អន្តរជាតិ
ប្រធានាធិបតីអាមេរិក ដូណាល់ ត្រាំ (ឆ្វេង) និងមេដឹកនាំកូរ៉េខាងជើង គីម ជុងអ៊ុន (AFP)
×![]()
ដោយ៖ ងួន សុភាវត្តី
ប្រធានាធិបតីសហរដ្ឋអាមរិកលោក ដូណាល់ ត្រាំ បានបង្ហាញការមិនពេញចិត្តចំពោះការបាញ់មីស៊ីលចុងក្រោយរបស់កូរ៉េខាងជើង ប៉ុន្តែលោក ពុំបាននិយាយធ្ងន់ៗអ្វីពាក់ព័ន្ធនឹងសកម្មភាពនេះឡើយ។ ផ្ទុយពីលោក ត្រាំ នាយករដ្ឋមន្ត្រីជប៉ុន លោក ស៊ិនហ្សូ អាបេ យល់ឃើញថា ទង្វើរបស់ក្រុងព្យុងយ៉ាងនេះជាការបំពានសេចក្តីសម្រេចរបស់ UN ។
«ខ្ញុំមិនសប្បាយចិត្តអំពីការបាញ់នេះទេ តែកូរ៉េខាងជើងមិនបានបំពានដល់កិច្ចព្រមព្រៀងទេ»។ នេះជាសម្តីរបស់លោកត្រាំ កាលពីថ្ងៃ២៥ ខែសីហា បន្ទាប់ពីប្រព័ន្ធផ្សព្វផ្សាយរដ្ឋកូរ៉េខាងជើង បានចុះផ្សាយថា មេដឹកនាំកូរ៉េខាងជើង លោក គីមជុងអ៊ុន ជាអ្នកត្រួតពិនិត្យការបាញ់សាកល្បងប្រព័ន្ធបាញ៉រ៉ុក្កែតច្រើនក្នុងពេលតែមួយប្រភេទធំ។
ការលើកឡើងរបស់របស់លោកត្រាំ ជុំវិញការបាញ់មីស៊ីលនេះ ធ្វើឡើងនៅក្នុងកិច្ចប្រជុំនៃប្រទេសជឿនលឿនទាំង៧ (G7) នៅបារាំង។ តាមការចុះផ្សាយរបស់ទីភ្នាក់ងារព័ត៌មាន AFP យោធាសេអ៊ូល បានបញ្ជាក់ឲ្យដឹងថា ក្រុងព្យុងយ៉ាង បានបាញ់មីស៊ីលរយៈចម្ងាយខ្លីចំនួន ២គ្រាប់ កាលពីថ្ងៃសៅរិ៍ទី២៤ ខែសីហា។ ការបាញ់នេះ គឺជាការឆ្លើយតបទៅនឹងការធ្វើសមយុទ្ធរួមគ្នារវាងអាមេរិកនិងកូរ៉េខាងត្បូងដែលបានបញ្ចប់កាលពីមួយសប្តាហ៍មុន។
យ៉ាងណាមិញនាយករដ្ឋមន្ត្រីជប៉ុន លោក ស៊ិនហ្សូ អាបេ មានទស្សនៈផ្ទុយពីលោកត្រាំ។ ត្រង់ចំណុចនេះមេដឹកនាំជប៉ុនរូបនេះ បានបកស្រាយថា ការបាញ់សាកល្បងមីស៊ីលចុងក្រោយរបស់កូរ៉េខាងជើង គឺបានបំពានសេចក្តីសម្រេចរបស់អង្គការសហប្រជាជាតិ ដែលលោកចាត់ទុកថា ជារឿងគួរឲ្យសោកស្តាយបំផុត។
គួររំលឹកឡើងវិញថា កិច្ចប្រឹងប្រែងរបស់លោកត្រាំ ក្នុងការធ្វើទំនាក់ទំនងការទូតបញ្ចុះបញ្ចូលកូរ៉េខាងជើងឲ្យបោះបង់ចោលអាវុធនុយក្លេអ៊ែរ ត្រូវបានបរាជ័យ។ ជាឧទាហរណ៍ កិច្ចជំនួបរបស់អាមេរិកនិងកូរ៉េខាងជើងនៅវៀតណាម កាលពីខែកុម្ភៈកន្លងទៅ ត្រូវបានបញ្ចប់ដោយមិនមានការចុះកិច្ចព្រមព្រៀងអ្វីមួយទេ។ ម្យ៉ាងវិញទៀត គេជឿថា ការបាញ់សាកល្បងមីស៊ីលរបស់កូរ៉េខាងជើងនេះ អាចនឹងរារាំងកិច្ចជំនួបបន្តទៀតរវាងអាមេរិកនិងកូរ៉េខាងជើង៕
Tag:
កូរ៉េខាងជើង សហរដ្ឋអាមេរិក នុយក្លេអ៊ែរ
© រក្សាសិទ្ធិដោយ thmeythmey.com
