អន្តរជាតិ
កិច្ចប្រជុំពិសេសកូរ៉េខាងត្បូង-អាស៊ាន នឹងរឹតបន្តឹងទំនាក់ទំនងទ្វេភាគីទាំងពីរ ប៉ូលិសកូរ៉េខាងត្បូងឈរយាមទីតាំងជំនួបកូរ៉េខាងត្បូង-អាស៊ាននៅប៊ូសាន។ រូបភាព AFP
× កិច្ចប្រជុំពិសេសមួយរវាងកូរ៉េខាងត្បូង និងអាស៊ាន ក្នុងខួបអនុស្សាវរីយ៍លើកទី៣០ នឹងចាប់ផ្តើមហើយនៅទីក្រុងកំពង់ផែប៊ូសាន នាថ្ងៃទី២៥ ខែវិច្ឆិកា ដើម្បីរឹតចំណងមិត្តភាពទ្វេភាគី និងពង្រីកទំហំពាណិជ្ជកម្មថែមទៀត តាមរយៈគោលនយោបាយសម្លឹងទៅភាគខាងត្បូងថ្មី ឬ New Southern Policy។
ដើម្បីប្រារព្ធខួបអនុស្សាវរីយ៍លើកទី៣០ ក្នុងឋានៈជាដៃគូសន្ទនារបស់អាស៊ាន ប្រធានាធិបតីកូរ៉េខាងត្បូងមូន ចេអ៊ីន បានអញ្ជើញប្រមុខរដ្ឋ និងប្រមុខរដ្ឋាភិបាលរបស់បណ្តាប្រទេសអាស៊ានទាំងអស់ឲ្យទៅចូលរួមក្នុងកិច្ចប្រជុំអាស៊ាន-កូរ៉េខាងត្បូង នៅទីក្រុងប៊ូសាន។ នាយករដ្ឋមន្ត្រីកម្ពុជា សម្ដេច ហ៊ុន សែន អវត្តមានពីជំនួបនេះដោយសារគ្រួសារ។
តាមរយៈជំនួបលើកនេះ លោកមូន ព្យាយាមអភិវឌ្ឍគោលនយោបាយ«ភាគខាងត្បូងថ្មី»បន្ថែមទៀត ក្នុងគោលបំណងដំឡើងកម្រិតទំនាក់ទំនងការទូតជាមួយបណ្តាប្រទេសអាស៊ាន។ លោកធ្លាប់អះអាងថា គោលនយោបាយភាគខាងត្បូង មានគោលបំណងរឹតចំណងការទូតជាមួយអាស៊ាន ឲ្យស្មើទៅនឹងកម្រិតប្រទេសធំៗទាំងបួនដូចជា អាមេរិក ចិន រុស្ស៊ី និងជប៉ុន។ នេះបើតាមការចុះផ្សាយរបស់ទីភ្នាក់ងារសារព័ត៌មាន Yonhap។
នៅក្នុងសន្និសីទកាសែតនាទីក្រុងប៊ូសានជាទីរៀបចំកិច្ចប្រជុំ អ្នកស្រី កាង ឃ្យុងវ៉ា (Kang Kyung-wha) រដ្ឋមន្ត្រីក្រសួងការបរទេសកូរ៉េខាងត្បូង បានលើកឡើង ថា កិច្ចប្រជុំខួបអនុស្សាវរីយ៍លើកទី៣០ កូរ៉េខាងត្បូង-អាស៊ាន គឺជាឱកាសមួយដ៏ពិសេស ក្នុងការរឹតចំណងមិត្តភាព រវាងភាគីទាំងពីរឲ្យកាន់តែរឹងមាំថែមទៀត តាមរយៈការសម្លឹងទៅមុខរយៈពេល ៣០ឆ្នាំ។
អំឡុងជំនួបនៅទីក្រុងកំពង់ផែ លោក មូន បានជួបជាមួយថ្នាក់ដឹកនាំមកពីបណ្តាប្រទេសអាស៊ាន នាយករដ្ឋមន្ត្រីថៃ ប្រាយុទ្ធ ចន្ទអូចា ប្រធានាធិបតីឥណ្ឌូណេស៊ី ចូកូ វីដូដូ និងប្រធានាធិបតីហ្វីលីពីន រ៉ូឌ្រីហ្គោ ឌូទើតេ។ នៅថ្ងៃទី២៤ ខែវិច្ឆិកា លោក មូន ជួបជាមួយស៊ុលតង់ព្រុណេ និងនាយករដ្ឋមន្ត្រីសិង្ហបុរីនៅសេអ៊ូល។ ភាគីទាំងសងពីរ បានជជែកពីបញ្ហា ពាណិជ្ជកម្ម បច្ចេកវិទ្យា ទីក្រុងវៃឆ្លាត និងការរំសាយនុយក្លេអ៊ែរនៅលើឧបទ្វីបកូរ៉េជាដើម។
ក្រោមនយោបាយការបរទេសខាងត្បូងនេះ កូរ៉េខាងត្បូង និងរដ្ឋអាស៊ាន៥ទៀត នៅថ្ងៃទី២៥ ខែវិច្ឆិកា ក៏ចុះហត្ថលេខាលើអនុស្សរណៈនៃការយោគយល់គ្នាដើម្បីជំរុញកិច្ចសហប្រតិបត្តិការទាក់ទងទៅនឹងការអប់រំ ទីក្រុងវៃឆ្លាត មធ្យោបាយដឹកជញ្ជូន និងវិស័យផ្សេងៗ តាមរយៈទីភ្នាក់ងារសហប្រតិបត្តិការអន្តរជាតិកូរ៉េ ឬ KOICA។ ប្រទេសអាស៊ានទាំង៥នេះ រួមមាន កម្ពុជា ឡាវ មីយ៉ាន់ម៉ា ហ្វីលីពីន និងវៀតណាម។
សូមបញ្ជាក់ថា គោលនយោបាយ«ភាគខាងត្បូងថ្មី» គឺជាគំនិតផ្តួចផ្តើម ដោយលោកប្រធានាធិបតីកូរ៉េខាងត្បូង មូន ដែលផ្តោតសំខាន់ទៅការការពង្រីកទំហំពាណិជ្ជកម្មកូរ៉េខាងត្បូងជាមួយអាស៊ាន និងឥណ្ឌា។ តាមរយៈគោលនយោបាយនេះ កូរ៉េខាងត្បូងចង់បង្កើនទំហំពាណិជ្ជកម្មជាមួយអាស៊ានពី១៦០ ពាន់លានដុល្លារ ក្នុងឆ្នាំ២០១៩ ដល់ ២០០ពាន់លានដុល្លារក្នុងឆ្នាំ ២០២០៕
Tag:
កូរ៉េខាងត្បូង
អាស៊ាន
© រក្សាសិទ្ធិដោយ thmeythmey.com