អតីតអធិរាជប៉ុនក៏ចង់បង្ហាញវិប្បដិសារីចំពោះទង្វើជប៉ុនពេលសង្គ្រាមផងដែរ តែនាយករដ្ឋមន្ត្រីហាម

អន្តរជាតិ

អតីតអធិរាជប៉ុនក៏ចង់បង្ហាញវិប្បដិសារីចំពោះទង្វើជប៉ុនពេលសង្គ្រាមផងដែរ តែនាយករដ្ឋមន្ត្រីហាម

29, Sep 2019 , 1:59 pm

រូបភាព

អធិរាជជប៉ុន Hirohito ថតនៅឯព្រះបរមរាជវាំងជប៉ុន ក្នុងទីក្រុង តូក្យូ កាលពីខែវិច្ឆិកា ឆ្នាំ១៩៨៧ (AFP)

ដោយ:

អធិរាជសម័យសង្គ្រាមជប៉ុន Hirohito ធ្លាប់មានព្រះរាជបំណងសម្តែងការសោកស្តាយ និងវិប្បដិសារីរបស់ទ្រង់ភ្លាមៗ ក្រោយពីសង្គ្រាមលោកលើកទី២បានបិទបញ្ចប់ ។ យ៉ាងណាមិញ គម្រោងនេះ ត្រូវបដិសេធដោយនាយករដ្ឋមន្ត្រីជប៉ុន សម័យនោះ។

សៀវភៅកម្រាស់១៨ទំព័រមួយក្បាល ដែលចងក្រងឡើងដោយ Michiji Tajima មន្ត្រីជាន់ខ្ពស់ប្រចាំរាជវាំងជប៉ុន បានកត់ត្រាពីការសន្ទនារវាងលោក និងព្រះអង្គ Hirohito ចន្លោះឆ្នាំ ១៩៤៩ និង ១៩៥៣។

យោងតាមឯកសារ ដែលបានដកស្រង់មកចុះផ្សាយដោយទីភ្នាក់ងារព័ត៌មានជប៉ុន Kyodo អធិរាជអង្គនេះ មានព្រះរាជបន្ទូលក្នុងឆ្នាំ១៩៥២ថា ទោះមានបញ្ហាអ្វី ព្រះអង្គគិតច្បាស់ថា ព្រះអង្គគួរដាក់បញ្ចូលពាក្យ «វិប្បដិសារី» ក្នុងព្រះរាជសន្ទរកថាដែលរៀបចំទុកដើម្បីប្រារព្ធពិធីទទួលបានឯករាជ្យជាថ្មីរបស់ជប៉ុនក្នុងឆ្នាំនោះ។ សម្រាប់ព្រះអង្គផ្ទាល់ ព្រះអង្គមានវិប្បដិសារីយ៉ាងធំធេង ហើយទ្រង់មានព្រះរាជបំណងបន្ថែមឃ្លាមួយថា «ឆ្លុះបញ្ចាំងពីអតីតកាល និងគោលវិន័យផ្ទាល់ខ្លួនសម្រាប់អនាគត» ។

យ៉ាងណាមិញ នាយករដ្ឋមន្ត្រីជប៉ុនសម័យនោះ គឺលោក Shigeru Yoshida បានប្រឆាំងនឹងព្រះរាជបំណងរបស់ព្រះអង្គ Hirohito ដោយប្រាប់ទៅកាន់លោកមន្ត្រី Tajima ថា នេះជារឿងគ្រោះថ្នាក់មួយ ព្រោះថាប្រជាជន នឹងនិយាយថា ព្រះអង្គ Hirohito ជាអ្នកទទួលខុសត្រូវសម្រាប់ការបង្កាត់ភ្លើងសង្គ្រាមនេះឡើង។ ចុងក្រោយ ពាក្យថា «សោកស្តាយ» និង «វិប្បដិសារី» ត្រូវបានលុបចោលពីព្រះរាជសន្ទរកថាដើម្បីប្រារព្ធពិធីសន្ធិសញ្ញាសន្តិភាព San Francisco ឆ្នាំ១៩៥១ របស់ព្រះអង្គ Hirohito ។

