អន្តរជាតិ
រថពាសដែក Stryker ដែលយោធាថៃទិញពីអាមេរិក។ រូបភាព U.S. Army
×![]()
ដោយ៖ ងួន សុភាវត្តី
យោធាថៃ គ្រោងទិញរថពាសដែករបស់អាមេរិកចំនួន១២០ នៅត្រឹមឆ្នាំ២០២០។ នេះបើតាមប្រភពក្រសួងការពារជាតិប្រាប់ទីភ្នាក់ងារព័ត៌មាន Reuters នៅថ្ងៃទី២៨ ខែសីហា។ រថពាសដែកចំនួន១០ នឹងមកដល់ថៃនៅខែក្រោយនេះ។
រថពាសដែកទាំង១២០គ្រឿងដែលយោធាទិញពីអាមេរិក ជាប្រភេទរថពាសដែកធុន Stryker ។ នេះបើតាមការផ្សាយរបស់ទូរទស្សន៍អាមេរិក Bloomberg ។ កន្លងទៅ មេបញ្ជាការកងទ័ពជើងគោកថៃ លោក Apirat Kongsompong និយាយថា រថពាសដែក ចំនួន៧០គ្រឿងនឹងបញ្ជូនមកថៃនៅចុងឆ្នាំនេះ និងចំនួន៥០គ្រឿងនៅឆ្នាំក្រោយ។
ប៉ុន្តែលោកមិនបានបញ្ជាក់ពីចំនួនទឹកប្រាក់នៅក្នុងការទិញនេះទេ ហើយក៏មិនបញ្ជាក់ពីប្រភេទដែរ។ រថពាសដែកទាំងអស់នេះ នឹងទុកនៅមូលដ្ឋានយោធា Chachoengsao ដែលនៅខាងកើតនៃទីក្រុងបាងកក។
ជុំវិញរថពាសដែក៧០គ្រឿងដែលមកដល់នៅឆ្នាំ២០១៩ ក្រសួងការពារជាតិថៃអះអាងថាទៀតថា ថៃនឹងបង់ប្រាក់សំរាប់រថក្រោះតែ៤៧គ្រឿងប៉ុណ្ណោះ ហើយរថក្រោះចំនួន២៣ទៀតគឺជាជំនួយរបស់អាមេរិកសម្រាប់ឆ្នាំនេះ។ ឯរថក្រោះចំនួន៥០ទៀត ថៃនឹងបន្តទិញនៅឆ្នាំក្រោយបន្ថែមទៀត។ អាមេរិកក៏នឹងជួយបង្ហាត់យោធាថៃពីរបៀបនៃការប្រើប្រាស់រថពាសដែកនេះផងដែរ។
កាលពីខែកក្កដាកន្លងទៅ ក្រសួងការបរទេសអាមេរិកបាននិយាយថា ខ្លួនបានផ្ដល់ភ្លើងខៀវដល់ការលក់រថពាសដែក Stryker នេះនិងឧបករណ៍មួយចំនួន ដែលមានតម្លៃប្រហែល១៧៥លានដុល្លារ។
អាមេរិកបានបានផ្អាកការផ្តល់ជំនួយផ្នែកយោធាដល់ថៃម្តងរួចមកហើយកាលពីឆ្នាំ២០១៤ ដោយសារតែមានការធ្វើរដ្ឋប្រហារ។ ក្នុងរបបគ្រប់គ្រងយោធានាពេលនោះ ថៃបានទិញគ្រឿងសព្វាវុធពីចិនជំនួសអាមេរិក។ មិនត្រឹមតែទិញគ្រឿងសព្វាវុធពីចិនទេ ពេលនោះថៃបានគ្រោងនឹងរឹតបន្តឹងទំនាក់ទំនងជាមួយចិនទៀតផង។ ប៉ុន្តែទំនាក់ទំនងរវាងសហរដ្ឋអាមេរិកនិងថៃ បានល្អប្រសើរឡើងវិញបន្ទាប់ពីមានការបោះឆ្នោតជ្រើសរើសថ្នាក់ដឹកនាំនៅឆ្នាំនេះ៕
© រក្សាសិទ្ធិដោយ thmeythmey.com
