២០២០៖ ព្រះសីហនុ ទទួលបានថវិកាច្រើនជាងគេ ឯកោះកុង តិចជាងគេ

ជាតិ

២០២០៖ ព្រះសីហនុ ទទួលបានថវិកាច្រើនជាងគេ ឯកោះកុង តិចជាងគេ

06, Dec 2019 , 9:19 pm

រូបភាព

សិក្ខាសាលា ថវិកាថ្នាក់ជាតិឆ្នាំ២០២០

ដោយ: ឡាយ សុភាវតី

ភ្នំពេញ៖ គម្រោងថវិកាសរុប សម្រាប់បែងចែកទៅរាជធានី-ខេត្ត នៅឆ្នាំ២០២០ មានជាង៥៦២លានដុល្លារ ដោយក្នុងនោះ ខេត្តព្រះសីហនុ ទទួលថវិកាខ្ពស់បំផុត បន្ទាប់ពីរាជធានីភ្នំពេញ ខណៈខេត្តកោះកុង ទទួលបានថវិកាទាបបំផុត។

ក្នុងចំណោមថវិកា៥៦២លានដុល្លារនោះ រាជធានីភ្នំពេញ ទទួលបាន៣៩៥លានដុល្លារ ហើយនៅសល់ជាង១៦៧លានដុល្លារ សម្រាប់ខេត្តទាំង២៤។ នេះជាការលើកឡើងរបស់លោក ជូ គីមឡេង រដ្ឋលេខាក្រសួងសេដ្ឋកិច្ច និងហិរញ្ញវត្ត ក្នុងសិក្ខាសាលាជាតិស្ដីពីការរៀបចំផែនការសកម្មភាព និងថវិកាឆ្នាំ២០២០ នៅថ្ងៃទី៥ ខែធ្នូ ឆ្នាំ២០១៩។

លោក ថ្លែងថា គម្លាតថវិកានេះ បើប្រៀបធៀបរវាងខេត្តព្រះសីហនុ និង ខេត្តកោះកុង គឺខុសគ្នាដល់ទៅ១៣ដង។ លោក ហាក់មានការបារម្ភចំពោះគម្លាតនេះ ដោយលោកអះអាងថា អាចនឹងមានការពិភាក្សាដោះស្រាយបន្តទៀត ហើយក៏នឹងអាចមានការបែងចែកជាថ្មីដែរ ដើម្បីឲ្យមានការអភិវឌ្ឍ។

លោករដ្ឋលេខាធិការរូបនេះ បានលើកឡើងថា គម្លាតថវិកាខុសគ្នាខ្ពស់នេះ គឺដោយសារសក្តានុពលនៃការប្រគល់ពន្ធ ព្រោះខេត្តនីមួយៗមានសក្ដានុពលពាណិជ្ជកម្មខុសគ្នា។ លោក បន្តថា ថវិការរបស់ខេត្ត៦ គឺព្រះសីហនុ សៀមរាប កណ្ដាល បន្ទាយមានជ័យ បាត់ដំបង និងកំពត នៅលើមធ្យមភាគ ហើយថវិកាសម្រាប់ខេត្តដទៃ ស្ថិតក្រោមមធ្យមភាគ។

លោកស្រី នួន សុភាព នាយកទីចាត់ការហិរញ្ញវត្ថុ នៃរដ្ឋបាលខេត្តព្រះសីហនុ បានប្រាប់សារព័ត៌មានថ្មីៗតាមទូរស័ព្ទថា ថវិកាសម្រាប់ខេត្តព្រះសីហនុនៅឆ្នាំ២០២០ មានដល់ទៅ៣១លាននិង៥សែនដុល្លារ។ បន្ថែមពីលើលោកស្រី នំ សុភាព លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ បានបញ្ជាក់ថា៖«ការទទួលបានថវិការខ្ពស់បំផុត បន្ទាប់ពីភ្នំពេញ គឺដោយសារខេត្តព្រះសីហនុ មានតម្រូវការអភិវឌ្ឍច្រើន និងការកើនឡើងនៃទំហំសេដ្ឋកិច្ចក្នុងខេត្ត»។