ព្រះអង្គ Hirohito ដែលសោយទិវង្គតក្នុងឆ្នាំ ១៩៨៩ គឺជាព្រះអយ្យកោរបស់អធិរាជជប៉ុនបច្ចុប្បន្ន ព្រះអង្គ Naruhito ។ ព្រះអង្គ Naruhito បានឡើងសោយរាជ្យក្នុងខែឧសភាពីព្រះបិតាទ្រង់ ព្រះអង្គ Akihito ដែលជាអធិរាជជប៉ុនទីមួយបានប្រកាសដាក់រាជ្យក្នុងរយៈពេលជាង២សតវត្សរ៍ចុងក្រោយនេះ។

ឲ្យពិតទៅ អធិរាជជប៉ុន ព្រះអង្គ Hirohito ធ្លាប់ត្រូវបានគេគោរពដ៏ខ្ពង់ខ្ពស់ជាព្រះរស់ ហើយទ្រង់ក៏ធ្លាប់កាន់ព្រះរាជតួនាទីជាមេបញ្ជាការកងទ័ពជប៉ុន អំឡុងពេលប្រើកម្លាំងយោធាឈ្លានពាននៅពាសពេញតំបន់អាស៊ី ក្នុងទសវត្សរ៍ឆ្នាំ ១៩៣០ និង ១៩៤០ ផងដែរ។

ប៉ុន្មានថ្ងៃក្រោយពីសហរដ្ឋអាមេរិក ទម្លាក់គ្រាប់បែកបរិមាណូចំនួន ២គ្រាប់លើទីក្រុង Hiroshima និង Nagasaki ព្រះរាជសន្ទរកថាសុំចុះចាញ់សង្គ្រាមរបស់ព្រះអង្គ Hirohito ត្រូវបានចាក់ផ្សាយលើវិទ្យុ កាលពីថ្ងៃទី ១៥ ខែសីហា ឆ្នាំ១៩៤៥ ។ ការទទួលខុសត្រូវរបស់អធិរាជ Hirohito សម្រាប់ការដឹកនាំសង្គ្រាមនេះ នៅតែជាចំណុចតស៊ូមតិរវាងអ្នកជំនាញមួយចំនួន ជាពិសេសមកពីសហរដ្ឋអាមេរិក។ ពួកគេ លើកឡើងថា ព្រះអង្គ Hirohito ពុំមែនជាអាយ៉ងនៃក្រុមយោធានោះទេ ប៉ុន្តែទ្រង់ជាមេបញ្ជាការដ៏សកម្ម ដែលបានគេចផុតចំពោះមុខអំពើយុត្តិធម៌ ដោយមានការសមគំនិតជាមួយសហរដ្ឋអាមេរិក។

ទោះមកដល់សព្វថ្ងៃនេះ សំណួរពាក់ព័ន្ធពី «វិប្បដិសារី» ជុំវិញបញ្ហាសង្គ្រាម នៅតែជារឿងរសើបក្នុងប្រទេសជប៉ុន ។ អ្វីដែលគួរឲ្យភ្ញាក់ផ្អើលនោះ អធិរាជជប៉ុនបច្ចុប្បន្ន ព្រះអង្គ Naruhito បានមានព្រះបន្ទូលពីវិប្បដិសារីយ៉ាងជ្រាលជ្រៅរបស់ទ្រង់ចំពោះអតីតកាលសម័យសង្គ្រាមរបស់ប្រទេសជប៉ុន។ នេះគឺជាព្រះរាជសន្ទរកថាទីមួយបង្អស់របស់ព្រះអង្គ ដើម្បីរម្លឹកដល់ការបញ្ចប់សង្គ្រាមលោកលើកទីពីរ ចាប់តាំងពីឡើងសោយរាជ្យមក៕