អន្តរជាតិ
កូរ៉េខាងជើង ធ្វើសមយុទ្ធយោធា ខណៈលោក ត្រាំ ជំរុញឲ្យលោក គីម ចូលតុចរចាជាថ្មី មេដឹកនាំកូរ៉េខាងជើង គីម ជុងអ៊ុន ជាមួយក្រុមអ្នកបើកយន្តហោះ, រូបភាព៖ Reuters
× មេដឹកនាំលោក គីម ជុងអ៊ុន បានចេញមុខត្រួតពិនិត្យមើល សមយុទ្ធកងទ័ពអាកាសជាលើកទី២ ក្នុងរយៈពេល ៣ថ្ងៃ។ នេះបើតាមការចុះផ្សាយរបស់ទីភ្នាក់ងារព័ត៌មានកូរ៉េខាងជើង KCNA នៅថ្ងៃទី១៨ ខែ វិច្ឆិកា ដែលធ្វើឡើងតែមួយថ្ងៃប៉ុណ្ណោះក្រោយ អាមេរិក និងកូរ៉េខាងត្បូង ពន្យារពេលធ្វើសមយុទ្ធរួមគ្នា។ សមយុទ្ធនេះ ទំនងធ្វើឡើងស្របពេលលោក ដូណាល់ ត្រាំ បានជំរុញឲ្យកូរ៉េខាងជើងចូលតុចរចាឲ្យឆាប់បំផុត។
ត្រឹមរយៈពេលតែ ៣ថ្ងៃប៉ុណ្ណោះ មេដឹកនាំ គីម ជុងអ៊ុន បានចូលរួមត្រួតពិនិត្យដោយផ្ទាល់ ក្នុងសមយុទ្ធយោធាកូរ៉េខាងជើងរហូតដល់ទៅពីរដង។ ជាក់ស្តែងនាថ្ងៃទី១៦ ខែវិច្ឆិកា លោកគីម ជុងអ៊ុន បានចូលរួមមើលការប្រកួតប្រជែងបើកយន្តហោះចម្បាំងជាលើកទីមួយ ។ អស់ពីមើលការសាកល្បងយន្តហោះចម្បាំង ប្រមុខដឹកនាំកូរ៉េខាងជើង ក៏បានឆ្លៀតថតរូប និងសើចយ៉ាងសប្បាយជាមួយក្រុមអ្នកបើកយន្តហោះផងដែរ។
ចំណែកលើកទីពីរ ប្រមុខដឹកនាំកូរ៉េខាងជើងរូបនេះ បានទៅមើលសមយុទ្ធរបស់កងទ័ពលោតឆត្រយោង និងកងកម្លាំងប្រឆាំងយន្តហោះទៀត។ នេះបើតាមការចុះផ្សាយរបស់ទីភ្នាក់ងារព័ត៌មាន KCNA នៅថ្ងៃចន្ទ ទី១៨ ខែវិច្ឆិកា។
ក្នុងព្រឹត្តិការណ៍មួយនេះ លោកគីម បានលើកឡើងថា ការធ្វើសមយុទ្ធយោធាលើកនេះ គឺសំខាន់ណាស់ ដើម្បីឲ្យកងកម្លាំងយោធាកូរ៉េខាងជើង បានត្រៀមខ្លួនឲ្យបានល្អ។ នេះបើតាមការស្រង់ពាក្យសម្តីមេដឹកនាំ កូរ៉េខាងជើងពីសំណាក់ទីភ្នាក់ងារព័ត៌មាន KCNA។
ការចុះផ្សាយរបស់ទីភ្នាក់ងារកូរ៉េខាងជើងដូចខាងលើនេះ គឺធ្វើឡើងតែមួយថ្ងៃប៉ុណ្ណោះ ក្រោយលោក ម៉ាក អេស្ពើ រដ្ឋមន្ត្រីការពារជាតិអាមេរិក និង លោកJeong Kyeong-doo រដ្ឋមន្ត្រីការពារជាតិកូរ៉េខាងត្បូង បានប្រកាសនាទីក្រុងបាងកក ថ្ងៃទី១៧ ខែវិច្ឆិកា ថា ការធ្វើសមយុទ្ធយោធារវាងទីក្រុងវ៉ាស៊ីនតោន និងទីក្រុងសេអ៊ូល ត្រូវលើកយកទៅធ្វើនៅពេលក្រោយ។
អស់ពីបញ្ហាសមយុទ្ធយោធានៅលើឧបទ្វីបកូរ៉េ ភាគីអាមេរិក បានលើកឡើងពីកិច្ចចរចារំសាយកម្មវិធីនុយក្លេអ៊ែរម្តង។ ពិតណាស់ ប្រធានាធិបតីអាមេរិក ត្រាំ បានចេញមុខម្តងទៀត តាមរយៈការសរសេរនៅលើបណ្តាញសង្គម Twitter។ ក្នុងនោះ លោកត្រាំ បានជំរុញឲ្យមេដឹកនាំគីម ចូលតុចរចាសារជាថ្មី និងចុះហត្ថលេខាលើកិច្ចព្រមព្រៀងរំសាយកម្មវិធីនុយក្លេអ៊ែរឲ្យបានយ៉ាងឆាប់រហ័ស។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
សូមបញ្ជាក់ថា កិច្ចចរចារវាងអាមេរិក និងកូរ៉េខាងជើង បានទទួលរងបរាជ័យម្តងហើយម្តងទៀត ចាប់តាំងពីកិច្ចចរចានៅប្រទេសសិង្ហបុរីមក។ ប៉ុន្តែបើតាមការអះអាងរបស់ប្រមុខចរចាកូរ៉េខាងជើង គីម ម្យ៉ុងគីល(Kim Myong-gil) នៅថ្ងៃទី១៥ ខែវិច្ឆិកា អាមេរិក បានបបួលកូរ៉េខាងជើង ឲ្យចាប់ផ្តើមកិច្ចចរចាថ្នាក់ក្រុមការងារម្តងទៀតនៅខែក្រោយ ដើម្បីដោះស្រាយបញ្ហានុយក្លេអ៊ែរ៕
Tag:
កូរ៉េខាងជើង
អាមេរិក
© រក្សាសិទ្ធិដោយ thmeythmey.com