អន្តរជាតិ
ករណីចាក់សម្លាប់នៅក្រុងឡុងដ៍៖ជនដៃដល់ជាអតីតអ្នកទោសភេរវកម្ម
× បុរសដែលធ្វើសកម្មភាពវាយប្រហារដោយចាក់កាំបិតនៅស្ពានទីក្រុង ឡុងដ៍ គឺជាអតីតអ្នកទោសដែលជាប់ពិរុទ្ធក្នុងអំពើភេរវកម្ម។ ជនដៃដល់រូបនេះ បើតាមសម្តីប៉ូលិស មានឈ្មោះថា Usman Khan មានអាយុ២៨ឆ្នាំ។
ជនរូបនេះត្រូវបានដោះលែងឲ្យនៅក្រៅឃុំជាបណ្តោះអាសន្ន នៅពេលវាយប្រហារ ដែលបណ្តាលឲ្យមនុស្ស២នាក់ស្លាប់ និង៣នាក់ផ្សេងទៀត រងរបួស។ បុរសរូបនេះ ត្រូវបានប៉ូលិសបាញ់សម្លាប់នៅហ្នឹងកន្លែង។ ក្រោយមក ប៉ូលិស បានប្រកាសការវាយប្រហារនេះថាជា អំពើភេរវកម្ម។
ក្នុងសេចក្តីថ្លែងការណ៍មួយ ជំនួយការស្នងការប៉ូលិសក្រុង លោក Nei Basu បញ្ជាក់ឲ្យដឹងថា៖«លោក Usman Khan ត្រូវបានដោះលែងពីពន្ធនាគារក្នុងខែធ្នូ ២០១៨»។ លោក បន្តថា ខណៈនេះប៉ូលិស កំពុងស្ថិតនៅការស៊ើបអង្កេតដំណាក់កាលបឋមនៅឡើយ ដូច្នេះប៉ូលិសពុំអាចបញ្ជាក់បានទេថា នរណាខ្លះជាប់ពាក់ព័ន្ធនឹងការវាយប្រហារនេះ។
សូមបញ្ជាក់ថា ការប្រហារដោយចាក់កាំបិតសម្លាប់នេះ បានចាប់ផ្តើមនៅវេលាម៉ោង ២រសៀល (ម៉ោងក្នុងស្រុក) កាលពីថ្ងៃសុក្រ ២៩ វិច្ឆិកា នៅវិមាន Fishmongers' ដែលស្ថិតនៅភាគខាងជើងនៃ London Bridge ។ នៅទីនោះ សន្និសីទសកលវិទ្យាល័យ Cambridge ស្តីពីការកែប្រែអ្នកទោស ដែលហៅថា «រៀនសូត្ររួមគ្នា» បានរៀបចំឡើង។
ជនសង្ស័យនោះ បានទៅចូលរួមព្រឹត្តិការណ៍នោះ។ បើតាមកាសែតអង់គ្លេស Times លោក Usman Khan ត្រូវបានដោះលែងឲ្យនៅក្រៅឃុំដោយខ្លួលយល់ព្រមពាក់ស្លាកសញ្ញាសំគាល់ (electronic tag) និងមានអ្នកតាមដានគ្រប់ពេលវេលា។ ក្នុងព្រឹត្តិការណ៍នោះ មនុស្សជាច្រើន បានចូលរួម ដែលក្នុងនោះ មាននិស្សិតដែលមកពីសកលវិទ្យាល័យ Cambridge និងអតីតអ្នកទោសជាដើម៕
Tag:
ចក្រភពអង់គ្លេស
ភេរវកម្ម
© រក្សាសិទ្ធិដោយ thmeythmey.com