អន្តរជាតិ
ម៉ាឡេស៊ី មានគម្រោងបង្កើនអាយុចូលនិវត្តន៍របស់ប្រជាជនពី ៦០ឆ្នាំទៅ ៦៥ឆ្នាំ
រដ្ឋមន្រ្តីធនធានមនុស្សម៉ាឡេស៊ីលោកM Kulasegaran
×![]()
ដោយ: ធៀន ភារិន្ទ
លោក អ៊ឹម គូឡាស៊ីហ្គារ៉ាន់ (M Kulasegaran) រដ្ឋមន្ត្រីធនធានមនុស្សម៉ាឡេស៊ី នៅថ្ងៃទី០២ ខែកញ្ញាបាននិយាយថា រដ្ឋាភិបាលម៉ាឡេស៊ី នឹងសិក្សាលើសំណើដែលត្រូវបង្កើនអាយុចូលនិវត្តន៍របស់ប្រជាជន ដើម្បីឲ្យដូចទៅនឹងប្រទេសអភិវឌ្ឍន៍មួយចំនួន។ គោលដៅនៃការបង្កើនអាយុចូលនិវត្តន៍នេះ គឺដើម្បីបង្កើនផលិតកម្មការងារនៅក្នុងប្រទេស។ 
សភាសហព័ន្ធពាណិជ្ជកម្មម៉ាឡេស៊ីកាលពីថ្ងៃទី០១ ខែកញ្ញា បានជំរុញឲ្យរដ្ឋាភិបាលម៉ាឡេស៊ីបង្កើនការចំណាយនៃថ្លៃរស់នៅ ៥០០ រីងហ្គីត ឬច្រើនជាងនេះ ទៅឲ្យនិយោជិកក្នុងវិស័យឯកជន និងបង្កើនអាយុចូលនិវត្តន៍ពី៦០ ឆ្នាំរហូតដល់៦៥ឆ្នាំ។
ប្រាប់ទីភ្នាក់ងារព័ត៌មានម៉ាឡេស៊ី Bernama លោករដ្ឋមន្ត្រីធនធានមនុស្ស អ៊ឹម គូឡាស៊ីហ្គារ៉ាន់ បានលើកឡើងថា យើងបានផ្តល់យោបល់ និងបានបញ្ជូនសំណើរបង្កើនអាយុចូលនិវត្តន៍រួចហើយទៅឲ្យក្រសួងហិរញ្ញវត្ថុ។ ជាពិសេស យើងប្រហែលជានឹងមានជំនួបពិភាក្សាអំពីរឿងនេះ។
លោក គូឡាស៊ីហ្គារ៉ាន់ (M Kulasegaran) បានអះអាងទៀតថា ម៉ាឡេស៊ីខ្វះកម្លាំងពលកម្ម តែមិនខ្វះឪកាសការងារឡើយ ខណៈបានជួលពលករបរទេសជាច្រើន ដោយសារប្រទេសមិនមានកម្លាំងពលកម្មគ្រប់គ្រាន់»។ ជាការពិត ប្រសិនបើសំណើរបង្កើនអាយុចូលនិវត្តន៍អាចត្រូវបានសភាអនុម័តមែននោះ វាជាការសម្រាប់ប្រទេសម៉ាឡេស៊ីនាពេលអនាគត។
យ៉ាងណាមិញ លោករដ្ឋមន្ត្រីរូបនេះ បានទទួលស្គាល់ផងដែរថា ប្រជាជនអត់ការងារធ្វើ ភាគច្រើនគឺជានិស្សិតទើបតែបញ្ចប់ការសិក្សា ហើយលោកបានជំរុញឲ្យយុវជនចូលរួមកម្មវិធីហ្វឹកហ្វឺនជំនាញបច្ចេកទេស និងការងារឲ្យបានច្រើន ទើបពួកគេអាចបង្កើននូវឪកាសការងារបាន។
សូមបញ្ជាក់ថា ការស្នើរសុំបង្កើនអាយុចូលនិវត្តន៍របស់ប្រជាជនម៉ាឡេស៊ី គឺដើម្បីឲ្យប្រជាជនមួយចំនួនអាចសន្សំលុយបានច្រើនសម្រាប់ចូលនិវត្តន៍ ទុកឪកាសឲ្យអ្នកមានសមត្ថភាពគ្រប់គ្រងស្ថាប័នបានយូរក្នុងគោលបំណងឲ្យមានដំណើរការល្អ។ សិង្ហបុរីដែលជាអ្នកជិតខាងម៉ាឡេស៊ី និងប្រទេសលោកខាងលិចជាច្រើន សុទ្ធតែបាន ឬមានផែនការពន្យារអាយុចូលនិវត្តន៍នេះដើម្បីបំពេញកម្លាំងពលកម្ម៕
Tag:
ម៉ាឡេស៊ី
© រក្សាសិទ្ធិដោយ thmeythmey.com
