កីឡាជាតិ
ជាតិ
សម្តេច ហ៊ុន សែន៖ ប៉ាល់ ជីវ័ន នាំមោទកភាពថ្មីដល់កម្ពុជា
× ភ្នំពេញ៖ សម្តេចនាយករដ្ឋមន្ត្រី ហ៊ុន សែន បានសរសេរសារអបអរសាទរចំពោះកីឡាករ ប៉ាល់ ជីវ័ន ដែលដណ្តើមបានមេដាយមាសក្នុងការប្រកួតជើងឯកពិភពលោក World ITF Taekwon-do Championship នៅទីក្រុង Plovdiv ប្រទេសប៊ុលហ្គារី។ សម្តេច បានជំរុញឲ្យម្ចាស់មេដាយមាសរូបនេះ បន្តខិតខំប្រឹងប្រែងអភិវឌ្ឍសមត្ថភាព ដើម្បីត្រៀមការប្រកួតស៊ីហ្គេមឆ្នាំ២០២៣។
មួយថ្ងៃក្រោយកីឡាករ ប៉ាល់ ជីវ័ន ដណ្តើមបានមេដាយមាសពិភពលោកលើវិញ្ញាសាសម្តែងមេគុនខ្សែក្រវាត់ខ្មៅ៥ដាន់នៅប៊ុលហ្គារី សម្តេចនាយករដ្ឋមន្ត្រី ហ៊ុន សែន បានសរសេរសារអបអរជ័យជម្នះជាប្រវត្តិសាស្ត្ររបស់កីឡាតេក្វាន់ដូ ITF រូបនេះថា មេដាយមាសរបស់ ជីវ័ន ជាមោទកភាពថ្មីរបស់កម្ពុជានៅលើឆាកអន្តរជាតិ។
សម្តេចបានសេសេរយ៉ាងដូច្នេះថា៖«សូមអបអរសាទរដល់កីឡាករតេក្វាន់ដូកម្ពុជាកីឡាករ ប៉ាល់ ជីវ័ន ដែលបានទទួលបានមេដាយមាសកម្រិតពិភពលោកពីការប្រកួត 21st World ITF Taekwon-Do Championship នៅទីក្រុង Plovdiv ប្រទេសប៊ុលហ្គារី។ នេះគឺជាមោទនភាពថ្មីមួយទៀត ដែលកូនខ្មែរបានដណ្តើមយកមេដាយមាសកម្រិតពិភពលោកជូនដល់ជាតិមាតុភូមិ»។
ជាមួយគ្នានេះ សម្តេចបានបន្តដាស់តឿនឲ្យម្ចាស់មេដាយមាសពិភពលោករូបនេះ បន្តខិតខំប្រឹងប្រែងហ្វឹកហាត់អភិវឌ្ឍសមត្ថភាពបន្ថែមទៀត ដើម្បីត្រៀមប្រជែងដណ្តើមមេដាយក្នុងការប្រកួតកីឡាស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ៕
កីឡាករ ប៉ាល់ ជីវ័ន និងលោក កែវ រ៉េមី ប្រធានសហព័ន្ធកីឡាតេក្វាន់ដូ ITF កម្ពុជា។ រូបថត លោក គី សុខលីម
Tag:
តេក្វាន់ដូ ITF
ប៉ាល់ ជីវ័ន
ហ៊ុន សែន
© រក្សាសិទ្ធិដោយ thmeythmey.com