ច្បាប់ / សិទិ្ធមនុស្ស / តុលាការ
ជាតិ
ក្រុមសហជីពមិនពេញចិត្តចំពោះកង្វះការពិគ្រោះយោបល់លើវិសោធនកម្មច្បាប់សហជីព
រូបឯកសារ៖ តំណាងកម្មករប្រមាណ១០០នាក់តវ៉ាកុំឲ្យមានការអនុម័តច្បាប់សហជីពនៅមុខរដ្ឋសភាជាតិ រាជធានីភ្នំពេញ កាលពីថ្ងៃទី៤ ខែមេសា ឆ្នាំ២០១៦។ (ឡេង ឡែ/VOA)
×![]()
ដោយ: VOA
ភ្នំពេញ ៖ ក្រុមអ្នកការពារសិទ្ធិកម្មករនៅថ្ងៃអង្គារនេះ សម្តែងការខកចិត្តចំពោះរដ្ឋសភាដែលអនុម័តសេចក្តីព្រាងវិសោធនកម្មច្បាប់សហជីព ដោយមិនបានបើកឲ្យមានការពិភាក្សាជាមុនជាមួយតំណាងក្រុមកម្មករពាក់ព័ន្ធនឹងតម្រូវការ និងបញ្ហាប្រឈមរបស់កម្មករ។
រដ្ឋសភាជាតិ ដែលមានតែតំណាងរាស្ត្ររបស់គណបក្សប្រជាជនកម្ពុជា បានអនុម័តសេចក្តីព្រាងច្បាប់ស្តីពីវិសោធនកម្មមាត្រាចំនួន១០នៃច្បាប់ស្តីពីសហជីព ដែលមាន១៧ជំពូកនិង១០០មាត្រា។ ក្រុមសហជីពដែលបម្រើប្រយោជន៍កម្មករ និងអង្គការសង្គមស៊ីវិលជាច្រើនរិះគន់ថា ច្បាប់សហជីពមានការរឹតត្បិតសិទ្ធិរបស់សហជីព និងកម្មករ ចាប់តាំងពីច្បាប់នេះត្រូវបានអនុម័តកាលពីខែមេសា ឆ្នាំ២០១៦មក។
លោកប៉ាវ ស៊ីណា ប្រធានសហភាពចលនាកម្មករកម្ពុជា ប្រាប់ VOA ថា ការអនុម័តសេចក្តីព្រាងវិសោធនកម្មមាត្រាមួយចំនួននៃច្បាប់ស្តីពីសហជីពនេះ មិនឆ្លើយតបទៅនឹងការបារម្ភរបស់អ្នកតំណាងការពារសិទ្ធិកម្មករនោះទេ។ លោកបន្តថា សភាគួរផ្តល់ឱកាសឲ្យមានកិច្ចពិភាក្សារវាងអ្នកតាក់តែងច្បាប់ និងក្រុមសហជីពជាមុនសិន ដើម្បីបានដឹងអំពីផលវិបាក និងការចង់បានរបស់កម្មករ។
«ការណ៍ដែលធ្វើវិសោធនកម្មច្បាប់នេះ គឺធាតុពិតទៅធ្វើដោយសារតែសម្ពាធរបស់អឺរ៉ុបពាក់ព័ន្ធនឹងប្រព័ន្ធ EBA ទេ មិនមែនធ្វើដោយសារតែសហជីពស្នើសុំទេ។ គេមិនដែលខ្វល់ គេមិនដែលឈឺក្បាល អ្វីដែលភាគីខាងសហជីពលើកឡើងទេ»។
ខណៈរដ្ឋសភាកំពុងអនុម័តសេចក្តីព្រាងវិសោធនកម្មច្បាប់សហជីព នៅព្រឹកថ្ងៃអង្គារនេះគេឃើញក្រុមសហជីព និងសមាគមចំនួន៧ បានជួបជាមួយអ្នកស្រី មាន សំអាន ប្រធានគណៈកម្មការ សុខាភិបាល និងសង្គមកិច្ចនៃព្រឹទ្ធសភាដើម្បីជជែកអំពីផលវិបាកនៃច្បាប់ស្តីពីសហជីពនេះ បន្ទាប់ពីក្រុមសហជីពទាំងនោះបានផ្ញើលិខិតទៅរដ្ឋសភា និងព្រឹទ្ធសភាតាំងពីថ្ងៃទី៣០ ខែតុលាមក។
លោក អាត់ ធន់ តំណាងសហភាពការងារកម្ពុជា សហជីព និងសមាគមក្នុងវិស័យការងារ ដែលបានចូលរួមពិភាក្សាជាមួយមន្ត្រីព្រឹទ្ធសភា កត់សម្គាល់ថា មាត្រាជាច្រើននៃច្បាប់ស្តីពីសហជីពបានធ្វើឲ្យមានការរឹតត្បិតសិទ្ធិ និងសេរីភាពរបស់សហជីព និងកម្មករក្នុងការអនុវត្តការងារ។
