អន្តរជាតិ
អ្នកចរចាតំណាងអាមេរិក James DeHart (ខាងឆ្វេង) និង អ្នកចរចាតំណាងកូរ៉េខាងត្បូងJeong Eun-bo,រូបភាព៖ Yonhap
×![]()
ដោយ: ធៀន ភារិន្ទ
កិច្ចចរចាលើវិភាគទានយោធារវាងទីក្រុងវ៉ាស៊ីនតោន និងទីក្រុងសេអ៊ូល បានបរាជ័យ នៅថ្ងៃទី ១៩ ខែវិច្ឆិកា បន្ទាប់ពីអ្នកតំណាងចរចាអាមេរិក បានដើរចេញពីកិច្ចប្រជុំ។ ទំហំទឹកប្រាក់ដែលកូរ៉េខាងត្បូងត្រូវចេញសម្រាប់យោធាអាមេរិកនៅលើទឹកដីខ្លួន គឺជាបញ្ហាខ្ទាស់ ខណៈអាមេរិកចង់ឲ្យកូរ៉េខាងត្បូងបង្កើនការចំណាយឲ្យបានប្រាំដង។
កិច្ចចរចាវិភាគទានយោធារវាងអាមេរិក និងកូរ៉េខាងត្បុង បានចាប់ផ្តើមឡើងនាថ្ងៃទី១៨ ខែវិច្ឆិកា និងបញ្ចប់នៅថ្ងៃទី ១៩ ខែវិច្ឆិកា។ មិនមានលទ្ធផលអ្វីពីការចរចាឡើយ ខណៈតំណាងចរចាអាមេរិកបានដើរចេញពីកិច្ចប្រជុំនៅថ្ងៃចុងក្រោយ។ ភាគីទាំងពីររនៅតែមិនទាន់យល់ស្របគ្នាលើចំនួនវិភាគទានដែលកូរ៉េខាងត្បូងត្រូវបង់នៅឆ្នាំក្រោយ។
តាមរយៈកិច្ចចរចាពីរថ្ងៃនេះ អាមេរិក បានទាមទារឲ្យកូរ៉េខាងត្បូងត្រូវបង់វិភាគទានយោធា ច្រើនជាងពេលបច្ចុប្បន្នរហូតដល់ទៅ ៥ដងច្រើនជាងមុន។ ពោលគឺ ទីក្រុងវ៉ាស៊ីនតោន បានទាមទារឲ្យទីក្រុងសេអ៊ូល ចំណាយថវិការហូតដល់ ៥ពាន់លានដុល្លារសម្រាប់ឆ្នាំក្រោយ ខណៈពេលកូរ៉េខាងត្បូងបង់ត្រឹមតែ ៨៧០លានដុល្លារប៉ុណ្ណោះសម្រាប់ឆ្នាំ២០១៩ សម្រាប់កងទ័ពអាមេរិកជិត ៣ម៉ឺននាក់។
អ្នកចរចាតំណាងអាមេរិក James DeHart បានដើរចេញពីកិច្ចប្រជុំ ដោយសារតែភាគីកូរ៉េខាងត្បូងមិនទទួលសំណើរបស់ភាគីអាមេរិកដែលទាមទារឲ្យក្រុងសេអ៊ូលជួយកាត់បន្ថយការចំណាយ និងបន្ទុករបស់អាមេរិក។ លោក Jame បានប្រាប់មូលហេតុការដើរចេញពីកិច្ចប្រជុំថា ភាគីអាមេរិក ចង់ទុកពេលឲ្យកូរ៉េខាងត្បូងពិចារណា និងដាក់សំណើជាថ្មី ដើម្បីឲ្យភាគីទាំងសងខាងអាចបង្កើតកិច្ចព្រមព្រៀងមួយ ដែលអាចទទួលយកបាន។ លោកបញ្ជាក់ទៀតថា កិច្ចចរចានឹងធ្វើម្តងទៀត នៅពេលទីក្រុងសេអ៊ូលបានត្រៀមខ្លួនរួចរាល់។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។
ទាក់ទិនទៅនឹងបញ្ហានេះ ភាគីកូរ៉េខាងត្បូងសន្យាថា នឹងធ្វើការយ៉ាងអត់ធ្មត់ និងខិតខំបន្ថែមទៀត ដើម្បីសម្រេចកិច្ចព្រមព្រៀងមួយ ដែលភាគីទាំងពីរអាចទទួលយកបាន។ នេះបើតាមការអះអាងរបស់លោក Jeong Eun-bo អ្នកចរចាតំណាងកូរ៉េខាងត្បូង។ ក្នុងន័យនេះ លោក Jeong ក៏មិនបានបដិសេធដែរ ពីការលើកសំណើខុសគ្នារវាងភាគីអាមេរិក និងកូរ៉េខាងត្បូង ពាក់ព័ន្ធទៅនឹងចំនួនទឹកប្រាក់។
ជាមួយគ្នានេះ លោក Jeong បានបន្តថា ភាគីអាមេរិក បានស្នើឲ្យកូរ៉េខាងត្បូងបង្កើនការចំណាយយោធាយ៉ាងច្រើន ជាពិសេសទាមទារឲ្យបង្កើតមាត្រាថ្មីទៀតពាក់ព័ន្ធការដំឡើងទំហំទឹកប្រាក់យោធា ក្នុងកិច្ចព្រមព្រៀងស្តីពីវិភាគទានយោធា (SMA)។
បន្ទាប់ពីកិច្ចចរចាបានទទួលបរាជ័យ វាមានបញ្ហាចោទសួរថាតើអាមេរិកអាចនឹងដកទ័ពចេញពីកូរ៉េខាងត្បូងដែរឬទេ ប្រសិនបើកិច្ចចរចាខាងមុននៅតែបរាជ័យ។ ទាក់ទងបញ្ហានេះ លោក ម៉ាក អាស្ពើ រដ្ឋមន្ត្រីការពារជាតិ លើកឡើងថា ភាគីទាំងពីរ នឹងចរចាបន្តទៀត។ យ៉ាងណាក៏ដោយ លោកនៅតែជឿថា កូរ៉េខាងត្បូងនៅតែអាចបង់វិភាគទានយោធាបានដដែល។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
ផ្អែកទៅតាមកិច្ចព្រមព្រៀងវិភាគទានយោធារវាងអាមេរិក និងកូរ៉េខាងត្បូង កិច្ចព្រមព្រៀងខាងលើនឹងត្រូវបញ្ចប់នៅចុងឆ្នាំ២០១៩នេះ ហើយទីក្រុងសេអ៊ូល បានយល់ព្រមបង់ថវិកាយោធាត្រឹមតែ ៨៧០លានដុល្លារប៉ុណ្ណោះ។ ចាប់តាំងពីឆ្នាំ ១៩៩១មក ទីក្រុងសេអ៊ូល បានចូលរួមបង់វិភាគទានយោធាជាមួយអាមេរិក តាមរយៈកិច្ចព្រមព្រៀងស្តីពីវិភាគទានយោធា (SMA) ៕
Tag:
អាមេរិក
កូរ៉េខាងត្បូង
© រក្សាសិទ្ធិដោយ thmeythmey.com