រីឯថវិកាសម្រាប់ខេត្តកោះកុងនៅឆ្នាំ២០២០ មានត្រឹមតែជាង២,២លានដុល្លារប៉ុណ្ណោះ។ នេះបើតាមលោកស្រី មិថុនា ភូថង អភិបាលខេត្តកោះកុង ដែលប្រាប់សារព័ត៌មានថ្មីៗតាមទូរស័ព្ទ។ អ្នកស្រី និយាយថា៖«ថវិកាថ្នាក់ខេត្តទាបនេះ គឺដោយសារខេត្តកោះកុងមានច្រកចេញចូលតែមួយនៅថ្នាក់ខេត្តនិងក្រុង ហើយប្រជាជនតិច រួមទាំងស្ថិតក្នុងតំបន់ដែលមានភ្នំនិងកោះច្រើន»។

លោក ពេជ្រ ប៊ុនធិន រដ្ឋមន្រី្តមុខងាសាធារណៈ បានលើកឡើងក្នុងសិក្ខាសាលាថា ថវិកាថ្នាក់ក្រោមជាតិសរុបឆ្នាំ២០២០ (រាជធានី ខេត្ត ក្រុង ស្រុក ខណ្ឌ ឃុំ សង្កាត់) មានប្រមាណ៨៥៥លានដុល្លារ ដោយកើនឡើងប្រមាណជាង២៧៦លានដុល្លារ បើប្រៀបធៀបនឹងថវិកាថ្នាក់ក្រោមជាតិឆ្នាំ២០១៩។

រដ្ឋមន្រី្តមុខងារសាធារណៈ បានបញ្ជាក់ថា៖«ការកើនឡើងនេះ គឺដោយសារមានការបង្កើនអត្រាចូលរួមពីថវិការដ្ឋទៅក្នុងមូលនិធិឃុំ សង្កាត់ មូលនិធិក្រុង ស្រុក ខណ្ឌ និងការបង្កើតឱ្យមានប្រភពចំណូលផ្សេងៗទៀត សម្រាប់រដ្ឋបាលថ្នាក់ក្រោមជាតិ»។

ក្នុងពិធីបិទសិក្ខាសាលា សម្ដេច ស ខេង រដ្ឋមន្ដ្រីក្រសួងមហាផ្ទៃ និងជាប្រធានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) បានឲ្យដឹងថា នៅឆ្នាំ២០២០ខាងមុខនេះ ឃុំ-សង្កាត់នីមួយៗ នឹងទទួលបានថវិកាជាង១២ម៉ឺនដុល្លារ ដើម្បីបង្កលក្ខណៈឲ្យក្រុមប្រឹក្សាឃុំ-សង្កាត់ កាន់តែមានលទ្ធភាពអាចចូលរួមដោះស្រាយតម្រូវការជាអាទិភាពនានាតាមមូលដ្ឋាន។

សម្តេចរដ្ឋមន្ត្រី គូសបញ្ជាក់ថា ថវិកាជាង១២ម៉ឺនដុល្លារនេះ រួមមាន ថវិកាសម្រាប់ចំណាយលើផ្នែកអភិវឌ្ឍន៍មូលដ្ឋាន មានជាង៧ម៉ឺនដុល្លារ ដែលចំនួននេះកើនឡើងទ្វេដង បើប្រៀបធៀបនឹងឆ្នាំ២០១៩។ រដ្ឋមន្ត្រីមហាផ្ទៃ បន្តថា ថវិកានេះ នឹងកើនឡើងជារៀងរាល់ឆ្នាំ រហូតដល់ឆ្នាំ២០២៣ រដ្ឋបាលឃុំ-សង្កាត់នីមួយៗ នឹងទទួលបានថវិកាជាង១៣ម៉ឺនដុល្លារ៕