អត្ថបទពាណិជ្ជកម្ម
×![]()
ដោយ: ថ្មីៗ
ធនាគារឯកទេស វីង (ខេមបូឌា) លីមីតធីត ដែលជាធនាគារឈានមុខគេ ក្នុងការផ្តល់សេវាធនាគារចល័តនៅកម្ពុជា ត្រូវបានផ្តល់កិត្តិយសជាមួយពានរង្វាន់ធុរកិច្ចអាស៊ាន (ABA) ប្រចាំឆ្នាំ ២០១៩ ក្នុងប្រភេទ «សហគ្រាសសង្គមដែលមាននិរន្តរភាព» នាថ្ងៃទី២ ខែវិច្ឆិកា ឆ្នាំ២០១៩ នៅទីក្រុងបាងកក ប្រទេសថៃ។ នេះជាឆ្នាំទីបីហើយ ដែលក្រុមហ៊ុនដ៏ឆ្នើមមួយនេះ បានទទួលពានរង្វាន់ធុរកិច្ចអាស៊ាន។
ពិធីប្រគល់ពានរង្វាន់នេះ ត្រូវបានប្រារព្ធឡើង ក្រោមអធិបតីភាពឧបនាយករដ្ឋមន្ត្រីថៃ លោក Anutin Charnvirakul ដោយមានចូលរួមពីប្រធានគណៈកម្មាធិការអចិន្ត្រៃយ៍រួមគ្នាស្តីពីពាណិជ្ជកម្ម ឧស្សាហកម្ម និងធនាគារ (JSCCIB) លោក Kalin Sarasin ប្រធានសហព័ន្ធឧស្សាហកម្មថៃ លោក Supant Mongkolsuthree ក៏ដូចជាប្រធានសមាគមធនាគារិកថៃ លោក Predee Daochai ។
លោកជំទាវ ម៉ៅ ចំណាន អគ្គនាយិកាប្រតិបត្តិការ នៃធនាគារឯកទេស វីង (ខេមបូឌា) លីមីតធីត បានចូលរួមទទួលពានរង្វាន់នៅក្នុងកម្មវិធីនេះ។ លោកស្រីបានមានប្រសាសន៍ថា៖«យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះអតិថិជនទាំងអស់ និយោជិក និងដៃគូអាជីវកម្មជាច្រើនទៀត ដែលបានរួមចំណែកឲ្យធនាគារឯកទេស វីង (ខេមបូឌា) លីមីតធីតទទួលបានពានរង្វាន់នៅថ្ងៃនេះ។ បើគ្មានការចូលរួមគាំទ្រដ៏ធំធេងរបស់អ្នកទាំងអស់គ្នានោះទេ ចក្ខុវិស័យរបស់វីង នឹងមិនត្រូវបានទទួលស្គាល់ ព្រមទាំងមានការរីកចម្រើន មកដល់ពេលនេះទេ»។
អ្នកឧកញ៉ា គិត ម៉េង ប្រធានក្រុមប្រឹក្សាភិបាលនៃធនាគារឯកទេស វីង (ខេមបូឌា) លីមីតធីត បានមានប្រសាសន៍ថា៖«សមិទ្ធផលថ្ងៃនេះ ពិតជាឆ្លុះបញ្ចាំងពីការប្តេជ្ញាចិត្ត និងការខិតខំរបស់យើងនៅក្នុងប្រទេសកម្ពុជា ក៏ដូចជានៅក្នុងតំបន់ទាំងមូល។ ការទទួលស្គាល់មួយនេះ គឺជាការជំរុញទឹកចិត្តយើងឱ្យ ខិតខំដើរទៅមុខទៀត និងបន្តនាំមកនូវដំណោះស្រាយប្រកបដោយភាពច្នៃប្រឌិត តាមរយៈផលិតផលថ្មី ដែលបំពេញតម្រូវការអតិថិជនរបស់យើង»។
ពានរង្វាន់ធុរកិច្ចអាស៊ាន ត្រូវបានផ្តួចផ្តើមដោយ ASEAN-BAC ក្នុងឆ្នាំ២០០៧។ ជារៀងរាល់ឆ្នាំ ពួកគេទទួលស្គាល់សហគ្រាសសង្គមឆ្នើម ដែលមានលក្ខណៈច្នៃប្រឌិត និងបានចូលរួមវិភាគទានយ៉ាងសំខាន់ ដល់អ្នកខ្សត់ខ្សោយ នៅក្នុងសហគមន៍នានារបស់ពួកគេ។
លោក Manu Rajan អគ្គនាយកនៃធនាគារឯកទេស វីង (ខេមបូឌា) លីមីតធីត បានថ្លែងដោយមោទកភាពថា៖«ខ្ញុំពិតជាមានភាពត្រេកអរ និងសប្បាយរីករាយឥតឧបមា ដែលអាចគាំទ្របេសកកម្មរបស់ក្រុមហ៊ុនយើង ប្រកបដោយប្រសិទ្ធភាព ដែលការធ្វើបែបនេះ ជះឥទ្ធិពលជាវិជ្ជមាន ដល់ការទទួលបានសេវាហិរញ្ញវត្ថុតាមទូរស័ព្ទចល័ត សម្រាប់ប្រជាជនកម្ពុជា នៅក្នុងជីវិតប្រចាំថ្ងៃរបស់ពួកគេ»។
កាលពី ១០ ឆ្នាំមុន វីង បានចាប់ផ្តើមផ្ដល់សេវាផ្ទេរប្រាក់ ហើយក៏បានបន្តអភិវឌ្ឍន៍ខ្លួនរហូតមកដើម្បីផ្តល់ជូននូវផលិតផល រួមទាំងសេវាកម្មជាច្រើន ដែលកំពុងជំរុញកំណើននៃការទូទាត់ដោយមិនប្រើប្រាស់ក្រដាសប្រាក់ នៅក្នុងប្រទេសកម្ពុជា។ វីងនៅតែឈរនៅជួរមុខគេ នៃទីផ្សារសេវាផ្ទេរប្រាក់តាមទូរស័ព្ទ និងអេឡិចត្រូនិកនៅក្នុងប្រទេស ដែលមានសេវាគ្របដណ្តប់តាមស្រុក ១០០ ភាគរយ ជាមួយភ្នាក់ងារវីងជាង ៧០០០ កន្លែងទូទាំងប្រទេស។ អតិថិជនវីងអាចបញ្ចូលទឹកប្រាក់ក្នុងទូរស័ព្ទរបស់ពួកគេ ទូទាត់វិក័យប័ត្រ ផ្ទេរប្រាក់ ទិញទំនិញពីហាង តាមអ៊ីនធឺណិតនៅក្រៅប្រទេស កក់សំបុត្រយន្តហោះ ទូទាត់ថ្លៃអាហារ តាមរយៈសេវាកម្ម WingPay ដែលជាសេវាកម្មទូទាត់ប្រាក់ដោយស្កេន QR កូដ ហើយក៏អាចទទួលបានការផ្ញើប្រាក់ពីប្រទេសជាង ២០០ នៅទូទាំងពិភពលោក៕
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com
