អន្តរជាតិ
ឥណ្ឌា ព្យួរបំរាមលើការប្រើប្រាស់ «ប្លាស្ទិកដែលប្រើតែម្ដង» រូបភាព AFP
×
ដោយ៖ ងួន សុភាវត្តី
មន្ត្រីរដ្ឋាភិបាលឥណ្ឌា បាននិយាយនៅថ្ងៃទី១ ខែតុលា ថា ឥណ្ឌា នឹងផ្អាការអនុវត្តបម្រាមលើការប្រើប្រាស់បាស្ទិកដែលប្រើតែម្ដងវិញ ទោះវិធានការថ្មីនេះ ប្រុងនឹងអនុវត្តទៅហើយក្ដី។ ការផ្អាកអនុវត្ត ធ្វើឡើយក្រោយមានការមិនពេញចិត្តពីសំណាក់ឧស្សាហកម្មប្លាស្ទិក និងការបារម្ភពីការធ្លាក់ចុះផ្នែកសេដ្ឋកិច្ច ក៏ដូចជាការបាត់បង់ការងារ។
តាមការគ្រោងទុក នាយករដ្ឋមន្ត្រីឥណ្ឌា នារិន្ទ្រា ម៉ូឌី នឹងប្រកាសពីបំរាមនៃការប្រើប្រាស់ប្លាស្ទិក៦មុខ នៅថ្ងៃទី២ ខែតុលា ដែលត្រូវនឹងខួបកំណើតទី១៥០របស់មេដឹកនាំ មហាត្មះ គន្ធី (Mahatma Gandhi) ។ វិធានការថ្មីនេះ ត្រូវបានគេមើលឃើញថា ជាផ្នែកមួយនៃយុទ្ធការបញ្ឈប់ការប្រើប្រាស់ប្លាស្ទិកដែលប្រើបានតែមួយដងទាំងស្រុងនៅឆ្នាំ២០២២។
យ៉ាងណាមិញ ក្ដីបារម្ភពីផលប៉ះពាល់លើឧស្សាហកម្មប្លាស្ទិក បង្ខំឲ្យរដ្ឋាភិបានក្រុងញូវដែលីផ្អាកគម្រោងខាងលើសិន។ មន្ត្រីរដ្ឋាភិបាលឥណ្ឌាពីររូបបាននិយាយថា វិធានការណ៍ថ្មីដែលគ្រោងអនុវត្តនោះរាប់បញ្ចូលថង់ កែវ ចាន ដបទឹក បំពង់បឺតបា្លស្ទិក។ ជំនួសឲ្យការផ្អាបម្រាមប្រើប្រាស់ រដ្ឋាភិបាលឥណ្ឌា នឹងព្យាយាមពន្យល់ប្រជាជនពីផលប៉ះពាល់នៃការប្រើប្រាស់ប្លាស្ទិកដើម្បីឲ្យប្រជាជនកាត់បន្ថយការប្រើប្រាស់ខ្លួនឯង។
ទីភា្នក់ងារព័ត៌មាន Reuters លោក Chandra Kishore Mishra មន្ត្រីជាន់ខ្ពស់ក្រសួងបរិស្ថានឥណ្ឌា និយាយថា សម្រាប់បច្ចុប្បន្ន រដ្ឋាភិបាលនឹងស្នើឲ្យរដ្ឋផ្សេងៗអនុវត្តច្បាប់មានស្រាប់ដែលច្បាប់ប្រឆាំងនឹងការ ស្តុកទុក ផលិតប្លាស្ទិកដែលប្រើបានតែមួយដង និងការប្រើប្រាស់ប្លាសិ្ទកមួយចំនួន។ លោកMishra មានបញ្ជាក់ថា៖ « មិនមានបំរាមថ្មីណាមួយត្រូវបានអនុម័តទេ។ ឥឡូវនេះ វាជាពេលដែលត្រូវប្រាប់ពលរដ្ឋពីផលប៉ះពាល់របស់ប្លាស្ទិកលើមនុស្ស ដូចនេះពួកគេនៅមិនប្រើប្រាស់វា»។
សហព័ន្ធឧស្សាហកម្មឥណ្ឌាបាននិយាយថា គម្រោងដាក់បម្រាមរបស់រដ្ឋាភិបាល បានធ្វើឲ្យមានប៉ះពាល់សេដ្ឋកិច្ចមួយផ្នែក។ សហព័ន្ធនេះលើកឡើងថា ដបប្លាស្ទិកតូចៗដែលប្រើសំរាប់ដាក់ថ្នាំ គួរតែត្រូវបានលើកលែង ដោយសារមិនទាន់មានអ្វីមកជំនួសវាបាន។
តាមការប៉ាន់ស្មាន់របស់អង្គការសហប្រជាជាតិ កាកសំណល់ប្លាស្ទិកត្រូវបាន យកទៅចាក់ចោលក្នុងសមុទ្រអន្តរជាតិប្រមាណ ១០០លានតោន។ ឥណ្ឌាដែលជាប្រទេសដែលមានប្រជាជនច្រើននេះ បានបញ្ចេញកាកសំណល់ប្លាស្ទិកប្រមាណ១៤លានតោនក្នុងមួយឆ្នាំ៕
© រក្សាសិទ្ធិដោយ thmeythmey.com