មន្ត្រីការបរទេសខ្មែរថា អ្នកស្រី មូរ សុខហួរ ត្រូវហាមឃាត់មិនឲ្យចូលទឹកដីថៃ

ជាតិ

នយោបាយជាតិ

មន្ត្រីការបរទេសខ្មែរថា អ្នកស្រី មូរ សុខហួរ ត្រូវហាមឃាត់មិនឲ្យចូលទឹកដីថៃ

22, Oct 2019 , 4:31 pm

រូបភាព

រូបពីទំព័រហ្វេប៊ុក Mu Sochua

ដោយ: ថ្មីៗ

ក្រសួងការបរទេសកម្ពុជា បានទទួលព័ត៌មានផ្លូវការពីភាគីថៃថា នគរបាលអន្តោប្រវេសន៍ថៃ មិនអនុញ្ញាតឲ្យអ្នកស្រី មូរ សុខហួរ អតីតអនុប្រធានគណបក្សសង្គ្រោះជាតិ ចូលដឹកដីថៃ។

លោក កេត សោផាន់ អ្នកនាំពាក្យក្រសួងការបរទេសកម្ពុជា ប្រាប់សារព័ត៌មានថ្មីៗតាមទូរស័ព្ទនៅរសៀលថ្ងៃទី២២ ខែតុលា ឆ្នាំ២០១៩ថា អ្នកស្រី មូរ សុខហួរ បម្រុងនឹងហោះចេញពីប្រទេសម៉ាឡេស៊ី ចូលមកថៃ។ លោក បញ្ជាក់ដូច្នេះថា៖«នៅព្រលានយន្តហោះ មុននឹងចូលដល់ទឹកដីប្រទេសមួយ យើង ត្រូវឆ្លងកាត់កន្លែងអន្តោប្រវេសន៍។ ពេលហ្នឹងហើយ គេមិនអនុញ្ញាតឲ្យគាត់ចូលទេ»។

បើតាមមន្ត្រីជាន់ខ្ពស់ក្រសួងការបរទេសរូបនេះ មានតែករណីអ្នកស្រី មូរ សុខហួរ ប៉ុណ្ណោះ ដែលភាគីថៃ ផ្តល់ព័ត៌មានថា មិនឲ្យចូលទឹកដីថៃ ចំណែក ថ្នាក់ដឹកនាំប្រឆាំងដទៃទៀត ពុំទាន់មានព័ត៌មាននោះទេ។ យ៉ាងណា គេ មិនទាន់ឃើញមានប្រតិកម្មពីអ្នកស្រី មូរ សុខហួរ នៅឡើយទេ។ កន្លងមក អ្នកស្រី ប្រកាសថា ថ្នាក់ដឹកនាំប្រឆាំងមួយចំនួន រួមទាំងអ្នកស្រីផងដែរ បានចាប់ផ្តើមចូលមកតំបន់អាស៊ីហើយ ហើយនឹងមានជាបន្តបន្ទាប់ទៀត មុននឹងពួកគេ ឈានជើងចូលមកកម្ពុជាជាមួយលោក សម រង្ស៊ី នៅថ្ងៃទី៩ ខែវិច្ឆិកា ឆ្នាំ២០១៩។

សារព័ត៌មានមួយរបស់ថៃឈ្មោះ MGR Online ទើបនឹងចុះផ្សាយថា អាជ្ញាធរថៃ អាចនឹងមិនផ្តល់ទិដ្ឋាការដល់លោក សម រង្ស៊ី និងថ្នាក់ដឹកនាំរបស់លោក ប្រសិនបើ ពួកលោក បង្កចលាចលក្នុងទឹកដីថៃ ពីព្រោះ កាលៈទេសៈនេះ អាជ្ញាធរថៃ ត្រូវរក្សាការពារសន្តិសុខយ៉ាងតឹងរ៉ឹងបំផុត ក្នុងនាមជាម្ចាស់ផ្ទះ ដែលត្រូវរៀបចំកិច្ចប្រជុំកំពូលអាស៊ានលើកទី៣៥ ពីថ្ងៃទី៣១ ខែតុលា ដល់ថ្ងៃទី៤ ខែវិច្ឆិកា ឆ្នាំ២០១៩។

លោក សម រង្ស៊ី បង្ហើបថា លោក និង ពលករខ្មែរ នឹងចូលមកកម្ពុជាតាមព្រំដែនថៃ ដោយថ្មើរជើង។ លោក ពឹងផ្អែកខ្លាំងលើពលករខ្មែរនៅប្រទេសថៃ ដោយលោក អះអាងថា នៅថៃ មានពលករខ្មែរប្រមាណជា២លាននាក់ឯណោះ ហើយក៏រំពឹងដែរថា ពលករខ្មែរនៅប្រទេសដទៃទៀត ដូចជា កូរ៉េ និង ម៉ាឡេស៊ី ជាដើម នឹងមកប្រមូលផ្តុំគ្នានៅប្រទេសថៃ។

មេដឹកនាំប្រឆាំងរូបនេះ ធានាថា បើលោក ពិតជាមកប្រមូលផ្តុំកម្លាំងពលករខ្មែរនៅថៃមែននោះ លោក នឹងមិនធ្វើឲ្យមានចលាចលក្នុងប្រទេសថៃនោះទេ៕