សម្តេច ហ៊ុន សែន ហ៊ានភ្នាល់ជាមួយលោក សម រង្ស៊ី ថា សម្តេច សុខចិត្តចុះចេញពីតំណែង បើសម្តេច ចាប់លោក សម រង្ស៊ី មិនបាន ក្នុងរយៈពេល «ត្រឹម២៤ម៉ោង» ពេលលោក សម រង្ស៊ី និងបក្សពួក ត្រឡប់មកដល់កម្ពុជា នៅថ្ងៃទី៩ ខែវិច្ឆិកា ឆ្នាំ២០១៩។
ការប្រកាសភ្នាល់របស់សម្តេច ហ៊ុន សែន គឺធ្វើឡើងតាមរយៈកិច្ចសម្ភាសជាមួយសារព័ត៌មាន Fresh News នៅព្រឹកថ្ងៃទី៣០ ខែសីហា ឆ្នាំ២០១៩។ តាមរយៈកិច្ចសម្ភាសនេះ សម្តេច ផ្តាំទៅលោក សម រង្ស៊ី ថា បើលោក សម រង្ស៊ី ត្រូវចាប់ខ្លួន ជីវិតនយោបាយរបស់លោក រួមទាំងអង្គការចាត់តាំងរបស់លោក នឹងត្រូវបញ្ចប់។
សម្តេច បន្ថែមថា ផ្ទុយមកវិញ បើលោក សម រង្ស៊ី មិនហ៊ានចូលស្រុកទេ ជីវិតនយោបាយរបស់លោក និង អង្គការចាត់តាំងរបស់លោក នឹងត្រូវចប់ដូចគ្នា។ Fresh News បានសរសេរពីសម្តីរបស់សម្តេច ក្នុងន័យចោទជាសំណួរទៅកាន់លោក សម រង្ស៊ី បែបនេះថា៖«តើអ្នកឯងហ៊ានឬមិនហ៊ានចំពោះការភ្នាល់នេះ?»
លើសពីនេះ សម្តេច ហ៊ុន សែន នៅយកការស្បថមកលេងជាមួយលោក សម រង្ស៊ី ថែមទៀត ដោយសម្តេច បួងសួងឲ្យវត្ថុស័ក្តិសិទ្ធិលើលោក ផ្តាច់ជីវិតរបស់លោក សម រង្ស៊ី បើលោក មិនគោរពសន្យាក្នុងការភ្នាល់នេះ។ សម្តេច និយាយជាមួយ Fresh News ថា៖«ចំពោះការភ្នាល់នេះ ខ្ញុំ សូមឲ្យប្រជាពលរដ្ឋខ្មែរទូទាំងប្រទេសធ្វើជាសាក្សី....»។
សម្តេច ហ៊ុន សែន ចេញមកប្រកាសពីការភ្នាល់នេះ គឺដើម្បីឆ្លើយតបនឹងលោក សម រង្ស៊ី។ លោក សម រង្ស៊ី បានសួរមកសម្តេច ហ៊ុន សែន តាមរយៈភ្នំពេញប៉ុស្តិ៍ដូច្នេះថា៖«បើលោក ហ៊ុន សែន មិនជឿថា ខ្ញុំ វិលត្រឡប់ទៅកម្ពុជាវិញ នៅថ្ងៃ៩ ខែវិច្ឆិកា ឆ្នាំ២០១៩ តើលោក ហ៊ុន សែន យល់ព្រមចុះចេញពីតំណែងភ្លាមមួយរំពេចដែរឬទេ? លោក ផ្តល់គំនិតឲ្យសម្តេចបែបនេះថា៖«យើង អាចស្នើឲ្យប្រទេសចិន ធ្វើជាសាក្សី ក្នុងការភ្នាល់នេះ»។
តាមពិតទៅ អ្នកដែលបបួលភ្នាល់មុន គឺ លោក ខាន់ សុវណ្ណ ជាអ្នកគាំទ្រគណបក្សប្រជាជនកម្ពុជា និង តែងវាយប្រហារលោក សម រង្ស៊ី លើបណ្តាញសង្គម។ លោក ខាន់ សុវណ្ណ បបួល លោក សម រង្ស៊ី ភ្នាល់ថា បើលោក សម រង្ស៊ី ហ៊ានចូលស្រុកតាមកាលកំណត់មែន លោក នឹងឲ្យលោក សម រង្ស៊ី មួយលានដុល្លារ តែបើមិនចូលទេ លោក សម រង្ស៊ី ត្រូវឲ្យលោក មួយលានដុល្លារវិញ។
ក្រោយមក សម្តេច ហ៊ុន សែន ក៏ហៅទូរស័ព្ទ ទៅកាន់លោក ខាន់ សុវណ្ណ ពេលលោក ខាន់ សុវណ្ណ កំពុងនិយាយពីរឿងភ្នាល់គ្នាជាមួយលោក សម រង្ស៊ី ក្នុងការផ្សាយផ្ទាល់លើហ្វេសប៊ុក (Live)។ ពេលនោះ សម្តេច ហ៊ុន សែន ប្រកាសធ្វើជាសាក្សី ក្នុងការភ្នាល់នេះ និងបានចំអកឲ្យលោក សម រង្ស៊ី ថា លុយមួយលានដុល្លារ នឹងត្រូវប្រគល់ជូនលោក សម រង្ស៊ី នៅក្នុងពន្ធនាគារ។
