អន្តរជាតិ
លោក មូន ចេអ៊ីន នឹងមិនទៅចូលរួមពិធីឡើងគ្រងរាជ្យអធិរាជជប៉ុន
× ប្រធានាធិបតីកូរ៉េខាងត្បូង មូន ចេអ៊ីន គ្មានគម្រោងចូលរួមពិធីឡើងសោយរាជ្យអធិរាជ ណារ៉ូហីតូ (Naruhito) ។ មន្ត្រីប្រចាំវិមានប្រធានាធិបតីម្នាក់ បញ្ជាក់បែបនេះ នៅថ្ងៃសុក្រ ទី១១ តុលា។ ចំពោះមូលហេតុ មន្ត្រីរូបនេះ បានទម្លាក់កំហុសលើជំហររបស់ក្រុងតូក្យូវាយបកផ្នែកពាណិជ្ជកម្មប្រឆាំងក្រុងសេអ៊ូលពាក់ព័ន្ធរឿងប្រវត្តិសាស្ត្រ។
«ប្រធានាធិបតី មូន នឹងមិនទៅចូលរួមពិធីឡើងសោយរាជ្យរបស់អធិរាជជប៉ុនឡើយ»។ មន្ត្រីកូរ៉េខាងត្បូងម្នាក់ដែលបម្រើការនៅវិមាន Cheongwadae ប្រាប់ទីភ្នាក់ងារព័ត៌មាន Yonhap បែបនេះ ដោយសុំមិនបញ្ចេញឈ្មោះ។ សម្រាប់ការសម្រេចចិត្តបែបនេះ លោកនាយករដ្ឋមន្ត្រី Lee Nak-yon ទំនងជាទៅចូលរួមជំនួសលោក មូន ចេអ៊ីន។
វានៅតែមិនទាន់ត្រូវបានបញ្ជាក់ថា តើក្រុងសេអ៊ូលបានជូនដំណឹងជាផ្លូវការដល់ទីក្រុងតូក្យូអំពីឈ្មោះអ្នកតំណាងរបស់ខ្លួនហើយឬនៅទេ។ តាមសារព័ត៌មានជប៉ុន លោកនាយករដ្ឋមន្ត្រី ស៊ីនហ្សូ អាបេ នឹងជួបមេដឹកនាំបរទេសប្រមាណ៥០នាក់ ដែលនឹងទៅធ្វើទស្សនកិច្ចនាក្រុងតូក្យូសម្រាប់ពិធីនេះ។ លោក អាបេ ត្រូវបានរាយការណ៍ថា មានបំណងបង្កើតជំនួប១ទល់១ជាមួយសមភាគីកូរ៉េខាងត្បូង។
កន្លងទៅ ទីប្រឹក្សាលោកមូន ចេអ៊ីន ធ្លាប់បានបង្ហាញក្តីសង្ឃឹមសម្រាប់កិច្ចប្រឹងប្រែងដើម្បីដោះស្រាយទំនាស់ ដែលអាចកើតមានក្នុងជំនួបរវាងលោក មូន និងលោក អាបេ នាឱកាសពិធីឡើងសោយរាជ្យ នាថ្ងៃ២២ តុលា។ ក៏ប៉ុន្តែ រដ្ឋាភិបាលជប៉ុន មិនបង្ហាញឆន្ទៈផ្លាស់ប្តូរជំហរខ្លួនឡើយ។ សម្រាប់លោក មូន បន្ទុកនយោបាយគឺធំធេងណាស់ ហើយគ្មានសមិទ្ធិផលការទូតណាមួយត្រូវបានធានាពីការចូលរួមរបស់គាត់នៅក្នុងព្រឹត្តិការណ៍តូក្យូនោះទេ។
សូមបញ្ជាក់ថា ទំនាស់ពាណិជ្ជកម្មរវាងមហាអំណាចសេដ្ឋកិច្ចទាំងពីរកើតចេញពីសាលក្រមកូរ៉េខាងត្បូងបានបង្ខំអោយក្រុមហ៊ុនជប៉ុនបង់សំណងទៅជនរងគ្រោះ ដែលត្រូវបានគេបង្ខំអោយធ្វើការក្នុងសម័យអាណានិគមរបស់ជប៉ុនលើ កូរ៉េខាងត្បូង។ ដោយសារតែរឿងនេះ ទីក្រុងតូក្យូបានរឹតត្បិតការនាំចេញរូបធាតុគីមីសំខាន់ៗបីប្រភេទទៅកូរ៉េខាងត្បូង ហើយបានដកកូរ៉េខាងត្បូងចេញពីបញ្ជីដៃគូពាណិជ្ជកម្មគួរឲ្យទុកចិត្តបានទៀត៕
Tag:
ជប៉ុន
កូរ៉េខាងត្បូង
មូនចេអ៊ីន
© រក្សាសិទ្ធិដោយ thmeythmey.com