អន្តរជាតិ
«Joker» ឈ្នះពានរង្វាន់កំពូលនៅ Venice ជាភាពយន្តល្អដាច់គេប្រចាំឆ្នាំ២០១៩ លោក Phoenix (ឆ្វេង) និងលោក Phillips អំឡុងពេលទទួលពានរង្វាន់ Golden Lion នៅព្រឹត្តិការណ៍ Venice Film (AFP)
× រឿង «Joker» ដែលមានលោក Todd Phillips ជាអ្នកដឹកនាំ ឈ្នះពានរង្វាន់ «តោមាស» (Golden Lion) ជាភាពយន្តល្អដាច់គេ នៅព្រឹត្តិការណ៍ Venice Film លើកទី៧៤ ក្នុងប្រទេស អ៊ីតាលី កាលពីសៅរ៍ ទី៧ កញ្ញា។ នេះជាភាពយន្តដែលដកស្រង់ពីសៀវភៅរូបត្លុកទីមួួយ ដែលឈ្នះពានរង្វាន់កំពូលនេះ ហើយអាចឈានទៅចាប់ពានរង្វាន់ Oscar បន្ត។
សម្តែងជាតួ Joker ដោយតារាសម្តែងអាមេរិក Joaquin Phoenix ភាពយន្តនេះ រៀបរាប់ពីដើមកំណើតរបស់តួចិត្តអាក្រក់ដ៏មានឥទ្ធិពលក្នុងចក្រវាល បុរសប្រចៀវ (Batman)។ រឿងនេះ បានកើតឡើងក្នុងដើមទសវត្សរ៍ឆ្នាំ៨០ក្នុងទីក្រុង Gotham ។ កាលនោះ Arthur Fleck ជាតារាកំប្លែងបរាជ័យម្នាក់ (Stand-up) ដែលនឹងវិវត្តខ្លួនទៅជា Joker ឬស្គាល់ម្យ៉ាងទៀតថា «ទាយាទឧក្រិដ្ឋកម្មប្រចាំក្រុង Gotham »។
ការក្លាយខ្លួនជាមនុស្សចិត្តអាក្រក់បែបនេះ គឺព្រោះតែលោករងការធ្វើបាបទាំងផ្លូវកាយនិងផ្លូវចិត្ត ពីសំណាក់មនុស្សជុំវិញខ្លួន ខណៈតែងខ្លួនជាមនុស្សត្លុក (Clown) សម្តែងតាមផ្លូវនៃទីក្រុងនេះ ។ វគ្គបន្តបន្ទាប់ Joker នឹងក្លាយជាសត្រូវស៊ីសាច់ហូតឈាមនឹង បុរសប្រចៀវ ឬ អ្នកប្រយុទ្ធពេលរាត្រី (Dark Knight) ដែលអុកឡុកយ៉ាងកក្រើកក្នុងទីក្រុងនេះ។
យោងតាមការចុះផ្សាយរបស់វេបសាយ Hollywood Reporter អំឡុងសន្ទុរកថាទទួលពានរង្វាន់កំពូលនេះ លោក Phillips បាននិយាយអរគុណដល់ក្រុមហ៊ុនផលិតភាពយន្ត Warner Bros. និង DC ដែលជឿជាក់លោកក្នុងការដឹកនាំរឿងមួយនេះ។ លោក ក៏អរគុណដល់តារាសម្តែង Phoenix ដែលឈរក្បែរលោកលើឆាក។
ភាពយន្តនេះពុំអាចកើតឡើងឡើយ ប្រសិនបើគ្មានវត្តមានរបស់លោក Joaquin Phoenix ។ លោក Phillips លើកឡើងបែបនេះ ដោយសរសើរលោក Joaquin ថាជាតារាសម្តែងដែលមានទេពកោសល្យដ៏អស្ចារ្យបំផុត។ លោកបានប្រើគុណនាមបី ដើម្បីពណ៌នាតារាសម្តែងរូបនេះ៖ បើកទូលាយទទួលគំនិតអ្នកដទៃ, មុតស្រួល និងក្លាហានបំផុត។ តាមប្រភពមួយចំនួន តារាសម្តែង Phoenix ត្រូវសម្រកទម្ងន់២៣គីឡូក្រាមដើម្បីដើរតួ Joker ក្នុងរឿងនេះ។
សូមបញ្ជាក់ថា «Golden Lion» គឺជាពានរង្វាន់ខ្ពស់បំផុតដែលផ្តល់ឲ្យសម្រាប់ភាពយន្តល្អដាច់គេ នៅព្រឹត្តិការណ៍ Film Festival ដែលរៀបចំឡើងនៅទីក្រុង Venice នៃប្រទេសអ៊ីតាលី។ ពានរង្វាន់នេះ បង្កើតឡើងជាលើកដំបូង ក្នុងឆ្នាំ ១៩៤៩ ហើយបច្ចុប្បន្នចាត់ទុកជាពានរង្វាន់លំដាប់កំពូលមួយក្នុងឧស្សាហកម្មភាពយន្ត៕
© រក្សាសិទ្ធិដោយ thmeythmey.com