ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
ជាតិ
បទយកការណ៍ / បទសម្ភាសន៍
ក្រុមប្រតិបត្តិកររួមគ្នាបំផុសចលនាបរិស្ថាន «ទេសចរម្នាក់ដាំដើមឈើមួយដើម»
18, Sep 2019 ,
8:29 am
រូបភាព
×
ដោយ:
អុីសា រ៉ហានី (Isa Rohany)
សៀមរាប៖ ក្រៅពីទស្សនាប្រាង្គប្រាសាទហើយ ក្នុងនោះភ្ញៀវទេសចរដែលមកកម្សាន្តខេត្តសៀមរាបក៏អាចទិញកញ្ចប់ដើម្បីចូលរួមដាំកូនឈើក្នុងព្រៃគ្រញូងដែលមានការអភិរក្សថែមទៀត។ ក្នុងបំណងដើម្បីបរិស្ថាន ផ្នែកពាក់ព័ន្ធនានាបាននិងកំពុងជំរុញចលនាដាំកូនឈើឡើងវិញ ក្នុងនោះក្រុមប្រតិបត្តិករទេសចរណ៍ក្នុងខេត្តសៀមរាបក៏បានរួមគ្នាបំផុសចលនានេះដែរ ក្នុងនោះភ្ញៀវទេសចរអាចទិញកញ្ចប់ដើម្បីចូលរួមដាំកូនឈើ និងដើរកម្សាន្តក្នុងចម្កាព្រៃគ្រញូងដែលមានទំហំជាងមួយពាន់ហិកតាដែលត្រូវបានអភិរក្សយ៉ាងយកចិត្តទុកដាក់។
ព័ត៌មានលម្អិត សូមស្ដាប់បទយកការណ៍ដែលរៀបរៀងដោយអ្នកនាង អ៊ីសា រ៉ហានី ពីខេត្តសៀមរាប ដូចតទៅ៖
ចលនាដាំកូនឈើបានបង្កើតឡើងជាបន្តបន្ទាប់ ក្នុងគោលដៅរួម គឺដើម្បីបរិស្ថាន។ ចលនានេះមានស្ទើរគ្រប់តំបន់ ពិសេសកន្លែងដែលបាត់បង់គម្របព្រៃឈើតែម្ដង ហើយចលនានេះមានទាំងទ្រង់ទ្រាយតូចនិងទ្រង់ទ្រាយធំ។
ងាកមកខេត្តសៀមរាបវិញ ចលនានេះក៏ផុសផុលដែរ។ ក្រៅពីតំបន់ដែលអាជ្ញាធរជាតិអប្សរាប្រកាសពីគោលការណ៍ដាំកូនឈើលើផ្ទៃដីបាត់បង់ក្នុងមួយឆ្នាំប្រមាណ២ម៉ឺនដើមហើយនោះ ចលនានៅលើភ្នំគូលែនវិញក៏មិនអន់ដែរ។ មន្ទីរបរិស្ថានសហការជាមួយអាជ្ញាធរមូលដ្ឋាន អង្គការអភិវឌ្ឍន៍ពាក់ព័ន្ធ បានបង្កើតកម្មវិធីនិងអប់រំប្រជាពលរដ្ឋលើភ្នំគូលែន បំណងដើម្បីឱ្យយល់និងឈប់កាប់ទន្ទ្រានយកដីធ្វើចម្ការបន្តទៀត ព្រោះថាអាចប៉ះពាល់ដល់ប្រភពទឹកលើភ្នំនេះ។
