អន្តរជាតិ
សិង្ហបុរី លើកទឹកចិត្តឲ្យប្រជាជនអាស៊ី ស្វែងយល់ពីតំបន់ខ្លួនឲ្យបានច្រើន ចៀសវាងការអនុវត្តគោលនយោបាយលម្អៀង
×![]()
ឧបនាយករដ្ឋមន្ត្រី និងរដ្ឋមន្ត្រីហិរញ្ញវត្ថុសិង្ហបុរី លោក Heng Swee Keat តាមរយៈវេទិកាក្នុងតំបន់មួយបានវាយតម្លៃខ្ពស់ពីសក្តានុពល និងការអភិវឌ្ឍនៅតំបន់អាស៊ី ជាពិសេសតំបន់អាស៊ានដែលទាំងប្រជាជាតិអាស៊ី និងប្រជាជាតិខាងក្រៅ មិនគួរមើលរំលង ឬមើលស្រាលឡើយ។ មន្ត្រីរដ្ឋាភិបាលជាន់ខ្ពស់សិង្ហបុរីរូបនេះ បានលើកទឹកចិត្តឲ្យប្រជាជាតិអាស៊ី យល់ដឹងពីខ្លួនឯងឲ្យបានច្រើនដើម្បីបញ្ជៀសការអនុវត្តគោលនយោបាយលម្អៀងណាមួយ។
នាកិច្ចសន្ទនាប្រចាំឆ្នាំស្តីពីចក្ខុវិស័យសកល ដែលរៀបចំដោយ The Straits Times នៅថ្ងៃ២២ វិច្ឆិកា លោកឧបនាយករដ្ឋមន្ត្រី Heng Swee Keat បានលើកតម្កើងតំបន់អាស៊ី ដែលប្រជាជនទូទៅជាពិសេសប្រជាជនក្នុងតំបន់គួរស្វែងយល់ឲ្យបានច្រើនជាងនេះ។ សម្រាប់លោក អាស៊ី ជាពិសេសអាស៊ានតែម្តង មិនមែនជាបណ្តុំរដ្ឋតូចនោះទេ តែគឺជាក្រុមមួយដ៏មានសក្តានុពលដែលអាចជួយដោះស្រាយភាពតានតឹងពិភពលោកបាន។
ដើម្បីបញ្ជាក់ពីការវាយតម្លៃខ្ពស់លើតំបន់អាស៊ី លោក Heng បានលើកយកពីការអនុវត្តជាក់ស្តែងពេលលោក ធ្វើជារដ្ឋមន្ត្រីអប់រំសិង្ហបុរីអំឡុងឆ្នាំ២០១១-២០១៥។ លោក រៀបរាប់ថា មន្ត្រីរបស់លោក បានលើកសំណើកញ្ចប់ថវិកាធំមួយសម្រាប់សិស្សនិស្សិតបំពេញទស្សនកិច្ចសិក្សាទៅកាន់តំបន់អាមេរិក និងអឺរ៉ុប ក៏ប៉ុន្តែលោក បដិសេធ ដោយលោក ចង់ឲ្យក្រុមសិស្សនិស្សិតទាំងនោះស្វែងយល់ពីអាស៊ីឲ្យបានច្រើនជាងនេះ។
លោក បន្ថែមថា ប្រជាជនក្នុងតំបន់ភាគច្រើនគិតថាខ្លួនឯង បានយល់ច្បាស់ពីអ្នកជិតខាងរបស់ខ្លួនក្នុងតំបន់ តែការពិត មិនមែនដូច្នោះឡើយ។ លោក សង្កត់ធ្ងន់ថា នៅពេលអាស៊ានរួមគ្នាតែមួយ មិនមែនជាក្រុមតូចឡើយ ហើយអាស៊ានអាចធ្វើការរួមគ្នាដើម្បីផ្សារភ្ជាប់ជាមួយនឹងមហាអំណាចពិភពលោក ជាពិសេសនោះក្នុងការបន្ធូរបន្ថយភាពតានតឹងរវាងអាមេរិក និងចិនជាដើម។
លោក Heng បានកំណត់សម្គាល់ថាប្រសិនបើយើងមើលការវិវត្តរបស់អាស៊ានពីមួយឆ្នាំទៅមួយឆ្នាំប្រៀបដូចជាជំហានខ្ចងយ៉ាងដូច្នេះឯង ក៏ប៉ុន្តែប្រសិនបើយើងមើលអាស៊ានរយៈពេមួយទសវត្សរ៍នោះ យើងនឹងឃើញពីការវិវត្តន៍ដ៏ធំធេងដែលអាស៊ានសម្រេចបាន។
ទោះមើលពីការវិវត្តវិជ្ជមានរបស់តំបន់បែបនេះក្តី តាមរយៈវេទិកាដដែលនោះ លោក Heng ដែលត្រូវបានគេរំពឹងថានឹងធ្វើជាអ្នកបន្តវេនតំណែងរបស់លោកនាយករដ្ឋមន្ត្រីសិង្ហបុរី Lee Hsein Loong នៅតែឃើញអាស៊ាន មានការសហការគ្នាខ្លាំងជាងនេះដើម្បីបង្កើតស្តង់ដាររួមមួយក្នុងការធ្វើកិច្ចសហប្រតិបត្តិការលើវិស័យសេវាកម្ម និងរបាំងពន្ធគយជាដើម។
លោក អះអាងថា ទោះអាស៊ាន មិនទាន់រួចរាល់ក្នុងការបង្កើតរូបិយវត្ថុរួមមួយបានក៏ដោយ ក៏ប៉ុន្តែពីមួយដំណាក់កាលទៅមួយដំណាក់កាល អាស៊ាន អាចសម្រេចបានលទ្ធផលវិជ្ជមានរួមជាច្រើន៕
Tag:
សិង្ហបុរី
អាស៊ាន
© រក្សាសិទ្ធិដោយ thmeythmey.com
