អន្តរជាតិ
តារា K-pop ២នាក់ ត្រូវតុលាការកាត់ទោសឲ្យជាប់គុកពីបទរំលោភសេពសន្ថវៈ Jung Joon-young (ឆ្វេង) និង Choi jong-joon (Korea Times)
× តុលាការកូរ៉េខាងត្បូង នៅថ្ងៃសុក្រ ២៩ វិច្ឆិកា បានកាត់ទោសតារា K-pop ២នាក់ឲ្យជាប់គុកពីបទរំលោភសេពសន្ថវៈលើស្ត្រី។ ម្នាក់គឺតារាចម្រៀង លោក Jung Joon-young ត្រូវជាប់គុក៦ឆ្នាំ និងម្នាក់ទៀតគឺលោក Choi Jong-hoon ត្រូវជាប់គុក៥ឆ្នាំ។ បន្ថែមពីទោសនេះ អ្នកទាំងពីរ ក៏រងចោទប្រកាន់ពីបទលួចថតវីដេអូអាសអាភាសពួកគេផងដែរ។
តារាចម្រៀង Jung Joon-young អាយុ៣០ឆ្នាំ ត្រូវបានប៉ូលិសចាប់ខ្លួនក្នុងខែមីនា ឆ្នាំ២០១៩។ ចំណែក លោក Choi Jong-hoon អាយុ៣០ឆ្នាំដូចគ្នា ហើយជាអតីតសមាជិកក្រុមចម្រៀងបុរសដ៏ល្បីមួយរបស់កូរ៉េខាងត្បូង FT Island ត្រូវបានចាប់ខ្លួនកាលពីខែ ឧសភា។
បុរសទាំងពីរនាក់នេះ ក៏ជាសមាជិកនៃក្រុម Chat អនឡាញ ដែលចែករំលែកវីដេអូអាសអាភាស ហើយនិយាយលេងសើចអំពីស្ត្រីដែលពួកគេដាក់ថ្នាំ ហើយធ្វើសកម្មភាពរំលោភ។ នេះបើតាមការបញ្ជាក់របស់តុលាការក្រុងសេអ៊ូល។ ទន្ទឹមនេះ តុលាការ ក៏ដាក់ទោសឲ្យជនល្មើសទាំងពីរនាក់នេះទៅរៀនសូត្រវគ្គ «ការព្យាបាលអំពើហិង្សាផ្លូវភេទ» រយៈពេល៨០ម៉ោងរៀងៗខ្លួនផងដែរ ហើយហាមឃាត់ពីការធ្វើការជាមួយក្មេងៗ។
តាមការចុះផ្សាយរបស់ទីភ្នាក់ងារព័ត៌មាន AFP លោកចៅក្រម Kang Seong-soo បានបញ្ជាក់ឲ្យដឹងថា តារាចម្រៀង Jung បានរំលោភផ្លូវភេទលើស្ត្រីដែលស្រវឹងជោកជាំហើយលែងអាចប្រកែកបាន។ ម្យ៉ាងទៀតបុគ្គលរូបនេះ ក៏បានថតវីដេអូពួកគេអាក្រាតកាយនិងធ្វើសកម្មភាពរួមភេទ ហើយចែករំលែកចូលទោក្នុងក្រុម Chat ។ លោកចៅក្រមនិយាយទាំងសោកសៅថា៖«យើងពុំអាចស្រមៃឃើញពីការឈឺចាប់របស់ជនរងគ្រោះមាន នៅពេលពួកគេបានដឹងរឿងនេះ»។
យ៉ាងណាមិញ ក្នុងការឆ្លើយបំភ្លឺនៅមុខតុលាការជាលើកចុងក្រោយ លោក Jung បានឆ្លើយថា លោកសោកស្តាយជាខ្លាំងចំពោះទង្វើដ៏ឆ្លួតលីលារបស់លោក ហើយលោកមានវិប្បដិសារីយ៉ាងធំធេង។ ក្នុងខែឧសភា តារាចម្រៀងរូបនេះ បានសម្រេចលាឈប់ពីវិស័យសិល្បៈ ក្រោយពីសារភាពថា លោកពិតជាបានលួចថតវីដេអូនារីទាំងនោះ ហើយចែករំលែកតាមបណ្តាញអនឡាញមែន។ ដោយឡែក តារាចម្រៀង K-pop ម្នាក់ទៀត គឺលោក Choi Jong-hoon តុលាការ អះអាងថា បុរសវ័យ៣០ឆ្នាំរូបនេះ ពុំបង្ហាញអារម្មណ៍វិប្បដិសារីចំពោះការរំលោទបំពានផ្លូវភេទលើស្ត្រីជាជនរងគ្រោះដែលស្រវឹងទាំងនោះឡើយ។
សូមបញ្ជាក់ថា សំណុំរឿងប្រឆាំងអ្នកទាំងពីរនេះ បានរកឃើញអំឡុងការស៊ើបអង្កេតដាច់ដោយឡែកមួយរបស់ប៉ូលិសក្នុងករណីរបស់កំពូលតារាចម្រៀង K-pop ល្បីល្បាញម្នាក់ទៀត ឈ្មោះថា Seungri ។ ជាអតីតសមាជិកក្រុមចម្រៀង Bigbang តារាចម្រៀងរូបនេះ ក៏ត្រូវបានគេរាយការណ៍ថា ជាសមាជិកម្នាក់នៃក្រុម Chat របស់លោក Jung ផងដែរ។ Seungri ត្រូវបានកាត់ទោសពីយកទីតាំងក្លឹបកម្សាន្តបស់លោកជាទីបម្រើសេវាកម្មផ្លូវភេទដល់ក្រុមអ្នកវិនិយោគបរទេស៕
Tag:
កូរ៉េខាងត្បូង
K-pop
© រក្សាសិទ្ធិដោយ thmeythmey.com