អន្តរជាតិ
កិច្ចព្រមព្រៀងពាណិជ្ជកម្មចិន-អាមេរិក ដំណាក់កាលទីពីរ នឹងមិនអាចកើតឡើង មុនការបោះឆ្នោតនៅអាមេរិក ប្រធានាធិបតីអាមេរិក ដូណាល់ ត្រាំ (ខាងឆ្វេង) និងលោកប្រធានាធិបតីចិន ស៊ី ជិនភីង នៅក្នុងកិច្ចប្រជុំG20 នៅអូសាកា ប្រទេសជប៉ុន, រូបភាព៖ AP
× មហិច្ឆតាក្នុងការសម្រេច «កិច្ចព្រមព្រៀងពាណិជ្ជកម្មដំណាក់កាលទីពីរ» រវាងអាមេរិក និងចិន ទំនងជាមិនអាចកើតមានឡើយក្នុងពេលនេះ ប៉ុន្តែវាអាចកើតមាន នៅក្រោយការបោះឆ្នោតប្រធានាធិបតីអាមេរិកនៅក្នុងខែវិច្ឆិកា ឆ្នាំ២០២០ ខាងមុខ។ នេះបើតាមការលើកឡើងរបស់មន្ត្រីអាមេរិក និងចិន ។
នាខែតុលាកន្លងទៅ ក្នុងជំនួបជាមួយលោក លីវ ហឺ ឧបនាយករដ្ឋមន្ត្រីចិន និងជាអ្នកតំណាងចរចាពាណិជ្ជកម្មចិន លោក ដូណាល់ ត្រាំ ប្រធានាធិបតីអាមេរិក បានរំពឹងថា អាមេរិក និងចិន អាចនឹងមានកិច្ចព្រមព្រៀងដំណាក់កាលទីពីរបន្ថែមទៀត នៅពេលសម្រេចកិច្ចព្រមព្រៀងដំណាក់កាលទីមួយ។ បើតាមប្រធានាធិបតីអាមេរិក កិច្ចព្រមព្រៀងដំណាក់កាលទីពីរ អាចនិយាយទាក់ទងទៅនឹងការផ្ទេរបច្ចេកវិទ្យាពីក្រុមហ៊ុនអាមេរិកដោយបង្ខំពីសំណាក់ភាគីចិន។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
យ៉ាងណាក៏ដោយ ភាគីចិន នឹងមិនចូលតុចរចា ជជែកពីកិច្ចព្រមព្រៀងដំណាក់កាលទីពីរ ជាមួយអាមេរិកឡើយអំឡុងពេលមុនការបោះឆ្នោតប្រធានាធិបតីអាមេរិក។ ក្នុងន័យនេះ ចិនទំនងជាចង់តាមដានមើលសិន ថាតើលោក ត្រាំ អាចឈ្នះឆ្នោតក្នុងអាណត្តិទីពីររបស់ខ្លួន ឬក៏អត់។ ប្រាប់ទីភ្នាក់ងារព័ត៌មាន Reuters មន្ត្រីចិនមួយរូបបានលើកឡើងថា លោក ត្រាំ គឺជាអ្នកចង់ចុះហត្ថលេខាលើកិច្ចព្រមព្រៀងពាណិជ្ជកម្មទាំងនេះ ប៉ុន្តែមិនមែនជាភាគីចិនឡើយ។ ដូចនេះ ទីក្រុងប៉េកាំង អាចរង់ចាំបាន។
ចំណែកមន្ត្រីអាមេរិកវិញ បានអះអាងយ៉ាងដូច្នេះថា អាទិភាពដ៏សំខាន់បំផុតរបស់ប្រធានាធិបតី ត្រាំ នៅពេលនេះ គឺរក្សាកិច្ចព្រមព្រៀងដំណាក់កាលទីមួយជាមុនសិន ដើម្បីទុកជាកូនអុក ក្នុងយុទ្ធនាការបោះឆ្នោតនាពេលខាងមុខ។ ស្រដៀងគ្នានេះដែរ មន្ត្រីអាមេរិកម្នាក់ទៀត បានបញ្ជាក់ថា ការចរចាលើកិច្ចព្រមព្រៀងដំណាក់កាលទីពីរ អាចចាប់ផ្តើម ប្រសិនបើកិច្ចព្រមព្រៀងដំណាក់កាលមួយត្រូវបានបញ្ចប់។
សង្គ្រាមពាណិជ្ជកម្មអាមេរិក-ចិន ដែលបានកើតឡើងរយៈពេល ១៨ខែកន្លងមកនេះ បានធ្វើឲ្យប៉ះពាល់ដល់ជំនួញ និងកសិករអាមេរិកជាខ្លាំង។ ជាពិសេស សង្គ្រាមពាណិជ្ជកម្ម បានបង្កឲ្យរាំងស្ទះដល់ចង្វាក់ផលិតកម្ម និងកំណើនសេដ្ឋកិច្ចពិភពលោក។ មកទល់ពេលនេះ កិច្ចព្រមព្រៀងពាណិជ្ជកម្មរវាងអាមេរិក-ចិនដំណាក់កាលទី១ កំពុងស្ថិតក្នុងភាពរាំងស្ទះនៅឡើយ បន្ទាប់ពីខកខានចុះហត្ថលេខាដោយការលុបចោលវេទិកាសហប្រតិបត្តិការសេដ្ឋកិច្ចតំបន់អាស៊ី-ប៉ាស៊ីហ្វិក នៅក្នុងប្រទេស៊ីលី៕
Tag:
អាមេរិក
ចិន
សង្គ្រាមពាណិជ្ជកម្ម
© រក្សាសិទ្ធិដោយ thmeythmey.com