អន្តរជាតិ
មូលនិធិរបស់ Leonardo DiCarprio ប្រកាសផ្តល់៥លានដុល្លារដើម្បីចូលរួមសង្គ្រោះព្រៃអាម៉ាហ្សូន
លោក Leonardo DiCaprio តារាសម្តែង
×![]()
ដោយ៖ ឈួន ឈីវអ៊ីង
សម្ព័ន្ធភាពផែនដី (EarthAlliance) គឺជា អង្គការបរិស្ថានថ្មីដែលបង្កើតឡើងដោយ លោក Leonardo DiCarprio និងមិត្តភក្តិរបស់គាត់ គឺ Laurene Powell Jobs និងBrian Sheth ដែលសន្យាថានឹងផ្តល់ជំនួយ ៥លានដុល្លារដើម្បីជួយអភិរក្សព្រៃអាម៉ាហ្សូន។
ព្រៃអាម៉ាហ្សូន ដែលជាព្រៃរងទឹកភ្លៀងដ៏ធំជាងគេនៅក្នុងពិភពលោកត្រូវបានឆាបឆេះក្នុងកម្រិតខ្លាំងបំផុតបើគិតតាំងពីឆ្នាំ២០១៣ មក។ វិទ្យាស្ថានជាតិសម្រាប់ស្រាវជ្រាវអាវកាសនៃប្រទេសប្រេស៊ីល បានប្រកាសថា ព្រៃអាម៉ាហ្សូនធំជាងទីលានបាល់ទាត់១ដងកន្លះ កំពុងត្រូវបានបំផ្លាញរាល់នាទី ជារៀងរាល់ថ្ងៃ។
ព្រៃអាម៉ាហ្សូនគឺជាអ្នកផលិតឧស្ម័នអុកស៊ីសែន២០ភាគរយ វាប្រៀបបានដូចជា សួតរបស់ភពផែនដី។ វាត្រូវបានគេចាត់ទុកថា មានសារៈសំខាន់យ៉ាងខ្លាំងក្នុងដំណើរកាត់បន្ថយការឡើងកម្តៅពិភពលោក។ បើតាមការចុះផ្សាយរបស់សារព័ត៌មាន CNN។
EarthAlliance ត្រូវបានបង្កើតមូលនិធិព្រៃអាម៉ាហ្សូនបន្ទាន់ជាមួយទឹកប្រាក់ ៥លានដុល្លារសម្រាប់ធនធានសំខាន់របស់សមាគមន៍ជនជាតិដើមភាគតិច និងធ្វើការជាមួយដៃគូសហការក្នុងស្រុកដើម្បីការពារជីវចម្រុះនៃព្រៃអាម៉ាហ្សូន នេះបើតាមការប្រកាសរបស់អង្គការលើទំព័រ Twitter កាលពីថ្ងៃអាទិត្យកន្លងទៅ។
មូលនិធិរបស់លោក Leonardo DiCarprio បានបង្កើតឡើងតាំងពីឆ្នាំ ១៩៩៨ ហើយបានធ្វើការបរិច្ចាគលុយជាង ១០០លានដុល្លារ ជាជំនួយដល់គម្រោងនានានៅមហាសមុទ្រទាំង៥ និងទូទាំងទ្វីបទាំង៧ យោងតាមការចុះផ្សាយរបស់កាសែត July Press។
Leonardo DiCarprio ត្រូវបានពលរដ្ឋខ្មែរស្គាល់ច្រើន តាមរយៈតួអង្គឯកក្នុងរឿង Titanic ហើយតារាភាពយន្តហូលីវុត និងជាម្ចាស់ពានរង្វាន់អូស្តាររូបនេះ ក៏ជាអ្នកបរិស្ថាននិយមផងដែរ ជាពិសេសការចូលរួមសម្តែងក្នុងភាពយន្តឯកសារមួយដែលមានចំណងជើងថា «Before the Flood»៕
Tag:
ព្រៃអាម៉ាហ្សូន
© រក្សាសិទ្ធិដោយ thmeythmey.com