ខាងរដ្ឋបាលព្រៃឈើនេះវិញ ក៏មានគោលដៅច្បាស់លាស់ក្នុងរឿងព្រៃឈើនេះដែរ។ ស្ថាប័ននេះមានចម្ការព្រៃឈើដ៏ធំមួយ និងមានការអភិរក្សដើមឈើកម្រនៅកម្ពុជា ដូចជាប្រភេទឈើគ្រញូងជាដើម។ ក្នុងនោះក៏បានសហការជាមួយមន្ទីរទេសចរណ៍រៀបចំសួនដាំដើមឈើទេសចរណ៍ ក្នុងគោលដៅបំផុសចលនាទេសចរម្នាក់ដាំដើមឈើមួយដើម ឬមនុស្សម្នាក់ដាំដើមឈើមួយដើម។
ប្រធានមន្ទីរបរិស្ថានខេត្តសៀមរាប លោក ង៉ូវ សេងកាក់ ក្នុងពិធីដាំកូនឈើនៅថ្ងៃទី១៥ កញ្ញា បានលើកឡើងថា មន្ទីរទេសចរណ៍ បានសហការជាមួយរដ្ឋបាលព្រៃឈើ បង្កើតឱ្យមានសួនទេសចរណ៍នៅឆ្នាំ២០១៥ និងបានដាំកូនឈើជាងមួយពាន់ដើមនៅថ្ងៃទី២៧ កញ្ញា ឆ្នាំ២០១៥ ដើម្បីអបអរទិវាទេសចរណ៍ពិភពលោកនៅពេលនោះ។ ក្រៅពីរីករាយចំពោះការលូតលាស់បានល្អនៃដើមឈើអនុស្សាវរីយ៍ដែលចូលរួមដាំពីតាមបណ្ដាសណ្ឋាគារ ប្រតិបត្តិករទេសចរនៅពេលនោះហើយ លោក សេងកាក់ ចាត់ទុកសួននេះជាគោលដៅថ្មីរបស់ភ្ញៀវទេសចរ ដែលពួកគេអាចចូលរួមដាំនិងគយគន់ចម្ការគ្រញូង ទស្សនាវាលស្រែចម្ការ ក៏ដូចជាផ្កែព្រៃមួយចំនួនផង។
លោកប្រធានមន្ទីរទេសចរណ៍បន្ថែម៖« តំបន់នេះមានភាពទាក់ទាញ ដោយសារជាគោលដៅទេសចរណ៍បែបលក្ខណៈផ្សងព្រេង មានវាលស្រែ ផ្កាចាហួយនារដូវវស្សា ដោយអាចបង្កើតកម្មវិធីជិះឡាន ជិះកង់ ទស្សនាវាលស្រែផ្កាចាហួយ...ចំពោះការរៀបចំសួនទេសចរណ៍នេះក្រសួងទេសចរណ៍បានចេញលិខិតបទដ្ឋានផ្សេងៗពាក់ព័ន្ធឱ្យមានការបង្កើតគ្រប់ខេត្តក្រុងត្រូវតែមានសួនទេសចរណ៍យ៉ាងហោច១ឬ២ ដូច្នេះទីតាំងនេះវាស័ក្ដិសមសម្រាប់ទេសចរចង់មកសៀមរាបហើយចូលរួមដាំកូនឈើ ហើយលើកក្រោយគាត់អាចមកមើលកូនឈើគាត់ដាំបាន»។
ក្នុងពិធីដាំកូនឈើនៅលើកនេះដែរ ក៏មានការចូលរួមពីក្រុមប្រតិបត្តិករជាងមួយពាន់នាក់ដូចលើកមុនដែរ ក្នុងបំណងបំផុសសារទៅដល់ពលរដ្ឋខ្មែរឱ្យយល់ដឹងពីការចូលរួមលើកកម្ពស់បញ្ហាបរិស្ថាននៅប្រទេសកម្ពុជា។ សម្រាប់លោក សេងកាក់ ពិធីនេះក៏ជាផ្នែកមួយដើម្បីចូលរួមអបអរទិវាទេសចរណ៍ពិភពលោក ២៧ កញ្ញា ដែលប្រធានបទនៅឆ្នាំនេះគឺ ទេសចរនិងការងារ ក្រោមពាក្យស្លោក អនាគតកាន់តែប្រសើរសម្រាប់ទាំងអស់គ្នា។ ជាមួយគ្នានោះ ប្រធានមន្ទីរទេសចរណ៍ក៏បានបង្ហាញការគាំទ្រការបង្កើតគោលដៅទេសចរណ៍ថ្មីៗបន្ថែម ក្នុងទិសដៅដើម្បីបំពេញតម្រូវការភ្ញៀវទេសចរពេលមកកម្សាន្តខេត្តសៀមរាបឱ្យមានគោលដៅទេសចរណ៍សម្បូរបែប ពិសេសគឺការបង្កើតកញ្ចប់ទេសចរណ៍ដាំកូនឈើនិងរក្សាដើមឈើទាំងនោះសម្រាប់អនុស្សាវរីយ៍ដល់ភ្ញៀវទេសចរនៅពេលអនាគត។
នាយខណ្ឌរដ្ឋបាលព្រៃឈើលោក ម៉ុង ប៊ុនលីម ដែលជាអ្នកញែកផ្លូវឱ្យមានសួនទេសចរណ៍ក្នុងភូមិសាស្ដ្រភូមិត្រពាំងថ្ម ឃុំឃុនរាម ស្រុកបន្ទាយស្រី ក្បែរចម្ការគ្រញូងអភិរក្សបានឱ្យដឹងថា ការបង្កើតព្រឹត្តិការណ៍នេះពិតជាមានសារសំខាន់ណាស់ក្នុងការរួមចំណែកលើកកម្ពស់បញ្ហាបរិស្ថាន និងជាសារពញាក់អារម្មណ៍ដល់ពលរដ្ឋខ្មែរឱ្យស្រឡាញ់ព្រៃឈើនិងត្រូវចូលរួមទាំងអស់គ្នា កុំឱ្យយល់ថាការងារនេះជាកិច្ចការផ្ដាច់មុខរបស់ស្ថាប័នណាមួយ។
ក្នុងបុព្វហេតុការស្ដារគម្របព្រៃឈើឡើងវិញនេះដែរ លោក ម៉ុង ប៊ុនលីម ពន្យល់ថាខណ្ឌរដ្ឋបាលព្រៃឈើរបស់លោកបានធ្វើការងារជាច្រើនក្នុងនោះទាំងការដាំខ្លួនឯង និងការចែកពូជឈើដល់ប្រជាពលរដ្ឋយកទៅដាំនៅកន្លែងផ្សេងៗ ក៏ដូចជាសម្រួលដល់ប្រជាពលរដ្ឋដែលមានដីទំនេរនិងចង់រៀបចំជាចម្ការដាំកូនឈើឡើងវិញជាដើម។ ក្នុងនោះដែរ ខណ្ឌរដ្ឋបាលព្រៃឈើមានចម្ការឈើប្រណិតដែលកំពុងអភិរក្សជាងមួយពាន់ហិកតា ដែលពេលនេះបានផ្តល់ផលជាវិជ្ជមានច្រើនដូចជាក្លាយជាគោលដៅទេសចរណ៍ថ្មីនិងដើមមេធំៗសម្រាប់ផ្តល់ពូជច្រើនដើម។ ទៅអនាគត នាយខណ្ឌរដ្ឋបាលព្រៃឈើរូបនេះ ចង់អភិវឌ្ឍន៍តំបន់នេះជាគោលដៅទេសចរណ៍ដ៏ទាក់ទាញមួយក្នុងខេត្តសៀមរាប និងជាកន្លែងសម្រាប់ដាំកូនឈើក៏ដូចជាសម្រាប់លំហែកាយថ្មីរបស់ភ្ញៀវទេសចរ។
សម្រាប់ភ្ញៀវទេសចរមានបំណងចង់ចូលរួមដាំកូនឈើនេះ ពួកគេអាចទិញកញ្ចប់ទាំងនេះតាមរយៈក្រុមហ៊ុនទេសចរណ៍នានា ដោយក្នុងនោះត្រូវបង់វិភាគទាន១៥ដុល្លារសម្រាប់ដើមឈើមួយដើម។ ត្រង់ចំណុចនេះ លោក ម៉ុង ប៊ុនលីម ពន្យល់ថា មិនមែនជាការទិញលក់អ្វីនោះទេ តែថវិកាទាំងនោះសម្រាប់ថែទាំកូនឈើ ឬជាថ្លៃសម្រាប់ជួលកម្មករថែរក្សាដូចជាកាត់ស្មៅ ដាក់ជី និងស្រោចទឹកជាដើម ដើម្បីធានាថាដើមឈើទាំងនោះមានជីវិតគង់វង្ស។
