អន្តរជាតិ
អនុប្រធានាធិបតីអាមេរិក ប្រាប់បាតុករហុងកុងថា «យើងឈរជាមួយអ្នក» អនុប្រធានាធិបតីអាមេរិក លោក Mike Pence ពិភាក្សាអំពីទំនាក់ទំនងអាមេរិក ចិន នៅthe Wilson Center នាថ្ងៃទី២៤ ខែតុលា ឆ្នាំ២០១៩, រូបភាព៖ VOA
× អនុប្រធានាធិបតីអាមេរិក ម៉ៃ ផេន (Mike Pence) នៅថ្ងៃទី២៤ ខែតុលា បានចោទចិនចំៗថា ទីក្រុងប៉េកាំងបានបំបិទ «សិទ្ធិ និងសេរីភាព» ប្រជាជននៅក្នុងទីក្រុងហុងកុង និងថា អាមេរិកឈរជាមួយបាតុករហុងកុងទៀតផង។ ទោះគាំទ្រការតវ៉ាក្ដី អនុប្រធានាធិបតីអាមេរិករូបនេះ អស់ពីរិះគន់ចិន លោក Pence ក៏បានលើកឡើងទៀតថា អាមេរិក មិនចង់ប្រឈមមុខជាមួយចិនដោយផ្ទាល់ទេ។
ក្នុងអំឡុងពេលថ្លែងគោលនយោបាយសំខាន់ៗទៅលើប្រទេសចិន មុនជំនួបចរចាពាណិជ្ជកម្ម លោក ម៉ៃ ផេន បានលើកឡើងថា អាមេរិក គ្មានសង្ឃឹមឡើយថា ការភ្ជាប់ទំនាក់ទំនងសេដ្ឋកិច្ចអាចធ្វើឲ្យទីក្រុងប៉េកាំងអាចផ្លាស់ប្តូរពីរបបដឹកនាំផ្ដាច់ការទៅជាសង្គមសេរី និងបើកចំហឡើយ។ អាមេរិកក៏មិនដឹងធ្វើយ៉ាងណាដែរ ដើម្បីឲ្យចិនគោរពទ្រព្យសម្បត្តិឯកជន នីតិរដ្ឋ និងច្បាប់ពាណិជ្ជកម្មអន្តរជាតិ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters ។
ពាក់ព័ន្ធទៅនឹងបញ្ហាខាងលើ អនុប្រធានាធិបតីរូបនេះ បានទាញយកវិបត្តិនៅទីក្រុងហុងកុងមកសំអាងហេតុទៅនឹងអ្វី ដែលលោកបានអះអាងថា ចិនជារបបអាជ្ញាព្រឹត្តិ។ ពិតណាស់ លោក ផេន បានលើកឡើងថា ទីក្រុងប៉េកាំង បានជ្រែតជ្រែកចូលទៅក្នុងកិច្ចការផ្ទៃក្នុងហុងកុងម្តងហើយម្តងទៀត ដូចជាការរឹតបន្តឹងសិទ្ធិសេរីភាពប្រជាជនហុងកុង ដែលត្រូវបានធានាតាមរយៈកិច្ចព្រមព្រៀងអន្តរជាតិទៅទៀតនោះ។
ក្នុងន័យលើកទឹកចិត្តក្រុមបាតុករហុងកុងឲ្យធ្វើការតវ៉ាប្រឆាំងនឹងរដ្ឋាភិបាលទីក្រុងប៉េកាំង លោក ផេន បាននិយាយថា៖ «យើងឈរជាមួយអ្នក យើងត្រូវបានលើកទឹកចិត្តដោយអ្នក។ យើងជំរុញឲ្យអ្នកនៅតែបន្តបាតុកម្មអហិង្សាតទៅទៀត»។ ប៉ុន្តែលោកក៏បញ្ជាក់ផងដែរថា អាមេរិកគាំទ្រតែបាតុកម្មអហិង្សាប៉ុណ្ណោះ។
អស់ពីវាយចិនពីរ បីព្រនង់ លោក ផេន ក៏ឆ្លៀតពេលលោមចិត្តចិនម្តង។ ជាក់ស្តែង អនុប្រធានាធិបតីអាមេរិករូបនេះ បានចង្អុលបង្ហាញថា អាមេរិកមិនចង់រាំងខ្ទប់ការអភិវឌ្ឍរបស់ចិនទេ ហើយអ្វីដែលសំខាន់គឺកសាងទំនាក់ទំនងជាមួយមេដឹកនាំចិន។ ពោល គឺអាមេរិកជំរុញឲ្យចិនចេះគ្រប់គ្រងឱកាសនៅក្នុងប្រវត្តិសាស្ត្រ ដើម្បីបញ្ចប់សង្គ្រាមពាណិជ្ជកម្មរវាងប្រទេសមហាអំណាចសេដ្ឋកិច្ចទាំងពីរ។ ការលើកឡើងរបស់អនុប្រធានាធិបតីអាមេរិកបែបនេះ គឺដោយសារការខិតជិតមកដល់នៃការចុះហត្ថលេខាលើកិច្ចព្រមព្រៀងពាណិជ្ជកម្មអាមេរិក និងចិនដំណាក់កាលទីមួយ នៅប្រទេសស៊ីលី។
គួរបញ្ជាក់ថា អនុប្រធានាធិបតីអាមេរិក Mike Pence មិនត្រឹមតែរិះគន់ចិនលើរឿងហុងកុងតែមួយនោះ តែនៅមានរឿងផ្សេងទៀតដូចជា ការរឹតត្បិតលើជនជាតិភាគតិតមូស្លីមវីហ្គ័រជាដើម៕
© រក្សាសិទ្ធិដោយ thmeythmey.com