អ្នកការពារសិទ្ធិកម្មកររូបនេះបន្ថែមថា លោកមានការខកចិត្តដែលរដ្ឋសភាអនុម័តវិសោធនកម្មមាត្រាទាំងនោះ ដោយមិនមានការពិគ្រោះយោបល់ជាមួយក្រុមសហជីពដែលមិនរណបថៅកែរោងចក្រ។
«យើងក៏សោកស្តាយដែរ ដែលសភាតំណាងឲ្យស្ថាប័ននីតិបញ្ញត្តិមួយដ៏ធំគួរតែយកចិត្តទុកដាក់ពីសំណើខាងយើង ហើយផ្តល់ឱកាសឲ្យយើងដើម្បីជួប មុននឹងអនុម័តអីផ្សេងៗ។ ប៉ុន្តែទីបំផុត គាត់អនុម័តដោយមិនបានឆ្លងកាត់យោបល់ពីខាងយើង»។
អ្នកស្រី មាន សំអាន សមាជិកព្រឹទ្ធសភាមកពីគណបក្សកាន់អំណាច និងជាប្រធានគណៈកម្មការសុខាភិបាល និងសង្គមកិច្ច លើកឡើងថា បន្ទាប់ពីបានជជែកជាមួយក្រុមសហជីពពាក់ព័ន្ធនឹងសំណើរបស់ពួកគេ អ្នកស្រីនឹងបញ្ជូនសំណើទាំងនោះទៅថ្នាក់ដឹកនាំបន្ត ហើយអ្នកស្រីមិនទាន់អាចឆ្លើយតបបែបណាបាននៅឡើយ។
ក្រុមសហជីពលើកឡើងថា ច្បាប់ស្តីពីសហជីពបានធ្វើឲ្យប៉ះពាល់យ៉ាងខ្លាំងដល់សកម្មភាពសហជីពដែលធ្វើការការពារប្រយោជន៍កម្មករ។ ផលប៉ះពាល់ដែលបានកើតឡើងកន្លងមករួមមាន ដូចជាការធ្វើឲ្យលែងមានសហជីពតាមរោងចក្រ ការមិនអាចធ្វើជាតំណាងដើម្បីការពារសហជីព ការរឹតត្បិតមិនឲ្យកម្មករធ្វើកូដកម្ម បាតុកម្ម និងការប្រឈមនឹងផ្លូវច្បាប់ផ្សេងៗ ដែលកើតចេញពីការទាមទារសិទ្ធិជាដើម។
VOA មិនអាចទាក់ទងសុំការអត្ថាធិប្បាយពីលោក ឡេង ប៉េងឡុង អ្នកនាំពាក្យរដ្ឋសភាជាតិបានទេ។
ក្រុមសហជីពការពារសិទ្ធិកម្មករបន្ថែមថា ការសម្រេចធ្វើវិសោធនកម្មមាត្រាមួយចំនួននៃច្បាប់ស្តីពីសហជីពនេះមិនមែនតាមការស្នើរបស់សហជីពនោះទេ ប៉ុន្តែអាចជាការធ្វើឡើងដោយសាររងសម្ពាធពីសហភាពអឺរ៉ុប ដែលកំពុងព្រមានដកប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» (EBA)ដោយសារកម្ពុជាមិនបានធ្វើឲ្យប្រសើរឡើងនៃការគោរពសិទ្ធិមនុស្ស ហើយថែមទាំងបានធ្វើឲ្យខូចលទ្ធិប្រជាធិបតេយ្យយ៉ាងដំណំក្នុងរយៈពេលពីរឆ្នាំចុងក្រោយនេះ។
សហភាពអឺរ៉ុបគឺជាទីផ្សារនាំចេញដ៏ធំបំផុតរបស់ប្រទេសកម្ពុជា ដោយបានទិញផលិតផលវាយនភណ្ឌ ដូចជាសម្លៀកបំពាក់ ស្បែកជើង ផលិតផលកសិកម្ម និងកង់ជាដើមពីប្រទេសកម្ពុជា ដោយមិនយកពន្ធ។ ការអនុគ្រោះពន្ធនេះធ្វើឱ្យកម្ពុជាចំណេញប្រាក់ពន្ធជាង៦០០លានដុល្លារក្នុងមួយឆ្នាំៗ៕
© រក្សាសិទ្ធិដោយ thmeythmey.com
