FIFA
កីឡាជាតិ
ជាតិ
ទោះចាញ់បារ៉ែន តែកម្ពុជាជាប់កំណត់ត្រា មានអ្នកទស្សនាច្រើនជាងគេ
× ជំនួបរវាងក្រុមជម្រើសជាតិកម្ពុជាជាមួយបារ៉ែន នាវគ្គជម្រុះ World Cup 2022 នៅពហុកីឡដ្ឋានជាតិ កាលពីល្ងាចថ្ងៃទី១០ កញ្ញា បានធ្វើឲ្យកម្ពុជា ជាប់កំណត់ត្រាមានអ្នកទស្សនាការប្រកួតផ្ទាល់ច្រើនជាងគេ។ ចំណែកជំនួបរវាងម៉ាឡេស៊ីជាមួយអេមីរ៉ាតអារ៉ាប់រួម និងតួកម៉េនីស្ថានជាមួយកូរ៉េខាងត្បូងឈរពីក្រោយ។
ដ្បិតក្រុមជម្រើសជាតិកម្ពុជាចាញ់ក្រុមបារ៉ែន ១-០ នាវគ្គជម្រុះ World Cup 2022 ជុំទី២ក្តី ប៉ុន្តែការប្រកួតនេះ បានទាក់ទាញអ្នកគាំទ្រចំនួន៤៥,០០០នាក់ ឲ្យមកទស្សនាការប្រកួតផ្ទាល់នៅពហុកីឡដ្ឋានជាតិ។ ចំនួនអ្នកគាំទ្រនេះ ជួយឲ្យកម្ពុជាជាប់កំណត់ត្រាមានអ្នកទស្សនាការប្រកួតបាល់ទាត់ច្រើនជាងគេក្នុងចំណោមប្រទេសធ្វើម្ចាស់ផ្ទះទាំង១៨។
សម្រាប់ជំនួបក្រុមម្ចាស់ផ្ទះម៉ាឡេស៊ីចាញ់អេមីរ៉ាតអារ៉ាប់រួម ២-១ ជាប់ចំណាត់ថ្នាក់លេខ២ ដោយមានអ្នកទស្សនា ៤៣,២០០នាក់ នៅកីឡដ្ឋាន Bukit Jalil National Stadium ក្នុងទីក្រុងកូឡាឡាំពួ ប្រទេសម៉ាឡេស៊ី។ ចំណែកការប្រកួត ដែលភ្ញៀវកូរ៉េខាងត្បូងយកឈ្នះតួកម៉េនីស្ថាន ២-០ វិញ ក៏មានអ្នកទស្សនាច្រើនលំដាប់ទី៣ដែរ ក្រោយទាក់ទាញអ្នកគាំទ្របានចំនួន២៦,០០០នាក់។
ទោះបីក្រុមជម្រើសជាតិកម្ពុជាចាញ់បារ៉ែនក៏ដោយ តែក្រុមដែលស្ថិតក្រោមការដឹកនាំអ្នកចាត់ការទូទៅលោក Keisuke Honda និងមានលោក Felix Dalmas ជាគ្រូបង្វឹកទទួលបានការគាំទ្រ និងកោតសរសើរយ៉ាងខ្លាំងពីប្រជាពលរដ្ឋកម្ពុជា។ ទាំងអ្នកគាំទ្រ ដែលបានទស្សនាផ្ទាល់នៅពហុកីឡដ្ឋានជាតិ និងនៅគេហដ្ឋាន សុទ្ធតែបានកោតសរសើរលើការដឹកនាំ ការរៀបចំប្រព័ន្ធ និងទម្រង់លេងរបស់កីឡាករថា «ធ្វើបានល្អ»ក្នុងជំនួបមួយនេះ។
