ «ការជំរុញកំណើនវិស័យវារីវប្បកម្មប្រកបដោយចីរភាព និង បរិយាប័ន្ននៃវារីវប្បកម្ម (CAPFISH-Aquaculture)» និង ទី២ «ការជំរុញកំណើនវិស័យជលផលប្រកប ដោយចីរភាព និងបរិយាប័ន្ន៖ សមាសភាគការនេសាទ (CAPFISH-Capture) » ដែលរយៈពេល៥ ឆ្នាំ គឺចាប់ពីឆ្នាំ២០១៩ ដល់២០២៣៕
Tag:
កសិកម្ម
នេសាទ
© រក្សាសិទ្ធិដោយ thmeythmey.com