អ្នកគ្រប់គ្រងទូទៅនៃសណ្ឋាគារ សុខាល័យ លោក ឆាយ សិលា ក្នុងពិធីដាំកូនឈើនៅពេលនោះ បានថ្លែងទៅកាន់អ្នកចូលរួមដែលមកពីបណ្ដាសមាគមនិងក្លឹបប្រតិបត្តិករទេសចរណ៍ប្រមាណ២៥ស្ថាប័នក្នុងក្រុងសៀមរាប ដោយរីករាយនិងមានមោកភាពសម្រាប់ការរៀបចំពិធីនេះ។ លោកពន្យល់ថា គោលដៅនៃពិធីនេះ គឺចង់បង្ហាញពីការចូលរួម ការចែករំលែក និងការលះបង់ធនធានផ្ទាល់ខ្លួនសម្រាប់ការងារសង្គម និងបរិស្ថាន។
សិល្បករអ្នកនាង យុគ ចិន្ដា ក៏បានចូលរួមក្នុងពិធីដាំកូនឈើបំផុសចលនាទេសចរម្នាក់ដាំដើមឈើមួយដើមដែរ។ អ្នកនាងយល់ថាកម្មវិធីនេះល្អ និងគួររៀបចំធ្វើជារៀងរាល់ឆ្នាំ ដើម្បីរួមចំណែកលើកិច្ចការបរិស្ថាននៅកម្ពុជា។
បុគ្គលិកក្រុមហ៊ុនសណ្ឋាគារ Golden Temple ដែលបានចូលរួមជាមួយក្រុមការងារនៅពេលនោះដែរ បានចាត់ទុកការចូលរួមរបស់ខ្លួន ថាបានរួមចំណែកជួយសង្គមដ្បិតវាមិនធំក៏ដោយ។ កញ្ញា សុខលី ចង់ឱ្យការងារនេះ ជ្រោកជ្រាបដល់ស្មារតីយុវជនខ្មែរឱ្យយល់ដឹងនិងចូលរួមគិតគូរ ព្រោះថាបញ្ហាបរិស្ថាននិងការលើកកម្ពស់បរិស្ថានត្រូវការការចូលរួមពីប្រជាពលរដ្ឋគ្រប់រូប៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
ប្រតិបត្ដិករទេសចរណ៍សៀមរាប
ដាំដើមឈើ
គ្រញូង
បរិស្ថាន
រដ្ឋបាលព្រៃឈើ
© រក្សាសិទ្ធិដោយ thmeythmey.com
អត្ថបទពេញនិយម
នាយទាហាន ៨រូប ត្រូវបានព្រះមហាក្សត្រដំឡើងឋានន្តរស័ក្តិផ្កាយ៤
6 ថ្ងៃ
«មជ្ឈការ»មានន័យខុសពី«វិមជ្ឈការ»ដូចម្តេច?
4 ថ្ងៃ
អាចសរសេរបានថា «រួញរា» ឬ «រញ់រា» ប៉ុន្តែមិនមែន «រុញរា» ឡើយ
6 ថ្ងៃ
«ប្រេសិត»មានន័យដូចម្តេច?
5 ថ្ងៃ
គ្រឿងឥស្សរិយាភរណៈ គឺ «មេដាយ» មិនមែន «មេដៃ» ឡើយ
1 ថ្ងៃ
អត្ថបទពេញនិយមបន្ថែម