លីគកីឡាបាល់ទាត់កំពូលទាំង៥នៅអ៊ឺរ៉ុបបានចំណាយប្រាក់សរុបចំនួន ៥ពាន់លានផោន (៦,០៧លានដុល្លារអាមេរិក) អំឡុងទីផ្សារដោះដូរកីឡាករលើកទី១ ក្នុងរដូវកាល២០១៩-២០ ដែលកើនឡើង ៩៧២លានដុល្លារលើកំណត់ត្រាកាលពីឆ្នាំមុន។
បើយោងតាមរបាយការណ៍របស់ក្រុមហ៊ុន Deloitte ក្លិបនៅ Premier League បានចំណាយលើសគេក្នុងចំនួនទឹកប្រាក់ ១,៤១ ពាន់លានផោន (១,៧១ពាន់លានដុល្លារអាមេរិក) បើទោះទ្វារផ្សារដោះដូរកីឡាករបិទមុនគេតាំងពីថ្ងៃទី៨ ខែសីហា។
La Liga លីគកំពូលអេស្ប៉ាញ ស្ថិតក្នុងចំណាត់ថ្នាក់ទី២ តាមរយៈការចំណាយដ៏ច្រើនមិនធ្លាប់មានក្នុងរង្វង់ទឹកប្រាក់ ១,៥១លានដុល្លារអាមេរិកក្នុងឆ្នាំ ២០១៩នេះ ដែលកើនទ្វេដងកាលពីឆ្នាំ ២០១៧។
ការចំណាយដ៏ច្រើនមិនធ្លាប់មាននេះ ដ្បិតក្លិបនៅ La Liga បានទិញដូរកីឡាករថ្លៃៗជាច្រើនដូចការផ្ទេរខ្សែប្រយុទ្ធ Antoine Griezmann ពី Atletico Madrid ទៅ Barcelona ក្នុងតម្លៃ ១៣១លានដុល្លារ, Joao Felix ពី Benfica ទៅ AT-Madrid ក្នុងតម្លៃ ១៣៧លានដុល្លារ និង Eden Hazard ផ្ទេរពី Chelsea ទៅ Real Madrid តម្លៃ ១០៩លានដុល្លារ។
Serie A របស់អ៊ីតាលី Bundesliga របស់អាល្លឺម៉ង់ និងលីគកំពូលបារាំង Ligue 1 សុទ្ធតែបានបង្កើតកំណត់ត្រាថ្មីក្នុងការចំណាយលើការទិញកីឡាករនៅរដូវកាលនេះដូចគ្នា។
ស្ថិតក្នុងលេខរៀងទី៣ក្នុងនាមលីគដែលចំណាយច្រើន Serie A បានចំណាយលើសពី១ពាន់លានដុល្លារដ៏គួរឲ្យភ្ញាក់ផ្អើល ពោលគឺ ១,២៩ពាន់លានដុល្លារ ដោយក្នុងនោះ Inter Milan ជាក្លិបទិញកីឡាករថ្លៃជាងគេក្នុងចំណោមក្លិបទាំង២០នៅអ៊ីតាលី តាមរយៈការនាំចូលខ្សែប្រយុទ្ធ Romelu Lukaku ពី Manchester United តម្លៃ៩០លានដុល្លារ។
ក្លិបនៅ Bundesliga ឈរចំណាយថ្នាក់ទី៤ ក្រោយចំណាយអស់ ៨១៤លានដុល្លារលើការផ្ទេរកីឡាកររដូវកាលនេះ ខណៈម្ចាស់ជើងឯក Bayern Munich ទិញចូលកីឡាករថ្លៃជាងគេ គឺខ្សែការពារ Lucas Hernandez ពី AT-Madrid តម្លៃ៨២លានដុល្លារ។
Ligue 1 ស្ថិតនៅចុងក្រោយគេក្នុងចំណោមលីគទាំង៥ ដោយចំណាយអស់ ៧៣៥លានដុល្លារអាមេរិក។ ការទិញចូលខ្សែប្រយុទ្ធ Wissam Ben Yedder ពី Sevilla ក្នុងតម្លៃ ៤៤លានដុល្លារ បាននាំឲ្យ Monaco ក្លាយជាក្លិបនៅបារាំងដែលទិញកីឡការថ្លៃជាងគេក្នុងអំឡុងទីផ្សារទិញដូរលើក១រដូវកាលនេះ។
សូមបញ្ជាក់ថាក្រៅពីលីគនៅអង់គ្លេស លីគទាំងអស់នៅអឺរ៉ុបបិទទ្វារដោះដូរកីឡាករនៅយប់ថ្ងៃទី២ ខែកញ្ញា៕