កាលពីថ្ងៃសុក្រ ទី២៥ ខែតុលា ឆ្នាំ ២០១៩៖ ក្រុមហ៊ុនអាកាសចរ ស្ព្រីងអ៊ែរឡាញ (Spring Airlines) បានបើកសម្ពោធជាផ្លូវការ ជើងហោះហើរត្រង់ កម្ពជា-ចិន ដើម្បីជំរុញឱ្យមានកំណើនភ្ញៀវទេសចរឱ្យកាន់តែច្រើនរវាងប្រទេសទាំងពីរ។ ក្នុងកម្មវិធីនោះក៏មានការចូលរួមជាច្រើនពីសំណាក់អ្នកគាំទ្រក៏ដូចជាក្រុមហ៊ុនអាកាសចរនានានៅប្រទេសកម្ពុជាជាច្រើន។ ជាមួយគ្នានេះផងដែរ អ្នកចូលរួមក៏ទទួលបាននូវកាដូរអនុស្សាវរីយពីក្រុមហ៊ុន ស្ព្រីងអ៊ែរឡាញទៀតផង។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានថ្លែងថា ការបង្កើនឲ្យមានជើងហោះហើរត្រង់រវាងកម្ពុជា-ចិន នឹងជួយជំរុញកំណើនភ្ញៀវទេសចរបន្ថែមមកទស្សនាប្រទេសកម្ពុជា។ ជើងហោះហើរថ្មីរបស់ក្រុមហ៊ុនអាកាសចរណ៍ ស្ព្រីងអ៊ែរឡាញ នឹងហោះហើរត្រង់ពីកម្ពុជាទៅស៊ីអាន និងពីកម្ពុជាទៅណានជីន។
ថ្លែងក្នុងកម្មវិធីសម្ពោធជើងហោះហើរថ្មី របស់ក្រុមហ៊ុនអាកាសចរណ៍ ស្ព្រីងអ៊ែរឡាញ (Spring Airlines) ឆ្នាំ២០១៩-២០២០ លោកស្រី ឆាយ ស៊ីវលីន មានប្រសាសន៍ថា៖ «ខ្ញុំជឿជាក់ថា ការហោះហើរត្រង់ពីកម្ពុជាទៅស៊ីអាន និងពីកម្ពុជាទៅណានជីន នេះនឹងទាក់ទាញភ្ញៀវទេសចរ ចូលមកកម្ពុជាកាន់បន្ថែមទៀត ដោយសារតែក្រុមហ៊ុនស្ព្រីងអ៊ែរឡាញហោះហើរជារៀងរាល់ថ្ងៃ»។
លោកស្រីបន្ថែមថា៖ «កត្តាសំខាន់នៃការបន្ថែមជើងហោះហើរ គឺចង់នាំទេសចរមកប្រទេសកម្ពុជាឲ្យច្រើន ដោយសារកន្លងមកអ្នកទាំងអស់គ្នាឃើញហើយថា មានការធ្លាក់ចុះចំនួនភ្ញៀវទេសចរ ហោះចូលមកតំបន់ទេសចរ ដែលជាអត្តសញ្ញាណរបស់ប្រទេសកម្ពុជានោះគឺខេត្តសៀមរាប ហើយបច្ចុប្បន្ននេះយើងខ្វះការហោះហើរត្រង់មកខេត្តសៀមរាបផងដែរ។ ដូច្នេះហើយបានជាក្រុមហ៊ុនស្ព្រីងអ៊ែរឡាញ បង្កើនជើងហោះហើរបន្ថែមចូលមកទីក្រុងភ្នំពេញ និងហួសទៅខេត្តសៀមរាបតែម្ដង»។
លោកស្រី ឆាយ ស៊ីវលីន បានបន្តទៀតថា ៖«ដើម្បីទាក់ទាញភ្ញៀវទេសចរមកទស្សនាប្រទេសកម្ពុជាឲ្យកាន់តែកើនឡើង យើងទាំងអស់គ្នាត្រូវតែរួមគ្នាផ្ដល់នូវសេវាកម្ម ប្រកបដោយគុណភាព និងស្មោះត្រង់ជាមួយភ្ញៀវ ហើយស្ថាប័នដែលពាក់ព័ន្ធត្រូវចូលរួម បង្ហាញនូវបដិសណ្ឋាកិច្ចចំពោះភ្ញៀវ ហើយសម្រាប់អាជីវករលក់ដូរនៅតាមតំបន់ទេសចរនានា ត្រូវលក់ប្រកបដោយភាពស្មោះត្រង់ មានក្រមសីលធម៌ សម្រាប់អ្នកជំនាញទេសចរណ៍ ត្រូវមានក្រមសីលធម៌សម្រាប់ភ្ញៀវផងដែរ»។
ក្នុងពិធីសម្ពោធជាផ្លូវការដ៏អធិកអធមនោះ លោកស្រី Aminta ប្រធានផ្នែកគ្រប់គ្រងទូទៅរបស់ក្រុមហ៊ុន ស្ព្រីងអ៊ែរឡាញប្រចាំប្រទេសថៃបានថ្លែងថា ៖«ថ្ងៃនេះក្រុមហ៊ុនអាកាសចរ ស្ព្រីងអ៊ែរឡាញ បានបើកសម្ពោធជាផ្លូវការ ជើងហោះហើរត្រង់ពីកម្ពុជាទៅស៊ីអាន និងពីកម្ពុជាទៅណានជីន ដោយហោះហើរជារៀងរាល់ថ្ងៃ»។
លោកស្រីបានបញ្ចាក់បន្ថែមនៅក្នុងកម្មវិធីថា៖ «ជើងហោះហើរថ្មីទាំង២នេះ នឹងចាប់ផ្ដើមហោះហើរ ចាប់ពីថ្ងៃទី២៨ ខែតុលា ឆ្នាំ២០១៩នេះតទៅ»៕
សម្រាប់ព័ត៌មានបន្ថែម៖
គេហទំព័រ https://en.ch.com/
ហ្វេសបុកផេក facebook.com/springairlines
(អត្ថបទពាណិជ្ជកម្ម)