អន្តរជាតិ
លោក លី សៀនឡុង នឹងផ្តល់សក្ខីកម្ម បើបណ្តឹងប្រឆាំងអ្នកកាសែតម្នាក់ឡើងដល់តុលាការមែន លោកនាយករដ្ឋមន្ត្រីសិង្ហបុរី លី សៀនឡុង (ឆ្វេង) និងកវីនិពន្ធនៃវេបសាយព័ត៌មាន (TOC) លោក Terry Xu
× នាយករដ្ឋមន្ត្រីសិង្ហបុរី លោក លី សៀនឡុង នឹងទៅផ្តល់សក្ខីកម្មនៅមុខតុលាការ ប្រសិនបើបណ្តឹងមួលបង្កាច់ប្រឆាំងការីនិពន្ធនៃវេបសាយព័ត៌មាន The Online Citizen (TOC) លោក Terry Xu បើកសវនាការ។ លេខាធិការផ្នែកព័ត៌មានរបស់លោក លី បញ្ជាក់ឲ្យដឹងបែបនេះក្នុងសេចក្តីថ្លែងការណ៍មួយ នៅយប់ថ្ងៃអង្គារ ទី១០ កញ្ញា ។
លោកនាយករដ្ឋមន្ត្រី លី បានដាក់ពាក្យបណ្តឹងប្រឆាំងលោកកវីនិពន្ធនៃវេបសាយព័ត៌មាន TOC លោក Xu Yuanchen ដែលស្គាល់ថា Terry Xu សម្រាប់ការបង្កូចកេរ្តិ៍ឈ្មោះ តាមរយៈអត្ថបទមួយ ដែលបានចុះផ្សាយកាលពីខែមុន។ អត្ថបទនេះ បាននិយាយពីការចោទប្រកាន់ដោយខ្វះភស្តុតាងរបស់បងប្អូនលោកលីជុំវិញទំនាស់ក្នុងគ្រួសារក្នុងសំណុំរឿងផ្ទះ Oxley Road ដែលជាកម្មសិទ្ធិរបស់ លោក លី ក្វាន់យូ។
លេខាធិការផ្នែកព័ត៌មាន លោកស្រី Chang Li Lin បញ្ជាក់ក្នុងសេចក្តីថ្លែងការណ៍ថា លោក លី ដាក់ពាក្យបណ្តឹងនេះ ព្រោះតែការចោទប្រកាន់នេះ គឺមិនពិតទាំងស្រុង។
តាមការចុះផ្សាយរបស់ទូរទស្សន៍សិង្ហបុរី Channel News Asia លោកស្រី Chang បន្តថា ប្រសិនបើតុលាការបើកសវនាការលើសំណុំរឿងនេះ លោកនាយករដ្ឋមន្ត្រី លី សៀនឡុង នឹងទៅផ្តល់សក្ខីកម្មនៅមុខតុលាការ។ បងប្អូនលោក អាចពិចារណា រួមគ្នានឹងលោក Xu ថាតើពួកគេក៏នឹងផ្តល់សក្ខីកម្មដែរ ហើយចោទប្រកាន់ម្តងទៀតនៅក្នុងតុលាការ។ បន្ទាប់មក តុលាការ អាចដឹងការពិតមិនខាន។
រឿងរ៉ាវនេះ កើតឡើងបន្ទាប់ពីអត្ថបទមួយ ចំណងជើង «ភរិយាលោកលី Ho Ching ចែករំលែកអត្ថបទបង្ហាញពីការកាត់ផ្តាច់ចំណងទាក់ទងជាមួយសមាជិកគ្រួសារ» រៀបរាប់ពីលំដាប់ព្រឹត្តិការណ៍ពាក់ព័ន្ធជម្លោះរវាងលោកនាយករដ្ឋមន្ត្រី លី និងប្អូនស្រីលោក គឺលោកស្រី Lee Wei Ling ជុំវិញរឿងផ្ទះរបស់ឪពុកអ្នកទាំងពីរនៅ 38 Oxley Road ។
ក្រោយពីទទួលបានលិខិតស្នើឲ្យលុបចោលអត្ថបទនេះនិងការបង្ហោះលើបណ្តាញសង្គមហ្វេសប៊ុក លោក Xu បានសម្រេចលុបចោលអត្ថបទនេះ កាលពីថ្ងៃទី១ កញ្ញា ប៉ុន្តែបានចុះផ្សាយជាថ្មី ៣ថ្ងៃក្រោយមកទៀត។ ទាក់ទិនជំហរនេះ លោក Xu បកស្រាយថា លោកយល់ឃើញថា អត្ថបទនេះ ពុំមែនជាមួលបង្កាច់អ្វីឡើយ។ ទោះជាបែបនេះក្តី មេធាវីលោក លី សៀនឡុង បានចេញមុខអះអាងថា អត្ថបទនេះបានប៉ះពាល់ធ្ងន់ធ្ងរលើកេរ្តិ៍ឈ្មោះលោក លី ៕
Tag:
សិង្ហបុរី
លីសៀនឡុង
© រក្សាសិទ្ធិដោយ thmeythmey.com