អន្តរជាតិ
លោក វីដូដូ បដិសេធការកែរដ្ឋធម្មនុញ្ញដើម្បីកាន់តំណែងប្រធានាធិបតីបានមួយអាណត្តិទៀត ប្រធានាធិបតី ចូកូ វីដូដូ ក្នុងពេលស្បថចូលកាន់តំណែងជាប្រធានាធិបតីក្នុងអាណត្តិទីពីរ។ រូបភាព៖ New Straits Times
× ប្រធានាធិបតី ចូកូ វីដូដូ បាននិយាយថា លោកនឹងមិនលើកសំណើធ្វើវិសោធនកម្មម្តងទៀតឡើយ ជាពិសេសទាក់ទងទៅនឹងការកែប្រែអាណត្តិរបស់ប្រធានាធិបតីឥណ្ឌូណេស៊ី។ ទាក់ទិនទៅនឹងការធ្វើវិសោធនកម្មនេះ លោកប្រធានាធិបតី ចូកូវី បានគូសបញ្ជាក់ថា គម្រោងពង្រីករយៈពេលកាន់តំណែងរបស់ប្រធានាធិបតីបែបនេះ ដែលប្រៀបដូចជាគេទះមួយដៃកណ្តាលមុខ។
ប្រធានាធិបតី ចូកូ វីដូដូ នៅថ្ងៃទី២ ខែធ្នូ បានគូសបញ្ជាក់ថា លោក គឺជាអ្នកផ្តួចផ្តើមគំនិតលើការធ្វើវិសោធនកម្មរដ្ឋធម្មនុញ្ញឥណ្ឌូណេស៊ី ដើម្បីពង្រឹងគោលនយោបាយណែនាំរដ្ឋឥណ្ឌូណេស៊ី (GBHN)។
យ៉ាងណាក៏ដោយ កិច្ចពិភាក្សាលើសំណើមួយនេះ គឺមានការខ្វែងគំនិតគ្នាជាខ្លាំង ដោយក្នុងសំណើនោះក៏មានគម្រោងកែប្រែរយៈពេលនៃការកាន់តំណែងរបស់ប្រធានាធិបតីឥណ្ឌូណេស៊ីផងដែរ។ ពោលគឺកែប្រែពីពីរអាណត្តិទៅ ៣អាណត្តិ។
ដោយសារតែបញ្ហាមិនយល់ស្របគ្នាបែបនេះ លោក វីដូដូ ដែលត្រូវបានស្គាល់ជាទូទៅថា ចូកូវី សម្រេចលុបចោលសំណើធ្វើវិសោធនកម្មរដ្ឋធម្មនុញ្ញនេះតែម្តង។ ពាក់ព័ន្ធនឹងការលុបចោលនេះ លោកប្រធានាធិបតីឥណ្ឌូណេស៊ី បានលើកឡើងក្នុងសន្និសីទកាសែត នាវិមានប្រធានាធិបតី Merdeka Palace ក្នុងទីក្រុងហ្សាការតា ថា ការលុបចោលវិសោធនកម្មរដ្ឋធម្មនុញ្ញ ជារឿងល្អ ព្រោះឥណ្ឌូណេស៊ី ចាំបាច់ត្រូវប្រឈមពីសម្ពាធមកពីខាងក្រៅវិញ។
យ៉ាងណាមិញ លោក វីដូដូ មិនបានបញ្ជាក់ច្បាស់ឡើយថា សម្ពាធពីខាងក្រៅ គឺជាអ្វីនោះទេ។
តាមការចុះផ្សាយរបស់កាសែត The Jakarta Post លោកប្រធានាធាធិបតីវ័យ ៥៨ឆ្នាំរូបនេះ បានគូសបញ្ជាក់ថា មានមនុស្សមួយចំនួនចង់ឲ្យលោក កាន់តំណែងរយៈពេល ៣ អាណត្តិ ប៉ុន្តែវាក៏បង្កប់អត្ថន័យ៣ប្រភេទផងដែរ។ បើតាមលោក ចូកូវី ទីមួយមនុស្សទាំងនោះ ចង់ទះលោកមួយដៃ, ទីពីរ ក្រុមបុគ្គលទាំងនោះទទួលបានផលប្រយោជន៍ពីរូបលោក និងទីបី គឺបុគ្គលទាំងនោះ ចង់ឲ្យលោកធ្លាក់ក្នុងអន្លាក់។
តាមការលើកឡើងរបស់ប្រធានាធិបតី វីដូដូ ថាមនុស្សចំនួននោះ ទំនងជាចង់សំដៅដល់ចលនា Nahdlatul Ulama (NU) ដែលជាអង្គការឥស្លាមដ៏ធំបំផុតនៅក្នុងប្រទេសឥណ្ឌូណេស៊ី។ ក្នុងរយៈពេលថ្មីៗនេះ ក្រុម Nahdlatul Ulama បានស្នើថា ប្រធានាធិបតី និងអនុប្រធានាធិបតី គួរតែត្រូវជ្រើសរើសដោយសភាតំណាងរាស្ត្រវិញ ខណៈបច្ចុប្បន្ន ត្រូវបានជ្រើសរើសដោយប្រជាជនផ្ទាល់។ ការឲ្យសភាជ្រើសរើសមេដឹកនាំនេះ ជាការត្រឡប់ទៅរកសម័យសណ្តាប់ធ្នាប់ថ្មីឡើងវិញ៕
Tag:
ឥណ្ឌូណេស៊ី
ចូកូវី
© រក្សាសិទ្ធិដោយ thmeythmey.com