អន្តរជាតិ
ប្រេស៊ីលបដិសេធជំនួយពីក្រុមប្រទេសG7 ក្នុងការទប់ស្កាត់ភ្លើងឆេះព្រៃអាម៉ាហ្សូន ពីឆ្វេងទៅស្តាំ៖ លោកOnyx Lorenzoni, លោកលោកJair Bolsonaro និងលោកRicardo Salles
× ប្រេស៊ីល នៅថ្ងៃទី២៦ ខែសីហា បានបដិសេធមូលនិធិពីក្រុមប្រទេសមានសេដ្ឋកិច្ចជឿនលឿនទាំង៧ (G7) ក្នុងការប្រយុទ្ធប្រឆាំងទៅនឹងភ្លើងឆេះព្រៃអាម៉ាហ្សូន។ បន្ថែមពីលើនេះទៅទៀត មន្ត្រីជាន់ខ្ពស់របស់ប្រេស៊ីលថែមទាំងប្រាប់ប្រធានាធិបតីបារាំង អេម៉ានុយអែល ម៉ាក្រុង ឲ្យមើលថែប្រទេស និងដែនដីអាណានិគមរបស់ខ្លួនថែមទៀត។
បន្ទាប់ពីមានការទាស់សម្តីគ្នារវាងប្រធានាធិបតីបារាំង និងប្រធានាធិបតីប្រេស៊ីលរឿងប្រពន្ធរួចមក អ្វីៗផ្លាស់ប្តូរទាំងអស់។ ជំនួយពីក្រុមប្រទេស G7 ប្រមាណជា ៣០លានដុល្លារ ត្រូវបានប្រេស៊ីលបដិសេធមិនទទួលយក។
«យើងរីករាយនឹងទទួលសំណើនោះ ប៉ុន្តែមូលនិធិទាំងនោះទុកសម្រាប់ស្តារព្រៃនៅអឺរ៉ុបល្អជាង។» នេះជាការលើកឡើងរបស់មន្រ្តីប្រេស៊ីល។ ដោយនិយាយចំអកប្រាប់គេហទំព័រសារព័ត៌មាន G1 លោកOnyx Lorenzoni ជានាយខុទ្ទកាល័យរបស់លោក ជែ បុលសូណារ៉ូ(Jair Bolsonaro) លើកឡើងថា៖ «លោកម៉ាក្រុង មិនអាចបញ្ចៀសភ្លើងឆេះនៅព្រះវិហារកាតូលិក Notre-Dame បានទេ ហើយនោះជាសម្បត្តិបេតិកភណ្ឌពិភពលោក។ ម្តេចគាត់ហ៊ានបង្រៀនប្រទេសរបស់ពួកយើង»។
លោករដ្ឋមន្ត្រីបរិស្ថានប្រេស៊ីល Ricardo Salles បានប្រាប់អ្នកយកសារព័ត៌មានរបស់ទីភ្នាក់ងារសារព័ត៌មាន AFP តាំងពីដើមមកថា លោកសារទចំពោះមូលនិធិរបស់ក្រុមប្រទេស G7 ដើម្បីទប់ស្កាត់ភ្លើងឆេះព្រៃ ៩៥ម៉ឺនហិកតា ខណៈប្រេស៊ីលក៏បានបញ្ជូនយោធាទៅជួយពន្លត់រួចហើយដែរ។
ប៉ុន្តែអ្វីៗត្រូវផ្លាស់ប្តូរក្រោយពេលលោកប្រធានាធិបតី ជែ បុលសូណារ៉ូ(Jair Bolsonaro) កោះប្រជុំគណៈរដ្ឋមន្ត្រី។ ទាក់ទងនឹងបញ្ហានេះរដ្ឋមន្ត្រីបរិស្ថានប្រេស៊ីលដដែលគូសបញ្ជាក់ថា ប្រេស៊ីលគឺជាប្រទេសលទ្ធិប្រជាធិបតេយ្យ សេរី និងមិនធ្លាប់អនុវត្តការដាក់អាណានិគមនិយម និងចក្រពត្តិនិយមឡើយ ប្រហែលនេះជាកម្មវត្ថុនៃជនជាតិបារាំងដូចលោក ម៉ាក្រុង ហើយ។
សូមបញ្ជាក់ថា ក្រោយលោកជែ បុលសូណារ៉ូ និងលោក ម៉ាក្រុងបានសរសេរនៅលើបណ្តាញសង្គម Twitter ឌឺដងគ្នារួចមក មូលនិធិ ដែលត្រូវបានចូលរួមពីសំណាក់ក្រុមប្រទេសG7 ត្រូវបានប្រេស៊ីលបដិសេធទៅ៕
© រក្សាសិទ្ធិដោយ thmeythmey.com