ជាតិ
ស្ពានអាកាសថ្មើរជើងមុខផ្សារដើមគរ និងមុខបឋមសន្ធរម៉ុក នឹងលេចរូបរាង នៅពាក់កណ្ដាលឆ្នាំ២០២០
×
ដោយ៖ ផាត ដាណេ
ភ្នំពេញ៖ អាជ្ញាធររាជធានីភ្នំពេញ កំណត់ធ្វើស្ពានអាកាសថ្មើរជើង២កន្លែង ដែលមានទីតាំងស្ថិតនៅផ្សារដើមគរ និងនៅមុខបឋមសិក្សាសន្ធរម៉ុក ឲ្យរួចត្រឹមពាក់កណ្ដាលឆ្នាំ២០២០។ នេះបើតាមការផ្សាយរបស់ក្រសួងព័ត៌មាន។
កាលពីថ្ងៃទី១៤ ខែវិច្ឆិកា ឆ្នាំ២០១៩ លោក ឃួង ស្រេង អភិបាលរាជធានីភ្នំពេញបានដឹកនាំកិច្ចប្រជុំមួយស្ដីពីការបើកការដ្ឋានសាងសង់ស្ពានអាកាសថ្មើរជើងរបស់ក្រុមហ៊ុន Space Media ដែលជាកន្លែងមានភាពមមាញឹកក្នុងការឆ្លងកាត់ នៅរាជធានីភ្នំពេញ។
ក្នុងការសាងសងនេះ អាជ្ញាធរបានជំរុញឲ្យក្រុមហ៊ុនចុះស្ថាបនាស្ពានអាកាសថ្មើរជើងនៅតំបន់ផ្សារដើមគរ និងនៅមុខបឋមសិក្សាសន្ធរម៉ុក ចាប់ពីសប្ដាហ៍នេះទៅដើម្បីឲ្យទាន់ក្នុងរយៈពេល៦ខែទៀត។ ការរៀបចំសាងសង់នេះដែរ ធ្វើឡើង ដើម្បីសម្រួលដល់ការធ្វើដំណើររបស់ប្រជាពលរដ្ឋ ពិសេសសិស្សានុសិស្សអាចធ្វើដំណើរឆ្លងកាត់ផ្លូវប្រកបដោយសុវត្ថិភាព។
គម្រោងស្ថាបនាស្ពានអាកាសថ្មើរជើងនៅតំបន់មុខផ្សារដើមគរ បានចាប់ផ្ដើមសាងសង់បណ្ដើរៗហើយ ដោយការកំណត់ទីតាំងការដ្ឋាន ការខួងដី និងការដោះស្រាយផលប៉ះពាល់ជាមួយពលរដ្ឋជាដើម។ ចំណែកគម្រោងស្ថាបនាស្ពានអាកាសថ្មើរជើងនៅត្រង់ចំណុចមុខបឋមសិក្សាសន្ធរមុខវិញ នឹងចុះកំណត់សាងសង់នៅសប្ដាហ៍ក្រោយ ព្រោះត្រូវសិក្សាឲ្យបានល្អិតល្អន់ ដោយសារស្ពានអាកាសនេះនៅលើចំណុចផ្លូវប្រសព្វទាំង៤ទិសតែម្ដង។
លោក ឃួង ស្រេង អះអាងថា គម្រោងស្ថាបនាស្ពានអាកាសថ្មើរជើងទាំង២ ធ្វើឡើងឲ្យធានាបានគុណភាពខ្ពស់បំផុតរហូតដល់៥០ឆ្នាំឡើងទៅ។ លោក បញ្ជាក់ដូច្នេះថា៖«ស្ថាបនាឲ្យលឿនហើយដំណើរការភ្លាម ដើម្បីយើងដោះស្រាយផលប៉ះពាល់បន្ថែម ឈានទៅការសាងសង់ឲ្យបានលឿនព្រោះជាគម្រោងសាកល្បងមិនត្រឹមតែថ្នាក់ដឹកនាំចាំមើលនោះទេ ប្រជាពលរដ្ឋក៏ទន្ទឹងចង់បានស្ពានអាកាសថ្មើរជើងនេះដែរ»។
បន្ថែមពីលើនេះ តំណាងក្រុមហ៊ុន Space Media បានសន្យាថានឹងអនុវត្តផែនការស្ថាបនាគ្រោងស្ពានអាកាសថ្មើរជើងទាំង២កន្លែងនេះឲ្យហើយ តាមកាលកំណត់ និងប្រកបដោយគុណភាព។
សូមបញ្ជាក់ផងដែរថា រហូតមកដល់ពេលបច្ចុប្បន្ន ស្ពានអាកាសថ្មើរជើងមាន៣កន្លែងហើយ គឺនៅតំបន់ជម្ពូវ័ន២កន្លែង និង១កន្លែងទៀត នៅតំបន់ភ្លើងស្តុបនាងគង្ហីង៕
© រក្សាសិទ្ធិដោយ thmeythmey.com