កីឡាជាតិ
ជាតិ
បញ្ហារបួសជង្គង់ជាហេតុផលធ្វើឲ្យ វឌ្ឍនាកា មិនជាប់ជម្រើសជាតិត្រៀមប៉ះអ៊ីរ៉ង់ និងអ៊ីរ៉ាក់? កីឡាករ ចាន់ វឌ្ឍនាកា (អាវខៀវ)ក្នុងជំនួបជាមួយហ្សង់ដានីក្នុងវគ្គជម្រុះ AFC Asian Cup កាលពីពេលកន្លងទៅ
× ខ្សែប្រយុទ្ធឆ្នើម ចាន់ វឌ្ឍនាកា មិនស្ថិតក្នុងបញ្ជីឈ្មោះក្រុមជម្រើសជាតិកម្ពុជា ដើម្បីត្រៀមប្រកួតជាមួយម្ចាស់ផ្ទះអ៊ីរ៉ង់នាវគ្គជម្រុះជុំទី២នៃពានរង្វាន់ World Cup នាថ្ងៃទី១០ ខែតុលា ឆ្នាំ២០១៩នោះទេ។ បញ្ហារបួសសន្លាក់ជង្គង់ដែលប៉ះទង្គិចក្នុងជំនួបជាមួយណាហ្គាវើល អាចជាមូលហេតុនៃអវត្តមានរបស់ វឌ្ឍនាកា នៅលើកនេះ។ ព្រោះមុនសហព័ន្ធកីឡាបាល់ទាត់កម្ពុជាបង្ហាញបញ្ជីឈ្មោះបឋម ក្រុមការងាររបស់លោក Keisuke Honda បានមកសួរពីស្ថានភាពរបួសរបស់ខ្សែប្រយុទ្ធឆ្នើមរូបនេះ។
ទោះបីគ្មានឯកសារផ្លូវការពីសហព័ន្ធកីឡាបាល់ទាត់កម្ពុជាពាក់ព័ន្ធការកោះហៅខ្សែប្រយុទ្ធឆ្នើម ចាន់ វឌ្ឍនាកា ឲ្យចូលរួមជាមួយក្រុមជម្រើសជាតិកម្ពុជា។ តែលោក បែ មករា អ្នកចាត់ការទូទៅក្លិបបឹងកេតបានអះអាងថា ក្រុមការងារលោក Keisuke Honda អ្នកចាត់ការទូទៅក្រុមជម្រើសជាតិកម្ពុជា បានមកសួរ លោក ពាក់ព័ន្ធស្ថានភាពរបួសសន្លាក់ជង្គង់របស់កីឡាករ ចាន់ វឌ្ឍនាកា។
ក្នុងន័យនេះប្រសិនបើ វឌ្ឍនាកា មិនញាំញីដោយរបួស នោះរូបគេអាចនឹងស្ថិតក្នុងបញ្ជីឈ្មោះក្រុមជម្រើសជាតិកម្ពុជាលើកនេះ។ ព្រោះការសួរស្ថានភាពរបួសពីសំណាក់ក្រុមការងារ លោក Honda ធ្វើឡើងមុនសហព័ន្ធកីឡាបាល់ទាត់កម្ពុជា បង្ហាញបញ្ជីឈ្មោះក្រុមកីឡាករជម្រើសជាតិបឋមទាំង២៦រូប ដើម្បីត្រៀមប៉ះអ៊ីរ៉ង់ និងអ៊ីរ៉ាក់ក្នុងវគ្គជម្រុះជុំទី២ពានរង្វាន់ World Cup។ កម្ពុជានឹងធ្វើដំណើរទៅជួបអ៊ីរ៉ង់នៅថ្ងៃទី១០ តុលា មុនទទួលភ្ញៀវអ៊ីរ៉ាក់នៅថ្ងៃទី១៥ តុលា ឆ្នាំ២០១៩ នៅពហុកីឡដ្ឋានជាតិ។
នេះជាលើកទី៣ហើយ ដែលខ្សែប្រយុទ្ធឆ្នើមមានដើមកំណើតមកពីខេត្តកំពតរូបនេះ អវត្តមានក្នុងក្រុមជម្រើសជាតិក្រោមការដឹកនាំរបស់លោក Keisuke Honda ដែលមានលោក Filex Dalmas ជាគ្រូបង្វឹក សម្រាប់វគ្គជម្រុះ World Cup 2022។ ប៉ុន្តែក្នុងបញ្ជីឈ្មោះក្រុមជម្រើសជាតិ ដែលសហព័ន្ធបានបង្ហាញកាលពីថ្ងៃទី២៦ ខែកញ្ញា គេឃើញមានវត្តមានកីឡាករ ប្រាក់ មុន្នីឧត្តម និង ធារី ចន្ថាប៊ីន ដែលអវត្តមានពីរលើកកន្លងមក។
បើតាមលោក បែ មករា ស្ថានភាពរបួសសន្លាក់ជង្គង់ដោយមានប្រេះឆ្អឹង និងទឹកដក់ក្នុងសន្លាក់របស់កីឡាករ ចាន់ វឌ្ឍនាកា អាចចំណាយពេលពី២ទៅ៣សប្តាហ៍ក្នុងការព្យាបាល។ បច្ចុប្បន្នរូបគេ អាចចូលហ្វឹកហាត់ជាមួយមិត្តរួមក្រុមបានហើយ គ្រាន់តែមិនទាន់ជាសះស្បើយ១០០ភាគរយប៉ុណ្ណោះ។ អ្នកចាត់ការទូទៅរូបនេះ សង្ឃឹមថា ស្ថានភាពរបួស វឌ្ឍនាកា នឹងអាចជាសះស្បើយ១០០ភាគរយពេលបឹងកេតប៉ះព្រះខ័នរាជស្វាយរៀងនៅវគ្គផ្តាច់ព្រ័ត្រពាន់រង្វាន់សម្តេច ហ៊ុន សែន នាដើមខែវិច្ឆិកា ខាងមុខ។
របួសរបស់កីឡាករ ចាន់ វឌ្ឍនាកា កើតឡើងក្រោយប៉ះទង្គិចជាមួយកីឡាករណាហ្គាវើលក្នុងជំនួបរវាងក្រុមបឹងកេតជាមួយណាហ្គាវើលក្នុងពានរង្វាន់ក្របខណ្ឌមិត្តហ្វូនខេមបូឌានលីគ កាលពីថ្ងៃទី២២ កញ្ញា នៅកីឡដ្ឋានខេមបូឌាអ៊ែរវ៉េ។ ខ្សែប្រយុទ្ធរូបនេះត្រូវបានប្តូរចេញភ្លាមៗ ក្រោយទាត់បាល់ពិន័យរកគ្រាប់បាល់តាមស្មើ ១-១ ឲ្យក្រុមបឹងកេត៕
Tag:
បាល់ទាត់
World Cup
បែ មករា
ចាន់ វឌ្ឍនាកា
© រក្សាសិទ្ធិដោយ thmeythmey.com