អន្តរជាតិ
នយោបាយអន្តរជាតិ
×![]()
នាយករដ្ឋមន្ត្រីអូស្ត្រាលី លោក Scott Morrison នៅថ្ងៃ២៤ សីហា បានបញ្ចប់ទស្សនកិច្ចផ្លូវការលើកដំបូងរយៈពេលបីថ្ងៃនៅវៀតណាម ជាមួយនឹងការប្តេជ្ញាចិត្តថ្មី។ ភាគីទាំងពីរ បានឯកភាពគ្នាលើកកម្ពស់ចំណងមិត្តភាពឲ្យទៅកម្រិតកាន់តែខ្ពស់ជាមុន តាមរយៈការពិពិធកម្មសេដ្ឋកិច្ច-ពាណិជ្ជកម្ម និងការធ្វើការរួមគ្នាពង្រឹងស្ថិរភាពក្នុងតំបន់។
ជានាយករដ្ឋមន្ត្រីដំបូងរបស់អូស្ត្រាលី ដែលមានវត្តមានក្នុងទឹកដីវៀតណាមគិតចាប់ពីឆ្នាំ១៩៩៤ លោក Scott Morrison បានប្តេជ្ញាជាមួយសមភាគីវៀតណាម លោកនាយករដ្ឋមន្ត្រី Nguyen Xuan Phuc ក្នុងការធ្វើកិច្ចសហប្រតិបត្តិការដោយផ្តោតលើវិស័យអាទិភាព ដូចជា ការពង្រឹងការផ្សារភ្ជាប់សេដ្ឋកិច្ច, ធ្វើឲ្យកាន់តែស៊ីជម្រៅលើយុទ្ធសាស្ត្រការពារ និងសន្តិសុខ ក៏ដូចជាកសាងសមត្ថភាព និងការច្នៃប្រឌិត។
តាមការចុះផ្សាយរបស់សារព័ត៌មានអូស្ត្រាលី The Weekend Australian នៅចំពោះមុខតំណាងផ្នែកធុរកិច្ចអូស្ត្រាលី និងវៀតណាមជាង១០០នាក់ លោកនាយករដ្ឋមន្ត្រី បានអះអាងពីបំណងក្នុងការធ្វើកិច្ចសហប្រតិបត្តិការសេដ្ឋកិច្ចកាន់តែស៊ីជម្រៅជាមួយនឹង វៀតណាម ដែលលោក ហៅថាជា តារាសេដ្ឋកិច្ចកំពុងរះ តាមរយៈកិច្ចព្រមព្រៀងពាណិជ្ជកម្មសេរី និងកិច្ចសហប្រតិបត្តិក្របខណ្ឌសេដ្ឋកិច្ចផ្សេងទៀត រាប់បញ្ចូលទាំង APEC ផងដែរ។
នាអំឡុងទស្សនកិច្ចនោះ លោកនាយករដ្ឋមន្ត្រី តាមប្រភពព័ត៌មានអូស្ត្រាលីដដែលនោះ បានគូសបញ្ជាក់ពីទំនាក់ទំនងជាមួយនឹងវៀតណាមយ៉ាងដូច្នេះថា៖ «វត្តមានរបស់ខ្ញុំទីនេះ ក៏ព្រោះតែខ្ញុំ ឃើញពីសក្តានុពល។ យើង ជាប្រទេសពីរ ដែលមានប្រព័ន្ធគ្រប់គ្រងផ្សេងគ្នា ក៏ប៉ុន្តែ យើង បានមានទំនាក់ទំនងភាពជាដៃគូប្រកបដោយមាត្រីភាព»។
គួរឲ្យកត់សម្គាល់ផងនោះ បន្ថែមពីការពង្រឹងទំនាក់ទំនងសេដ្ឋកិច្ច លោកនាយករដ្ឋមន្ត្រីអូស្ត្រាលីរូបនេះ បានសន្យាដូចគ្នាក្នុងការនៅជាមួយនឹងវៀតណាមដើម្បីធានាឲ្យបានពីសេរីភាព និងការបើកចំហឥណ្ឌូប៉ាស៊ីហ្វិក ជាពិសេសនោះសេរីភាពនៅក្នុងសមុទ្រចិនខាងត្បូង ដែលជាសមុទ្រជម្លោះមួយរវាងចិន និងបណ្តាប្រទេសអាស៊ាន រួមទាំងវៀតណាមផង៕
Tag:
អូស្ត្រាលី
វៀតណាម
អាស៊ាន
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 6 ថ្ងៃ