ពេលកំពុងសន្ទនាជាមួយលោក ខាន់ សុវណ្ណ សម្តេច ហ៊ុន សែន នៅបង្អាប់លោក សម រង្ស៊ី ថែមទៀត ថា ប្រហែលជាគ្មានលុយដល់មួយលានដុល្លារទេ ហើយក៏ប្រាប់ទៅលោក ខាន់ សុវណ្ណ ឲ្យយកលុយពីលោក សម រង្ស៊ី តែពាក់កណ្តាលបានហើយ (៥សែនដុល្លារ) បើលោក សម រង្ស៊ី ចាញ់ការភ្នាល់ ដោយមិនហ៊ានចូលស្រុក។ តែខាងលោក ខាន់ សុវណ្ណ សុខចិត្តឲ្យមួយលានដុល្លារដល់លោក សម រង្ស៊ី បើលោក សម រង្ស៊ី ហ៊ានចូលស្រុក។
លោក សម រង្ស៊ី ប្រាប់សារព័ត៌មាននានាថា លោក មិនចាប់អារម្មណ៍ និង មិនឲ្យតម្លៃលើការភ្នាល់គ្នាជាមួយសម្តេច ហ៊ុន សែន ដោយការដាក់លុយបែបនេះទេ។ យ៉ាងណា ក្នុងការឆ្លើយសំណួរជាមួយភ្នំពេញប៉ុស្តិ៍ លោក សម រង្ស៊ី យល់ព្រមទទួលយកការភ្នាល់ជាមួយសម្តេច ហ៊ុន សែន តែការភ្នាល់នេះ មិនមែនដាក់លុយនោះទេ គឺដាក់តំណែង ពោលគឺ សម្តេច ហ៊ុន សែន ត្រូវចុះចេញពីតំណែង បើលោក សម រង្ស៊ី ហ៊ានចូលស្រុក។
មិនមែនជាលើកទីមួយទេ ដែលសម្តេច ហ៊ុន សែន និង លោក សម រង្ស៊ី លេងល្បែងភ្នាល់គ្នាបែបនេះ។ កន្លងមក បដិបក្សនយោបាយមួយគូ ធ្លាប់យកលោក កឹម សុខា ធ្វើជាតួអង្គនៃការភ្នាល់គ្នា ដោយកាលនោះ លោក សម រង្ស៊ី អះអាងដោយការជឿជាក់ថា លោក កឹម សុខា នឹងត្រូវបានដោះលែង នៅថ្ងៃទី២៩ ខែធ្នូ ឆ្នាំ២០១៨ ឬក៏យូរបំផុត នៅត្រឹមថ្ងៃទី៣ ខែមីនា ឆ្នាំ២០១៩។ លោក ហ៊ានភ្នាល់ថា បើលោក កឹម សុខា មិនត្រូវបានដោះលែងតាមកាលកំណត់ដូចដែលលោកលើកឡើងទេ លោក សុខចិត្តចូលមកស្រុកខ្មែរ ឲ្យអាជ្ញាធរ ចាប់ខ្លួន។
ពេលនោះ សម្តេ ហ៊ុន សែន ក៏យល់ព្រមភ្នាល់ជាមួយលោក សម រង្ស៊ី ដោយសម្តេច ប្រកាសតបទៅវិញថា សម្តេច នឹងចុះចេញពីតំណែង បើលោក កឹម សុខា ពិតជាត្រូវបានដោះលែងមែន។ តែសម្តេច ហ៊ុន សែន ទាមទារឲ្យលោក សម រង្ស៊ី ចូលស្រុកដូចការសន្យា បើលោក កឹម សុខា មិនត្រូវបានដោះលែង។
យ៉ាងណា មកដល់ពេលនេះ លោក កឹម សុខា នៅតែជាប់ចោទនិងស្ថិតនៅក្នុងផ្ទះ ដោយមិនអាចទៅណាឆ្ងាយបានឡើយ។ ឯ លោក សម រង្ស៊ី នៅតែមិនទាន់ចូលស្រុក។
ជុំវិញការចាប់ខ្លួនលោក សម រង្ស៊ី និង បក្សពួករបស់លោក ខាងកងកម្លាំងប្រដាប់អាវុធ ប្រកាសថាបានត្រៀមលក្ខណៈរួចហើយ។ កាលពីដើមខែកក្កដា ឆ្នាំ២០១៩ នាយឧត្តមសេនីយ៍ នេត សាវឿន អគ្គស្នងការនគរបាលជាតិ និង នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានបើកកិច្ចប្រជុំមួយ ហើយសម្រេចថា នឹងដាក់ពង្រាយកម្លាំងរួមគ្នា នៅតាមច្រកព្រំដែននានា ដើម្បីចាប់ក្រុមអ្នកប្រឆាំង ពេលពួកគេមកដល់កម្ពុជា៕