សិស្ស៣ក្រុម នឹងនាំយកភាពយន្តរបស់ខ្លួនទៅប្រកួតផ្ដាច់ព្រ័ត្រ នៅជប៉ុន

ជាតិ

សិស្ស៣ក្រុម នឹងនាំយកភាពយន្តរបស់ខ្លួនទៅប្រកួតផ្ដាច់ព្រ័ត្រ នៅជប៉ុន

14, Sep 2019 , 7:19 pm

រូបភាព

រូបពីស្ថានទូតជប៉ុន

ដោយ: ប៉ូ សាគុន

ភ្នំពេញ៖ សិស្សវិទ្យាល័យចំនួន ៣ក្រុមដែលមានសមាជិក ៩រូប នឹងនាំយកភាពយន្តខ្លីរបស់ខ្លួន ទៅប្រកួតប្រជែងវគ្គផ្ដាច់ព្រ័ត្រនៅប្រទេសជប៉ុន ក្នុងមហោស្រពភាពយន្តកុមារអន្តរជាតិអាស៊ីឆ្នាំ២០១៩ បន្ទាប់ពីជាប់ជ័យលាភី នៅវគ្គពាក់កណ្ដាលផ្ដាច់ព្រ័ត្រ ក្នុងប្រទេសកម្ពុជា។

ការប្រកួតវគ្គពាក់កណ្ដាលផ្ដាច់ព្រ័ត្រ ក្នុងប្រទេសកម្ពុជាលើទី១១ នៃភាពយន្តកុមារអន្តរជាតិអាស៊ី (AICFF) នឹងត្រូវប្រារព្ធឡើងនៅថ្ងៃចន្ទ ទី១៦ ខែកញ្ញា ឆ្នាំ២០១៩ វេលាម៉ោង២:០០នាទីរសៀល នៅសាលអង្គរគីហ្សូណាមជ្ឈមណ្ឌលសហប្រតិបត្តិការកម្ពុជា-ជប៉ុន(CJCC)។ ការប្រ កួតវគ្គផ្ដាច់ព្រ័ត្រនេះរៀបចំដោយស្ថានទូតជប៉ុនប្រចាំកម្ពុជា រួមសហការជាមួយក្រសួងអប់រំយុវជននិងកីឡា និងមជ្ឈមណ្ឌលសហប្រតិបត្តិការកម្ពុជា-ជប៉ុន។

តើអ្នកយល់យ៉ាងណាចំពោះការបង្កបញ្ហាដល់អ្នកដទៃ? តើវាត្រឹមត្រូវទេ សម្រាប់តែផលប្រ យោជន៍ផ្ទាល់ខ្លួន? តើអ្នកអាចគិតដល់អ្នកដទៃផងបានដែរឬទេ? នេះគឺជាប្រធានបទសម្រាប់ប្រកួតប្រជែងឆ្នាំ២០១៩នេះ។

នៅវគ្គពាក់កណ្ដាលផ្ដាច់ព្រ័ត្រនេះ មានភាពយន្តខ្លី៣នាទី ចំនួន៦៩រឿង ផលិតឡើងដោយសិស្សមកពី៣៤វិទ្យាល័យ បានដាក់ពាក្យចូលរួមប្រកួត។ ហើយរឿងខ្លីចំនួន១៥រឿង ត្រូវបានជ្រើសរើសដើម្បីបញ្ចាំងក្នុងការប្រកួតប្រជែង។ ភាពយន្តល្អផ្ដាច់គេចំនួន៣រឿង ដែលជាប់ក្នុងវគ្គពាក់កណ្ដាលផ្ដាច់ព្រ័ត្រនេះ នឹងនាំយកទៅប្រកួតបន្តនៅក្នុងមហោស្រពភាពយន្តកុមារអន្តរជាតិអាស៊ីក្នុងចំណោមសិស្សវិទ្យាល័យនៃប្រទេសជប៉ុន និងបណ្ដាប្រទេសអាស៊ានទាំង១០ប្រទេស ព្រមទាំងប្រទេសចិន ម៉ុងហ្គោល កូរ៉េខាងត្បូង តៃវ៉ាន់ និងទីម័រខាងកើត។

សិស្សវិទ្យាល័យចំនួន៣ក្រុម មានសមាជិកសរុប៩រូប ដែលជាប់ជ័យលាភីក្នុងការប្រកួតវគ្គផ្ដាច់ព្រ័ត្រ នឹងត្រូវបានអញ្ជើញទៅប្រទេសជប៉ុនក្រោមកម្មវិធី JENESYS 2019 ដោយរដ្ឋាភិបាលជប៉ុន ដើម្បីចូលរួមវគ្គផ្ដាច់ព្រ័ត្ររបស់មហោស្រព នៅទីក្រុងមិណាមិ អាវ៉ាជិ ខេត្តហ៊ីយ៉ូហ្គោ ប្រទេសជប៉ុន នៅថ្ងៃទី៧ខែធ្នូឆ្នាំ២០១៩។

ស្ថានទូតជប៉ុនសង្ឃឹមថា តាមរយៈមហោស្រពនេះ មិត្តភាពនិងការយល់ដឹងពីគ្នាទៅវិញទៅមក នឹងត្រូវបានកសាងឡើងក្នុងចំណោមយុវជននៅតំបន់អាស៊ី៕