អន្តរជាតិ
នាយករដ្ឋមន្ត្រីម៉ាឡេស៊ី ភ្ជាប់វិបត្តិរ៉ូហ៊ីងយ៉ារបស់មីយ៉ាន់ម៉ាជាមួយរបបប្រល័យពូជសាសន៍របស់កម្ពុជា
× ប្រមុខដឹកនាំម៉ាឡេស៊ី លោកមហាធៀ មហាមេដ នៅតែបន្តឈឺឆ្អាលលើវិបត្តិជនភៀសខ្លួនរ៉ូហ៊ីងយ៉ារបស់មីយ៉ាន់ម៉ា។ ប្រមុខដឹកនាំប្រទេសរូបនេះ បានមើលឃើញថាបញ្ហានេះ ជាបញ្ហាមនុស្សជាតិដ៏ធ្ងន់ធ្ងរមួយ ដែលសហគមន៍អន្តរជាតិ មិនគួរបណ្តែតបណ្តោយ និងធ្វើឲ្យប្រវត្តិសាស្ត្រប្រល័យពូជាសាសន៍ជាន់ដានសារជាថ្មីទៀតឡើយ។
ឆ្លៀតឱកាសពីកិច្ចប្រជុំរបស់មហាសន្និបាតអង្គការសហប្រជាជាតិ ក្នុងសុន្ទរកថានៅសាកលវិទ្យាល័យ Columbia University លោកនាយករដ្ឋមន្ត្រី មហាធៀ មហាមេដ បានរំលេចយកបញ្ហាវិបត្តិជនភៀសខ្លួនរ៉ូហ៊ីងយ៉ារបស់មីយ៉ាន់ម៉ា ជាប្រធានបទជជែក និងដើម្បីទាញចំណាប់អារម្មណ៍មេដឹកនាំពិភពលោក ដែលត្រូវចូលរួមប្រជុំនៅទីនោះផងដែរ។
តាមការចុះផ្សាយរបស់សារព័ត៌មានម៉ាឡេស៊ី Malay Mail លោកនាយករដ្ឋមន្ត្រី បានរម្លឹកដល់ព្រឹត្តិការណ៍ដែលកើតលើទីប្រឹក្សារដ្ឋមីយ៉ាន់ម៉ា លោកស្រី អ៊ុងសាន ស៊ូជី មុនពេលលោកស្រី កាន់តំណែង ពោលគឺពេលដែលលោកស្រី ត្រូវឃុំខ្លួនក្នុងផ្ទះ ដោយសារសម្ពាធនយោបាយពីរដ្ឋាភិបាលយោធា។ លោកនាយករដ្ឋមន្ត្រី អះអាងថា រដ្ឋាភិបាលរបស់លោកពេលនោះ ក៏ជាអ្នកចូលរួមទាមទារ និងធ្វើឲ្យលោកស្រី រួចមានសេរីភាព។
បញ្ជាក់ពីការចូលរួមចំណែករួចហើយ លោកនាយករដ្ឋមន្ត្រី បានបង្ហាញការខកចិត្តចំពោះលោកស្រី ស៊ូជី ដែលធ្លាប់ជួបរឿងលំបាក ហើយពេលនេះ មានឱកាសដឹកនាំប្រទេស តែបែរជាមិនខ្នះខ្នែងក្នុងការជួយសង្គ្រោះដល់ជនភៀសខ្លួនរ៉ូហ៊ីងយ៉ាជាង៧០ម៉ឺននាក់ ដែលកំពុងតែរងទុក្ខលំបាក ដោយសារអសន្តិសុខនៅក្នុងប្រទេសមីយ៉ាន់ម៉ា។
លោកនាយករដ្ឋមន្ត្រី បានភ្ជាប់វិបត្តិជនភៀសខ្លួននេះទៅនឹងរបបប្រល័យពូជសាសន៍កម្ពុជាកាលពីជាងបួនទសវត្សរ៍មុនយ៉ាងដូច្នេះថា៖« អ្នកប្រហែលជាចងចាំហេតុការណ៍នៅកម្ពុជា រដ្ឋាភិបាល បានសម្លាប់ប្រជាជនពីរលាននាក់ ហើយពិភពលោក មិនជំទាស់ និងមិនធ្វើអ្វីសោះ រហូតទាល់ថា ប្រជាជនកម្ពុជាខ្លួន ផ្តួលរំលំរបបដឹកនាំប៉ុល ពត។
សម្រាប់ករណីមីយ៉ាន់ម៉ាវិញ មិនមាននរណាម្នាក់មានឆន្ទៈប្រឈមគ្រោះថ្នាក់ និងផ្តួលរំលំរដ្ឋាភិបាលនោះទេ។ នេះ ហាក់ដូចជាឃោរឃៅពេកហើយ។ ហើយពិភពលោកទាំងមូល ក៏មិនអាចធ្វើអ្វីបានដូចគ្នា។ ប្រសិនបើមីយ៉ាន់ម៉ា និយាយថា អ្នកមិនអាចចូលទៅក្នុងប្រទេសរបស់ខ្ញុំបានទេ នោះមានន័យថា មានអ្វីមិនប្រក្រតីកើតឡើងនៅទីនោះហើយ»។
លោកនាយករដ្ឋមន្ត្រី ក៏បានទាញឲ្យចាប់អារម្មណ៍ទាំងព្រឹត្តិការណ៍របស់អ៊ីរ៉ាក់ ដែលពេលនោះ លោក Saddam Hussein ត្រូវបានចោទប្រកាន់ថា បានសម្លាប់ប្រជាជន និងជាមេដឹកនាំផ្តាច់ការ ហើយចុងក្រោយសហរដ្ឋអាមេរិក បានផ្តួលរំលំលោកតែម្តង ដែលករណីនេះ ខុសពីមីយ៉ាន់ម៉ា ដែលគ្មានរណាម្នាក់ចង់ទៅឈ្លានពាន និងផ្តួលរំលំមីយ៉ាន់ម៉ាសោះ។
ជាមេដឹកនាំដែលតែងតែលើកយកបញ្ហារ៉ូហ៊ីងយ៉ាដាក់លើតុរួមជជែកទាំងក្នុងតំបន់ (កិច្ចប្រជុំអាស៊ាន) និងក្រៅតំបន់ លោកនាយករដ្ឋមន្ត្រី ក៏បន្ទោសពីកម្សោយរបស់អង្គការសហប្រជាជាតិ ដោយលោក ចោទថា បានឃើញរដ្ឋាភិបាលមួយ ប្រព្រឹត្តអំពើឃោរឃៅដាក់ប្រជាជនខ្លួនឯងហើយ តែនៅតែមិនអាចធ្វើអ្វីបានសោះ៕
Tag:
មីយ៉ាន់ម៉ា
ម៉ាឡេស៊ី
© រក្សាសិទ្ធិដោយ thmeythmey.com