ផ្លូវជាតិពីសិរីសោភ័ណ-ប៉ោយប៉ែត នឹងបើកឲ្យរថយន្តឆ្លងកាត់វិញ នៅថ្ងៃនេះ

ជាតិ

ផ្លូវជាតិពីសិរីសោភ័ណ-ប៉ោយប៉ែត នឹងបើកឲ្យរថយន្តឆ្លងកាត់វិញ នៅថ្ងៃនេះ

01, Oct 2019 , 7:29 am

រូបភាព

រូបពីហ្វេសប៊ុកក្រសួងសាធារណការ និងដឹកជញ្ជូន

ដោយ: អ៊ុត រស្មី (Uth Raksmey)

ភ្នំពេញ៖កំណាត់ផ្លូវជាតិលេខ៥ ពីសិរីសោភ័ណ-ប៉ោយប៉ែត នឹងបើកឲ្យរថយន្តគ្រប់ប្រភេទធ្វើចរាចរណ៍ជាធម្មតាវិញ នៅព្រឹកថ្ងៃទី១ តុលានេះ ក្រោយផ្អាកដំណើរការរយៈពេល៤ថ្ងៃកន្លងមក ដោយសារការបាក់ទំនប់ទឹក អាងអូរខៃដន ។ នេះបើតាមមន្ទីរសាធារណការ និងដឹកជញ្ជូន ខេត្តបន្ទាយមានជ័យ។

មន្ទីរសាធារណការខេត្ត បានបញ្ជាក់ថា ការបើកឲ្យរថយន្តគ្រប់ប្រភេទធ្វើដំណើរឆ្លងកាត់កំណាត់ផ្លូវជាតិលេខ៥ ត្រង់ចំណុចPK ៣៩៤+៩០០ដល់ PK ៣៩៦+៦០០ ស្ថិតក្នុងភូមិអូខៃដន សង្កាត់មិត្ត ក្រុងប៉ោយប៉ែតនេះ ដោយសារស្ថានភាពទឹកជំនន់ស្រកចុះ។ «ប៉ុន្តែ(រថយន្តគ្រប់ធុនទាំងអស់)សូមធ្វើចរាចរណ៍ស្ថិតនៅលើទ្រូងផ្លូវ ហាមធ្វើដំណើរលើចិញ្ចើមផ្លូវ ឫជាយផ្លូវ ព្រោះផ្លូវមិនទាន់ស្ងួតល្អ និងរឹងមាំនៅឡើយ»។ នេះជាការបញ្ជាក់របស់លោក គឹម សុវណ្ណ ប្រធានមន្ទីរសាធារណការខេត្ត។

បន្ថែមពីនេះក្រសួងសាធារណការ បានបញ្ជាក់ថា ស្ថានភាពទឹកជំនន់ដែលបានស្រកនេះ មិនបានធ្វើឲ្យកំណាត់ផ្លូវខូចខាត ក្លាយជាសំបុកមាន់លើទ្រូងផ្លូវទេ ពោលគឺគ្រាន់តែទឹកហូរច្រោះ និងបាក់ចិញ្ចើមផ្លូវ ប្រវែង៤០០ម៉ែត្រ ខាងស្តាំដៃពីសិរីសោភ័ណ ទៅប៉ោយប៉ែតប៉ុណ្ណោះ៕