អន្តរជាតិ
ព្រះចៅអធិរាជជប៉ុន ឡើងគ្រងរាជ្យផ្លូវការ
× អធិរាជ ណារ៉ូហ៊ីតុ (Naruhito) ដែលមានព្រះជន្ម ៥៩វស្សា បានឡើងគ្រងរាជសម្បត្តិជាអធិរាជទី១២៦របស់ជប៉ុន តាមពិធីបែបទំនៀមទំលាប់ប្រពៃណី នៅថ្ងៃទី ២២ ខែតុលា។ ពិធីរាជាភិសេកនេះ មានការចូលរួមព្រះមហាក្សត្រ ខ្សែរាជរង្ស និងមន្ត្រីជាន់ខ្ពស់មកពីបណ្តាលប្រទេសជាង ១៨០។
នៅថ្ងៃទី២២ ខែតុលា អធិរាជ ណារ៉ូហ៊ីតុ បានឡើងគ្រងរាជ្យសម្បត្តិផ្លូវការហើយ បន្ទាប់ស្នងតំណែងជំនួសបិតា អាគីហ៊ីតុ ដែលបានដាក់រាជ្យ។ អាគីហ៊ីតុ ជាអធិរាជជប៉ុនដំបូងគេក្នុងរយៈពេលជាងពីររយឆ្នាំដែលដាក់រាជ្យក៏គួរឲ្យភ្ញាក់ផ្អើល។
ជាមួយសំលៀកបំពាក់គ្រងរាជសម្បត្តិបុរាណពណ៌ទឹកមាស និងអមដោយព្រះអគ្គមហេសី បានថ្លែងព្រះរាជប្រកាសរាជាភិសេកពីព្រះរាជបល្ល័ង Takamikura។ បន្ទាប់ពីព្រះរាជប្រកាសរបស់ព្រះចៅអធិរាជ នាយករដ្ឋមន្ត្រីជប៉ុន ស៊ិនហ្សូ អាបេ បានស្រែកបន្ទរថា «banzai ឬ សូមឲ្យព្រះអង្គមានព្រះជន្មយឺនយូរ» បីដង ដើម្បីបញ្ចប់និតិវិធីរាជាភិសេក។
ជាកិច្ចបន្ត គឺក្បួនព្យុះហយាត្រា ប៉ុន្តែកិច្ចនេះត្រូវបានគេលើកទៅដាក់នៅថ្ងៃទី១០ ខែវិច្ឆិកាវិញ។ នៅថ្ងៃបន្ទាប់ គណៈប្រតិភូ ឬមន្ត្រីជាន់ខ្ពស់មកពីប្រទេសផ្សេង នឹងត្រូវជួបជុំគ្នាក្នុងពិធីលៀងសាយភោជន។
ដើម្បីឲ្យស្នងរាជ្យទៅបាន មហាក្សត្រចាំបាច់ណាស់ត្រូវការ គ្រឿងរាជកកុធភណ្ឌ (គ្រឿងសម្រាប់គ្រងរាជ)។ ចំណែកពិធីរាជាភិសេករបស់ អធិរាជ ណារ៉ូហ៊ីតុ វិញ ក៏មិនខុសគ្នាពីប្រទេសផ្សេងប៉ុន្មានដែរ។ ពិតណាស់ គ្រឿងរាជកកុធភណ្ឌសម្រាប់រាជភិសេករបស់រជ្ជទាយាទណារ៉ូហ៊ីតូ គឺរតនវត្ថុ និងដាវបុរាណ ដែលប្រជាជនជប៉ុនចាត់ទុកថាជាអំណោយពីអធិទេព និងជាគ្រឿងតំណាងឲ្យព្រះចៅអធិរាជ ។
សូមបញ្ជាក់ថា ក្នុងពិធីដ៏អធិកអធមមួយនេះ មានអធិបតីភាពយ៉ាងខ្ពង់ខ្ពស់ពីព្រះមហាក្សត្រប្រទេសកម្ពុជា ព្រះអង្គម្ចាស់អង់គ្លេស Charles នាយករដ្ឋមន្ត្រីកូរ៉េខាងត្បូង និងលោកស្រី ការី ឡាំផងដែរ៕
© រក្សាសិទ្ធិដោយ thmeythmey.com