អន្តរជាតិ
ក្រុមសិទ្ធិមនុស្ស ដាក់ពាក្យប្តឹងលោកស្រីស៊ូជី ទៅតុលាការអាហ្សង់ទីន ជុំវិញវិបត្តិរ៉ូហ៊ីងយ៉ា លោកស្រីអ៊ុងសាន ស៊ូជី ទីប្រឹក្សារដ្ឋ និងរដ្ឋមន្រ្តីក្រសួងការបរទេសមីយ៉ាន់ម៉ា, រូបភាព៖ Reuters
× ក្រុមសិទ្ធិមនុស្ស នៅថ្ងៃទី១៣ ខែវិច្ឆិកា បានដាក់ពាក្យប្តឹង មេដឹកនាំជាន់ខ្ពស់មីយ៉ាន់ម៉ាជាច្រើននាក់ ទៅតុលាការ នៅក្នុងប្រទេសអាហ្សង់ទីន ពាក់ព័ន្ធនៅនឹងបទឧក្រិដ្ឋប្រឆាំងជនជាតិភាគតិចរ៉ូហ៊ីងយ៉ា។ ក្នុងចំណោមមេដឹកនាំទាំងនោះ លោកស្រី អ៊ុងសាន ស៊ូជី ក៏មានឈ្មោះក្នុងពាក្យបណ្តឹងដែរ។ នេះគឺជាលើកទីមួយហើយ ដែលម្ចាស់ពានរង្វាន់សន្តិភាព ត្រូវរងការចោទប្រកាន់តាមផ្លូវច្បាប់ លើករណីរ៉ូហ៊ីងយ៉ា។
ផ្អែកទៅតាមគោលការណ៍«យុត្តាធិការសកល» ក្រុមសិទ្ធិមនុស្សអាមេរិកឡាទីន និងរ៉ូហ៊ីងយ៉ា បានដាក់ពាក្យបណ្តឹងទៅតុលាការ នៅក្នុងប្រទេសអាហ្សង់ទីន ទាក់ទិនទៅនឹងឧក្រិដ្ឋកម្មលើជនជាតិរ៉ូហ៊ីងយ៉ា និងដាក់ទណ្ឌកម្មទៅលើជនទាំងឡាយណា ដែលបានប្រព្រឹត្តបទឧក្រិដ្ឋទាំងនេះ។
ប្រាប់ទីភ្នាក់ងារព័ត៌មានAFP លោកមេធាវី Tomas Ojea បានលើកអះអាងថា ពាក្យបណ្តឹងមួយនេះ ធ្វើឡើង ដើម្បីដាក់ទណ្ឌកម្មលើឧក្រិដ្ឋជន អ្នកផ្សំគំនិត និង ជនទាំងឡាយណា ដែលជួយលាក់បាំងអំពើប្រល័យពូជសាសន៍។ ក្នុងចំណោមជនទាំងនោះ អគ្គមេបញ្ជាការកងទ័ព Min Aung Hlaing និងលោកស្រីអ៊ុងសាន ស៊ូជី ទីប្រឹក្សារដ្ឋ និងរដ្ឋមន្ត្រីការបរទេសមីយ៉ាន់ម៉ា ត្រូវប្រឈមពី បទគំរាមកំហែង លើជនជាតិរ៉ូហ៊ីងយ៉ា។ ទន្ទឹមនេះ លោកមេធាវី បានបន្តប្រាប់ថា មូលហេតុដែលដាក់ទៅតុលាការនៅក្នុងអាហ្សង់ទីន គឹដោយសារតែក្រុមសិទ្ធិមនុស្សអាមេរិកឡាទីន មិនមានលទ្ធភាពដាក់ពាក្យបណ្តឹងនៅកន្លែងផ្សេងទៀត។
ពាក់ព័ន្ធទៅនឹងវិបត្តិរ៉ូហ៊ីងយ៉ា អ្នកស៊ើបអង្កេតអង្គការសហប្រជាជាតិ បានចាត់ទុកសកម្មភាពបង្ក្រាបរបស់យោធាមីយ៉ាន់ម៉ាក្នុងឆ្នាំ២០១៧ ជាអំពើប្រល័យពូជសាសន៍ បន្ទាប់ពីជនជាតិភាគតិចរ៉ូហ៊ីងយ៉ាប្រមាណជា ៧៤ម៉ឺននាក់ បានភៀសខ្លួនចេញទៅប្រទេសបង់ក្លាដែស។ ចំណែកក្រុមសិទ្ធិមនុស្ស បានរុញករណីមួយនេះ ទៅតុលាការអាហ្សង់ទីន ឲ្យស៊ើបអង្កេតលើមេដឹកនាំស៊ីវិលផងដែរ។
បើតាមការបញ្ជាក់របស់ក្រុមសិទ្ធិមនុស្ស មេដឹកនាំស៊ីវិលត្រូវស៊ើបអង្កេត ដោយផ្អែកទៅលើហេតុផលមួយចំនួន ក្នុងនោះរួមមាន ការចូលរួមផ្សំគំនិតជាមួយមេបញ្ជាការយោធាជាន់ខ្ពស់ បរាជ័យរបស់រដ្ឋាភិបាលក្នុងរិះគន់ លើប្រតិបត្តិការរបស់យោធា ការចូលរួមលាក់បាំងអំពើប្រល័យពូជសាសន៍ជាដើម។ នេះបើតាម AFP ។
ចាប់តាំងពីឆ្នាំ ២០១៧មក មីយ៉ាន់ម៉ា ទទួលរងសម្ពាធជាច្រើនពីអន្តរជាតិ។ ជាក់ស្តែង ថ្មីៗនេះ ប្រទេសហ្គំប៊ី បានដាក់ពាក្យប្តឹងមីយ៉ាន់ម៉ាទៅតុលាការយុត្តិធម៌អន្តរជាតិ នៅទីក្រុងឡាអេ ប្រឆាំងនឹងបទឧក្រិដ្ឋប្រល័យពូជសាសន៍ និងអ្នកពាក់ព័ន្ធ។ បន្ថែមពីនេះ នៅក្នុងឆ្នាំ២០១៨ ព្រះរាជអាជ្ញាតុលាការឧក្រិដ្ឋកម្មអន្តរជាតិ បានបើកការស៊ើបអង្កេតបឋមមួយ នៅក្នុងជំរុំជនភៀសខ្លួនរ៉ូហ៊ីងយ៉ា ក្នុងទឹកដីបង់ក្លាដែស។
គួររំលឹកថា កន្លងមកតុលាការអាហ្សង់ទីន ធ្លាប់បានកាត់ក្តី ដោយផ្អែកទៅលើគោលការណ៍ «យុត្តាធិការសកល» លើលោក Francisco Franco អតីតជនផ្តាច់ការនៅក្នុងប្រទេសអេស្ប៉ាញ និងចលនា Falun Gong នៅក្នុងប្រទេសចិន៕
Tag:
មីយ៉ាន់ម៉ា
អ៊ុងសាន ស៊ូជី
អាហ្សង់ទីន
© រក្សាសិទ្ធិដោយ thmeythmey.com