អន្តរជាតិ
អាមេរិកសម្រេចផ្អាកការហោះហើរដ្រូនផលិតដោយក្រុមហ៊ុនចិនលើទឹកដីខ្លួន ប្រភពរូប៖ AFP
× ក្រសួងមហាផ្ទៃអាមេរិក បានសម្រេចផ្អាកបណ្តោះអាសន្នការហោះហើរទាំងអស់របស់ដ្រូនដែលផលិតឡើងដោយក្រុមហ៊ុនចិន។ ចំណែកការលើកលែងគឺមានតែដ្រូនប្រើដើម្បីគោលដៅបន្ទាន់ប៉ុណ្ណោះ។
ដោយពុំផ្តល់ហេតុផលច្បាស់លាស់ជុំវិញការសម្រេចចិត្តនេះ អ្នកនាំពាក្យក្រសួងមហាផ្ទៃអាមេរិក លោក Nick Goodwin លើកឡើងថា៖«រហូតដល់ការត្រួតពិនិត្យបញ្ចប់រួចរាល់ ក្រសួងបានបញ្ជាថា ដ្រូនដែលផលិតក្នុងប្រទេសចិន ឬបង្កើតឡើងដោយផ្នែកខ្លះរបស់ចិន នឹងត្រូវផ្អាកហោះដើរ»។ លោក សង្កត់ធ្ងន់ថា ការត្រួតពិនិត្យលើដ្រូនចិននេះ ជាបញ្ជារបស់រដ្ឋមន្ត្រីមហាផ្ទៃអាមេរិក David Bernhardt ។
ការលើកលែងនៃចំណាត់ការនេះ គឺសម្រាប់ដ្រូនដែលយកទៅប្រើដើម្បីគោលដៅបន្ទាន់ ដូចជា ការប្រយុទ្ធនឹងភ្លើងឆេះព្រៃ, ស្វែងរកនិងសង្គ្រោះ និងទប់ទល់នឹងគ្រោះធម្មជាតិផ្សេងៗ។ លោក Goodwin លើកឡើងបែបនេះ នៅថ្ងៃទី១ វិច្ឆិកា។
តាមប្រភពដែលដឹងលឺរឿងនេះ ក្រសួងមហាផ្ទៃអាមេរិក មានដ្រូនប្រមាណ ៨១០គ្រឿង ហើយស្ទើរទាំងអស់នៃដ្រូនដែលពួកគេកាន់កាប់ សុទ្ធសឹងតែផលិតឡើងដោយក្រុមហ៊ុនចិន។ អ្វីដែលគួរឲ្យភ្ញាក់ផ្អើលនោះ គឺមានតែ២៤គ្រឿងប៉ុណ្ណោះ ដែលផលិតឡើងដោយក្រុមហ៊ុនអាមេរិក ហើយពួកវា ក៏ប្រើផ្នែកអេឡិចត្រូនិកខ្លះរបស់ចិន ដើម្បីផលិតផងដែរ។
មែនទែនទៅ ការសម្រេចចិត្តផ្អាកប្រតិបត្តិការនានារបស់ដ្រូនផលិតដោយក្រុមហ៊ុនចិន កើតឡើងក្រោយពីសហរដ្ឋអាមេរិកធ្លាប់បង្ហាញក្តីកង្វល់សន្តិសុខពាក់ព័ន្ធគ្រឿងអេឡិចត្រូនិករបស់ចិន។ កាលពីថ្ងៃឧសភា ក្រសួងសន្តិសុខមាតុភូមិអាមេរិក បានចេញការព្រមានថា ដ្រូនដែលផលិតដោយក្រុមហ៊ុនចិន អាចបង្កហានិភ័យដល់សន្តិសុខជាតិ។
ចាប់តាំងពីឆ្នាំ២០១៧មក មន្ទីរបញ្ចកោណអាមេរិក បានដាក់បម្រាមយោធាខ្លួនពីប្រើប្រាស់ដ្រូនចិន DJI ដោយលើកហេតុផលសន្តិសុខ។ យោងតាមរបាយការណ៍ជាច្រើន ក្រុមហ៊ុនចិន DJI ផលិតប្រមាណ ៧០ ភាគរយនៃដ្រូនពាណិជ្ជកម្មរបស់ពិភពលោក។
ក្រៅពីក្រុមហ៊ុនផលិតដ្រូនចិនដ៏ធំមួយនេះ ក្រុងវ៉ាស៊ីនតោន ក៏បានចាត់វិធានការប្រឆាំងក្រុមហ៊ុនទូរគមនាគមន៍ចិន Huawei ដោយហាមឃាត់ក្រុមហ៊ុនអាមេរិកពីការលក់ ឬផ្ទេរបច្ចេកវិទ្យាទៅកាន់ក្រុមហ៊ុននេះ។ ភ្នាក់ងារសម្ងាត់អាមេរិក ជឿជាក់ថា ក្រុមហ៊ុន Huawei នៅពីក្រោយដោយយោធាចិន ហើយបច្ចេកវិទ្យានិងសម្ភាររបស់ក្រុមហ៊ុននេះ អាចផ្តល់ឲ្យរដ្ឋាភិបាលចិនប្រើប្រាស់ដើម្បីធ្វើចារកម្មលើបណ្តាញទាក់ទងរបស់បណ្តាប្រទេសដទៃ៕
Tag:
សហរដ្ឋអាមេរិក
ចិន
ដ្រូន
© រក្សាសិទ្ធិដោយ thmeythmey.com