ជាតិ
ពីនេះ ពីនោះ
«និង»,«នឹង» និង«ហ្នឹង» ប្រើខុសគ្នាក្នុងសំណេរ
× «និង»,«នឹង» និង«ហ្នឹង»ជាពាក្យដែលពលរដ្ឋប្រើជាញឹកញាប់នៅក្នុងសំណេរ តែក៏មានអ្នកខ្លះប្រើច្រឡំគ្នាផងដែរ។ វចនានុក្រមខ្មែរបានពន្យល់ពីការប្រើពាក្យទាំងអស់នេះ ជៀសវាងកុំឲ្យមានការយល់ច្រឡំទៀត។
ពាក្យ «និង» មានន័យថា សម្រាប់និយាយតពាក្យ ឬតឃ្លារបះពីមួយទៅមួយ ដែលមានដំណើរសេចក្តីថា ទាំង, ព្រមទាំង, ផង, នេះ។ ឧទាហរណ៍៖ អ្នកនិងខ្ញុំ, គោនិងក្របី, សុខនិងទុក្ខ, យកចាននិងផ្តិលមកផង។ ល។
ចំពោះ«នឹង»វិញ មានន័យថា សម្រាប់និយាយនាំមុខកិរិយាសព្ទប្រាប់អនាគតកាលទៅខាងមុខថា មុខជា, ប្រាកដជា, គង់តែ។ ឧទាហរណ៍៖ ស្អែកនឹងទៅផ្ទះអ្នក, យើងគង់តែនឹងបានជួបគ្នាទៀតក្នុងថ្ងៃណាមួយពុំខាន។ ប្រើក្នុងន័យមួយទៀតមានន័យថា ស្ងៀម, មិនកម្រើក, មិនប្រែប្រួល, មិនឡើងមិនចុះ។ ឧទាហរណ៍៖ អង្គុយនឹងថ្កល់ និងទឹកនឹង គឺទឹកដែលមិនឡើងមិនស្រកឬមិនហូរ។ល។
កាលណាគេប្រើពាក្យ«ហ្នឹង» ឯនេះវិញ មានន័យថា ហ្នឹងហើយ, ហ្នឹងឯង, ដំណើរហ្នឹង។ ពាក្យនេះប្រើសម្រាប់តែនិយាយប៉ុណ្ណោះ មិនមែនប្រើសម្រាប់សរសេរឡើយ។ ឧទាហរណ៍៖ ឯងហ្នឹងហើយដែលត្រូវទៅមុន៕
© រក្សាសិទ្ធិដោយ thmeythmey.com