ច្បាប់ / សិទិ្ធមនុស្ស / តុលាការ
ជាតិ
តុលាការកំពូល ឲ្យលោក រ៉ាត់ រត្នមុនី ជាប់ឃុំដដែល លោក រ៉ាត់ រត្នមុនី ស្រែកនិយាយទៅកាន់អ្នកសែត ពេលត្រូវបានបញ្ជូនទៅតុលាការកន្លងមក (រូបពី AFP)
× លោក រ៉ាត់ រត្នមុនី្ន ដែលរងការចោទប្រកាន់ថា បានផលិតខ្សែភាពយន្ត «ម្តាយខ្ញុំលក់ខ្ញុំ» ពុំត្រូវបានតុលាការកំពូល អនុញ្ញាតរស់នៅក្រៅឃុំតាមការស្នើសុំនោះទេ។ តុលាការកំពូល បានប្រកាសសាលដីកា កាលពីថ្ងៃទី២៨ ខែតុលា ឆ្នាំ២០១៩។
តុលាការកំពូល លើកហេតុផលថា សំណើសុំនៅក្រៅឃុំនេះ គឺធ្វើឡើងតាំងពីលោក រ៉ាត់ រត្នមុនី ស្ថិតក្នុងដំណាក់កាលស៊ើបសួរ (មិនទាន់ជំនុំជម្រះ) ប៉ុន្តែ មកដល់ពេលនេះ លោក រ៉ាត់ រត្នមុនី ត្រូវបានជំនុំជម្រះនិងត្រូវផ្តន្ទាទោសរួចហើយ ដូច្នេះ សំណើសុំនៅក្រៅឃុំ ត្រូវផុតរលត់ហើយ ដោយមិនអាចលើកយកមកសម្រេចឲ្យលោក រ៉ាត់ រត្នមុនី នៅក្រៅឃុំនោះទេ។
យ៉ាងណា លោក សំ ទិត្យសីហា មេធាវីរបស់លោក រ៉ាត់ រត្នមុនី បកស្រាយថា វា មិនមែនជាកំហុសរបស់លោកឡើយ តែជាកំហុសរបស់តុលាការកំពូល។ លោក ថ្លែងថា សំណើសុំនៅក្រៅឃុំនេះ គឺលោក បានដាក់ទៅតុលាការកំពូលតាំងពីខែកុម្ភៈ ឆ្នាំ២០១៩មកម្ល៉េះ ប៉ុន្តែតុលាការកំពូល មានភាពយឺតយ៉ាវខ្លួនឯង ដោយទុករហតុដល់ខែតុលា ឆ្នាំ២០១៩ ទើបបើកសវនាការលើសំណើនេះ ខណៈលោក រ៉ាត់ រត្នមុនី ត្រូវបានសាលាដំបូងរាជធានីភ្នំពេញ កាត់ទោសរួចទៅហើយ (សវនាការលើអង្គសេចក្តី) កាលពីខែមិថុនា ឆ្នាំ២០១៩។
លោកមេធាវី និយាយដូច្នេះ៖«នីតិវិធីរបស់តុលាការកំពូលយឺតយ៉ាវខ្លួនឯង ហើយមកបន្ទោសយើង។... យើង សោកស្តាយមែនទែន»។
អ្វីដែលនឹងត្រូវធ្វើបន្ត គឺលោកមេធាវី នឹងត្រឡប់ទៅដាក់សំណើនៅសាលាឧទ្ធរណ៍ ដើម្បីសុំឲ្យពន្លឿននីតិវិធីបើកសវនាការ។ សវនាការនៅសាលាឧទ្ធរណ៍នេះ គឺជាសវនាការ សុំជំទាស់នឹងសាលក្រមរបស់សាលាដំបូងរាជធានីភ្នំពេញ។
សាលាដំបូងរាជធានីភ្នំពេញ បានចេញសាលក្រមសម្រេចឲ្យលោក រ៉ាត់ រត្នមុនី ជាប់ពន្ធនាគារពីរឆ្នាំ ពាក់ព័ន្ធនឹងការផលិតខ្សែភាពយន្ត «ម្តាយខ្ញុំលក់ខ្ញុំ»។ លើសពីនេះ តុលាការរាជធានីភ្នំពេញ បានឲ្យលោក បង់ប្រាក់៣៥លានរៀល ទៅដើមបណ្តឹងផងដែរ។
ខ្សែភាពយន្ត «ម្តាយខ្ញុំ លក់ខ្ញុំ» បានធ្វើឲ្យលោក រ៉ាត់ រត្នមុនី រងពីបទ «ញុះញង់ឲ្យមានការរើសអើង»។ មេធាវី អះអាងជាដដែលៗថា លោក រ៉ាត់ រត្នមុនី មិនមែនជាអ្នកដឹកផលិតខ្សែភាពយន្តនេះទេ គឺគ្រាន់តែជាបកប្រែពីភាសាខ្មែរទៅជាភាសាអង់គ្លេសប៉ុណ្ណោះ។
អាជ្ញាធរខ្មែរ បានតាមដានខ្សែភាពយន្តឯកសារនេះ បន្ទាប់ពីសារព័ត៌មានដ៏ល្បីមួយរបស់រុស្ស៊ីឈ្មោះ RT យកទៅផ្សព្វផ្សាយ កាលពីចុងឆ្នាំ២០១៨។ អាជ្ញាធរខ្មែរ អះអាងថា ភាពយន្តឯកសារខាងលើ ដែលនិយាយពីការជួញដូរផ្លូវភេទ គឺជារឿងប្រឌិត ហើយធ្វើឲ្យប៉ះពាល់ដល់មុខមាត់របស់កម្ពុជា។
លោក រ៉ាត់ រត្នមុនី ត្រូវបានសមត្ថកិច្ចថៃ ចាប់បញ្ជូនមកកម្ពុជាវិញ កាលពីខែធ្នូ ឆ្នាំ២០១៨ ក្រោមកិច្ចសហការជាមួយសមត្ថកិច្ចខ្មែរ។ កន្លងមក ភរិយារបស់លោក និងប្រជាពលរដ្ឋមួយចំនួន ខិតខំសុំឲ្យស្ថានទូតរុស្ស៊ីប្រចាំកម្ពុជា ជួយធ្វើអន្តរាគមន៍ជាញឹកញាប់ដែរ តែមិនបានទទួលផលវិជ្ជមានឡើយ៕
Tag:
រ៉ាត់ រត្នមុនី
តុលាការកំពូល
© រក្សាសិទ្ធិដោយ thmeythmey.com