អន្តរជាតិ
លោក ត្រាំ ថា កិច្ចព្រៀមព្រៀងដ៏ធំជាមួយជប៉ុន នឹងលេចរូបរាងឡើងឆាប់ៗ ប្រធានាធិបតីលោក ដូណាល់ ត្រាំ និងនាយករដ្ឋមន្រ្តី លោក ស៊ិន ហ្សូនអាបេ នៅក្នុងកិច្ចប្រជុំG7
× ប្រធានាធិបតីអាមេរិក ដូណាល់ ត្រាំ បាននិយាយថា អាមេរិក និងជប៉ុន គឺកាន់តែជិតសម្រេចកិច្ចព្រមព្រៀងពាណិជ្ជកម្មទ្វេភាគីហើយ។ ការលើកឡើងនេះ ធ្វើឡើងមុនពេលមានកិច្ចប្រជុំជាមួយលោក ស៊ិនហ្សូ អាបេ ក្រៅកិច្ចប្រជុំប្រទេសជឿនលឿនទាំង៧ (G7)។
«វាគឺជាកិច្ចព្រមព្រៀងដ៏ធំមួយ។ វាគឺជាកិច្ចព្រមព្រៀងដ៏ធំជាងគេបំផុត ដែលយើងធ្លាប់ធ្វើជាមួយជប៉ុន»។ នេះជាពាក្យសម្តីយ៉ាងខ្លីរបស់លោក ដូណាល់ ត្រាំ។ ប្រាប់ទីភ្នាក់ងារព័ត៌មាន AFP នៅថ្ងៃទី២៥ ខែសីហា។ លោកប្រធានាធិបតី បានបញ្ជាក់ទៀតថា អាមេរិក និងជប៉ុន បានចរចាអស់រយៈពេល៥ខែ ហើយវាក៏ជិតសម្រេចកិច្ចព្រមព្រៀងជាមួយគ្នាដែរ។
ជាការពិតប្រទេសសម្ព័ន្ធមិត្តទាំងពីរ រីករាយនឹងទំនាក់ទំនងដ៏ជិតស្និទ្ធនេះណាស់ តែជាញយៗ លោកត្រាំ និយាយថា ទីក្រុងតូក្យូ មានអតុល្យភាពពាណិជ្ជកម្មជាមួយទីក្រុងវ៉ាស៊ីនតោន។ ទូរទស្សន៍ជប៉ុន NHK បានចុះផ្សាយថា មន្ត្រីមកពីប្រទេសទាំងពីរ ដែលទទួលបន្ទុកចរចាក្នុងកិច្ចការពាណិជ្ជកម្មនេះ បានយល់ព្រមថា ជប៉ុន នឹងយកពន្ធលើផលិតផលកសិកម្មអាមេរិកដល់កម្រិតមួយ ដែលខ្លួនបានយកពីសមាជិកកិច្ចព្រមព្រៀងពាណិជ្ជកម្មតំបន់ប៉ាស៊ីហ្វិក៏ធំទូលាយ ឬហៅកាត់ថា TPP ។
យ៉ាងណាមិញភាគីទាំងសងខាង ក៏យល់ព្រមគ្នាទៀតថាក្រុងតូក្យូ នឹងកាត់បន្ថយពន្ធលើសាច់គោ និងសាច់ជ្រូក ទាបជាងកម្រិតពន្ធក្នុងក្របខណ្ឌ TPP។ បន្ថែមពីនេះទៅទៀត ពួកគេ មិនបានកំណត់កូតាថ្មីលើផលិតផលបឺរ និងទឹកដោះគោះស្រស់នោះឡើយ។
ចំណែកអាមេរិកវិញ នឹងកាត់បន្ថយពន្ធលើផលិតរោចក្រឧស្សាហកម្មជប៉ុន ប៉ុន្តែពន្ធលើការនាំចូលរថយន្តនៅតែមានដដែល ហើយទាមទារឲ្យមានការចរចារយៈពេលយូរ ព្រោះលោកត្រាំ មើលឃើញថា ពាណិជ្ជកម្មរវាងអាមេរិក និងជប៉ុនកំពុងមានបញ្ហា។
សូមបញ្ជាក់ថា ប្រធានាធិបតីអាមេរិកវ័យ៧៣ឆ្នាំរូបនេះ បានសម្រេចដើរចេញពីកិច្ចព្រមព្រៀងពាណិជ្ជកម្មតំបន់ប៉ាស៊ីហ្វិកដ៏ធំទូលាយ TPP កាលពីឆ្នាំ២០១៧ ដោយសារតែការមើលឃើញពីអតុល្យភាពនៃជញ្ជីងពាណិជ្ជកម្មរវាងអាមេរិក និងប្រទេសសមាជិក៕
© រក្សាសិទ្ធិដោយ thmeythmey.com