អាជ្ញាធរ ផ្អាកការសាងសង់អាគារ៤២ជាន់ ក្រោយដែកធ្លាក់លើរថយន្តតាមផ្លូវ

ជាតិ

អាជ្ញាធរ ផ្អាកការសាងសង់អាគារ៤២ជាន់ ក្រោយដែកធ្លាក់លើរថយន្តតាមផ្លូវ

20, Nov 2019 , 5:14 pm

រូបភាព

ដោយ: ថ្មីៗ

ភ្នំពេញ៖ រដ្ឋបាលរាជធានីភ្នំពេញ បានផ្អាកការដ្ឋានសាងសង់អគារ៤២ជាន់ (Gold Tower42) ជាបណ្តោះអាសន្ន ចាប់ពីថ្ងៃទី២០វិច្ឆិកា ឆ្នាំ២០១៩នេះ តទៅ។ នេះបើតាម លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ។ ចំណាត់ការនេះ គឺធ្វើឡើងបន្ទាប់ពីមានដែកធា្លក់ពីសំណង់អាគារ៤២ជាន់ មកលើរថយន្តមួយគ្រឿង តាមបណ្តោយផ្លូវព្រះមុនីវង្ស នារសៀសថ្ងៃទី២០ វិច្ឆិកានេះ។

អត្ថបទទាក់ទង

ធ្លាក់ដែកពីអាគារ៤២ជាន់ បណ្ដាលឱ្យរថយន្តមួយគ្រឿងខូចខាតផ្នែកក្រោយស្ទើរទាំងស្រុង

ថ្លែងប្រាប់សារព័ត៌មាន ThmeyThmey តាមទូរសព្ទ លោក ម៉េត មាស ភក្តី បាននិយាយថា ការសម្រេចផ្អាកការសាងសង់អាគារ៤២ជាន់ភ្លាមៗនេះ គឺដោយសារតែសំណង់នេះ តែងតែបង្កភាពព្រួយបារម្ភដល់ពលរដ្ឋដែលធ្វើដំណើរនៅលើផ្លូវព្រះមុនីវង្ស និងផ្លូវព្រះសីហនុ នៅរាជធានីភ្នំពេញ។ បើតាមអ្នកនាំពាក្យរូបនេះ អាជ្ញាធររាជធានីភ្នំពេញ តែងតែណែនាំដល់ការដ្ឋានសាងសង់អាគារមួយនេះ ដើម្បីបង្ការគ្រោះថ្នាក់ ឬហានិភ័យផ្សេងៗដែលកើតឡើងជាយថាហេតុ។

កាលពីចុងខែកក្កដា ឆ្នាំ២០១៩ ក៏មានសរសៃដែកមួយបានធា្លក់ពីលើអាគារ៤២ជាន់នេះ លើរថយន្ត ដែលកំពុងធ្វើដំណើរលើផ្លូវព្រះសីហនុ ដែលបានបង្កភាពព្រួយបារម្ភជាខ្លាំងដល់ពលរដ្ឋធ្វើដំណើរតាមដងវិថីនេះ។

សូមរម្លឹកផងដែរថា សំណង់អាគារ៤២ជាន់ មានទីតាំងស្ថិតនៅប្រសព្វផ្លូវព្រះមុនីវង្ស និងផ្លូវព្រះសីហនុ ក្នុងសង្កាត់បឹងកេងកង១ ខណ្ឌបឹងកេងកង រាជធានីភ្នំពេញ។ សំណង់នេះ បានចាប់ផ្តើមដំណើរការសាងសង់ឡើងវិញនៅក្នុងខែកុម្ភៈ ឆ្នាំ២០១៧ បន្ទាប់ពីអាគារនេះបានផ្អាកដំណើរការសាងសង់ជាច្រើនលើកមកហើយ។ អគារនេះ ចាប់ផ្តើមសាងសង់លើកដំបូងនៅក្នុងឆ្នាំ២០០៨៕