អន្តរជាតិ
ប្រមុខការទូតចិន៖ អាមេរិកជាប្រភពបង្កអស្ថិរភាពធំជាងគេលើពិភពលោក
× រដ្ឋមន្ត្រីការបរទេសចិន វ៉ាង យី នៅថ្ងៃទី២៣ ខែវិច្ឆិកា បាននិយាយវាយប្រហារអាមេរិកជាប្រភពបង្កអស្ថិរភាពធំជាងគេលើពិភពលោក ហើយតែងតែវាយប្រហារចិនដោយគ្មានភស្តុតាងជាក់លាក់។ លោក វ៉ាង យី វាយប្រហារអាមេរិកចំៗបែបនេះនៅឯកិច្ចប្រជុំរដ្ឋមន្ត្រីការបរទេសប្រទេសឧស្សាហកម្មជឿនលឿនទាំង២០ នៅទឹកដីជប៉ុន។
នាជំនួបជាមួយប្រមុខការទូតហូឡង់ Stef Blok នៅក្រៅកិច្ចប្រជុំរដ្ឋមន្ត្រីការបរទេសប្រទេសមានសេដ្ឋកិច្ចរីកចម្រើនទាំង២០ (G20) ប្រមុខការទូតចិន វ៉ាង យី បានរិះគន់អាមេរិកចំៗដោយមិនបានទុកមុខអ្វីឡើយ។ សព្វថ្ងៃ អាមេរិក និងចិន កំពុងជាប់ផុងគ្នាជម្លោះពាណិជ្ជកម្មដែលកំពុងរកច្រកចេញមិនទាន់ឃើញ បញ្ហាសិទ្ធិមនុស្ស បញ្ហានៅហុងកុង និងសំណុំរឿងចាស់នៅតៃវ៉ាន់ដែលអាមេរិកបន្តគាំទ្រដែនកោះមួយនេះ។
បើតាមទីភ្នាក់ងារព័ត៌មាន Reuters លោក វ៉ាង យី ដែលជាទីប្រឹក្សារដ្ឋផងនោះ បានប្រាប់លោក Blok នាជំនួបនៅ Nagoya ថា អាមេរិក កំពុងអនុវត្តគោលការណ៍ឯកតោភាគីនិយម និងគាំពារនិយមយ៉ាងទូលំទូលាយ ហើយក៏កំពុងបំផ្លាញពហុភាគីនិយម ក៏ដូចជាប្រព័ន្ធពាណិជ្ជកម្មពហុភាគីនិយមផងដែរ។ ប្រមុខការទូតចិនបន្តថា៖ «អាមេរិកក៏ក្លាយជាកម្លាំងបង្កអសិ្ថរភាពធំជាងគេលើពិភពលោកផងដែរ។»
មិនអស់ត្រឹមនេះឡើយ លោក វ៉ាង យី ក៏បន្តរិះគន់អាមេរិកទៀតថា ក្រោមគោលដៅនយោបាយ អាមេរិកក៏ប្រើប្រាស់ឧបករណ៍រដ្ឋដើម្បីធ្វើទុក្ខបុកម្នេញក្រុមហ៊ុនស្របច្បាប់របស់ចិន ហើយចោទប្រកាន់ពួកគេដោយគ្មានមូលដ្ឋានទៀតផង។ លោក វ៉ាង យី ទំនងចង់សំដៅដល់ករណីអាមេរិករឹតត្បិតការរកស៊ីរបស់ក្រុមហ៊ុនបច្ចេកវិទ្យា Huawei និង ZTE ជាដើមក្រោមហេតុផលសន្តិសុខជាតិ។ ក្រោយមក អាមេរិកបានបន្ធូរការររឹតត្បិតនេះបន្តិច។
«អ្នកនយោបាយអាមេរិកខ្លះ បានធ្វើយុទ្ធនាការប្រឆាំងចិនគ្រប់ទីកន្លែងលើពិភពលោក ប៉ុន្តែមិនបានបង្កើតភស្តុតាងអ្វីឡើយ។» នេះជាការលើកឡើងរបស់ប្រមុខការទូតចិន ហើយបន្តទៀតថា ក្រុងវ៉ាស៊ីនតោន ក៏ប្រើប្រាស់ច្បាប់ក្នុងស្រុករបស់ខ្លួនដើម្បីជ្រៀតជ្រែកដោយចំហចូលក្នុងកិច្ចការផ្ទៃក្នុងរបស់ចិន តាមរយៈការព្យាយមបំផ្លាញគោលនយោបាយ «ប្រទេសមួយ ប្រព័ន្ធពីរ» និងស្ថិរភាព ក៏ដូចជាវិបុលភាពនៅហុងកុង។
និយាយរឿងហុងកុងនេះ ចិនទំនងមិនទាន់បាត់ក្ដៅស្លឹកត្រចៀកផង បន្ទាប់ពីសភាទាំងពីររបស់អាមេរិកទើបអនុម័តច្បាប់មួយស្ដីពីហុងកុង។ បច្ចុប្បន្ន សេចក្ដីស្នើច្បាប់នេះ ស្ថិតក្នុងដៃប្រធានាធិបតីអាមេរិក ដូណាល់ ត្រាំ រង់ចាំហត្ថលេខាមុននឹងក្លាយជាច្បាប់។ យ៉ាងណាមិញ លោក ត្រាំ ហាក់រារែកក្នុងការចុះហត្ថលេខា ដ្បិតអាចប៉ះពាល់ដល់ការចរចាបញ្ចប់ជម្លោះពាណិជ្ជកម្ម៕
Tag:
ចិន
អាមេរិក
វ៉ាង យី
© រក្សាសិទ្ធិដោយ thmeythmey.com