គួររំលឹកថា នាជំនួបបើកឆាកស្មើ ១-១ ជាមួយហុងកុងកាលពីថ្ងៃទី៥ កញ្ញា កម្ពុជាជាប់ជាប្រទេសម្ចាស់ផ្ទះមានអ្នកទស្សនាបាល់ទាត់ច្រើនលំដាប់ទី២ ជាមួយចំនួនអ្នកគាំទ្រ៤៥,៥០០នាក់ ខណៈជំនួបម្ចាស់ផ្ទះឥណ្ឌូណេស៊ី ចាញ់ម៉ាឡេស៊ី ៣-២ មានអ្នកទស្សនាច្រើនលំដាប់ទី១ ក្រោយទាក់ទាញអ្នកគាំទ្របានចំនួន៥៤,៦៥៩នាក់។ ក្នុងជំនួបរវាងម៉ាឡេស៊ី និងឥណ្ឌូណេស៊ី នេះ ក៏មានការប៉ះទង្កិចគ្នារវាងអ្នកគាំទ្រក្រុមទាំងពីរ រហូតសហព័ន្ធកីឡាបាល់ទាត់ម៉ាឡេស៊ីដាក់ពាក្យដណ្តឹង ទៅសហព័ន្ធកីឡាបាល់ទាត់ពិភពលោកទៀតផង។
ក្រុមអ្នកគាំទ្រលើកទង់ជាតិកម្ពុជា និងជប៉ុន ពេលទស្សនាការប្រកួតរវាងក្រុមកម្ពុជានិងបារ៉ែន
ខាងក្រោមនេះជាលទ្ធផល និងចំនួនអ្នកគាំទ្រតាមពូលនីមួយៗ
ពូល A៖
- ហ្គាម ១-៤ ហ្វីលីពីន មានអ្នកទស្សនាផ្ទាល់ ១,០៩៦នាក់
- ម៉ាល់ឌីវ ០-៥ ចិន មានអ្នកទស្សនាផ្ទាល់ ៣,៧០០នាក់
ពូល B៖
- ឆាយនីសតៃប៉ិ ០-២ ណេប៉ាល់ មានអ្នកទស្សនាផ្ទាល់ ៤,៧៨០នាក់
- គូវែត ០-៣ អូស្ត្រាលី មានអ្នកទស្សនាផ្ទាល់ ១១,៨៥២នាក់
ពូល C៖
- កម្ពុជា ០-១ បារ៉ែន មានអ្នកទស្សនាផ្ទាល់ ៤៥,០០០នាក់
- ហុងកុង ០-២ អ៊ីរ៉ង់ មានអ្នកទស្សនាផ្ទាល់ ១៣,៩៤២នាក់
ពូល D៖
- សិង្ហបុរី ២-១ ប៉ាឡេស្ទីន មានអ្នកទស្សនាផ្ទាល់ ៦,០១១នាក់
- យេម៉ែន ២-២ អារ៉ាប៊ីសាអូឌីត មានអ្នកទស្សនាផ្ទាល់ ៣,១០០នាក់
ពូល E៖
- អាហ្វហ្គានីស្ថាន ១-០ បង់ក្លាដែស មានអ្នកទស្សនាផ្ទាល់ ៥,០០០នាក់
- ហ្គាតា ០-០ ឥណ្ឌា មានអ្នកទស្សនាផ្ទាល់ ១២,០២០នាក់
ពូល F៖
- ម៉ុងហ្គោលី ០-១ តាហ្សីគីស្ថាន មានអ្នកទស្សនាផ្ទាល់ ៣,៤៥៥នាក់
- មីយ៉ាន់ម៉ា ០-២ ជប៉ុន មានអ្នកទស្សនាផ្ទាល់ ២៥,៥០០នាក់
ពូល G៖
- ឥណ្ឌូណេស៊ី ០-៣ ថៃ មានអ្នកទស្សនាផ្ទាល់ ១១,៦១៩នាក់
- ម៉ាឡេស៊ី ១-២ អេមីរ៉ាតអារ៉ាប់រួម មានអ្នកទស្សនាផ្ទាល់ ៤៣,២០០នាក់
ពូល H៖
- តួកមេនីស្ថាន ០-២ កូរ៉េខាងត្បូង មានអ្នកទស្សនាផ្ទាល់ ២៦,០០០នាក់
- ស្រីលង្កា ០-១ កូរ៉េខាងជើង មានអ្នកទស្សនាផ្ទាល់ ១,២៥៨នាក់៕
Tag:
ក្រុមជម្រើសជាតិកម្ពុជា
World Cup
បារ៉ែន
© រក្សាសិទ្ធិដោយ thmeythmey.com