អន្តរជាតិ
ចិន សន្យាបន្តជ្រោមជ្រែងមីយ៉ាន់ម៉ាក្នុងដំណើរការផ្សះផ្សារ និងអភិវឌ្ឍន៍ជាតិតាមបែបផែនប្រទេសខ្លួន រដ្ឋមន្ត្រីការបរទេសចិន វ៉ាង យី ចាប់ដៃប្រធានាធិបតីមីយ៉ាន់ម៉ា Win Myint ។ រូបភាព Xinhua
× រដ្ឋាភិបាលក្រុងណៃពិដោ បានអរគុណដល់រដ្ឋាភិបាលក្រុងប៉េកាំង ដែលតែងតែគាំទ្រ និងជ្រោមជ្រែងមីយ៉ាន់ម៉ាដោយមិនមានលក្ខខណ្ឌ និងជាពិសេសនោះ រក្សាបាននូវការគោរពអធិបតេយ្យភាពរវាងគ្នាទៅវិញទៅមក។
នាជំនួបក្នុងអំឡុងពេលលោកទីប្រឹក្សារដ្ឋ និងជារដ្ឋមន្ត្រីការបរទេសចិន វ៉ាង យី បំពេញទស្សនកិច្ចនៅមីយ៉ាន់ម៉ា នៅថ្ងៃទី៧ ខែធ្នូ លោកប្រធានាធិបតី Win Myint បានសម្តែងការដឹងគុណទៅកាន់ចិនសម្រាប់ការគាំទ្រអធិបតេយ្យ កិត្យានុភាព និងការអភិវឌ្ឍសេដ្ឋកិច្ច-សង្គមរយៈពេលវែងរបស់មីយ៉ាន់ម៉ា។ នេះបើយោងតាមការចុះផ្សាយរបស់ភ្នាក់ងារព័ត៌មានចិន Xinhua។
តាមប្រភពព័ត៌មានដដែល លោកប្រធានាធិបតី ក៏បានបង្ហាញពីការសង្ឃឹមដ៏មុតមាំថា ចិន នឹងនៅតែបន្តគាំទ្រមីយ៉ាន់ម៉ាក្នុងដំណើរឆ្ពោះទៅមុខ ក្នុងពេលដែលមីយ៉ាន់ម៉ាកំពុងតែស្ថិតក្នុងដំណាក់កាលផ្សះផ្សារជាតិ និងកសាងសន្តិភាព។ លោក រំពឹងថា ភាគីទាំងពីរ នឹងធ្វើឲ្យកាន់តែល្អប្រសើរលើទំនាក់ទំនងភាពជាដៃគូគ្រប់ជ្រុងជ្រោយរវាងប្រទេសទាំងពីរផងដែរ។
តបជាមួយនឹងការលើកឡើងរបស់ភាគីមីយ៉ាន់ម៉ា លោក វ៉ាង យី បានបញ្ជាក់គោលជំហរជាថ្មីរបស់ចិន ដោយមិនឲ្យមីយ៉ាន់ម៉ាព្រួយបារម្ភ ឬខកចិត្តឡើយ។ លោកទីប្រឹក្សារដ្ឋ បានឲ្យដឹងថា ចិន នឹងនៅតែបន្តគាំទ្រមីយ៉ាន់ម៉ាដោយឥតងាករេ ដើម្បីធ្វើយ៉ាងណាឲ្យមីយ៉ាន់ម៉ាបន្តការអភិវឌ្ឍស្របមាគ៌ា ឬលក្ខខណ្ឌជាតិរបស់ខ្លួន ក៏ដូចជាការការពារសិទ្ធិ និងអធិបតេយ្យភាពក្នុងឆាកអន្តរជាតិ។
បើតាមលោក វ៉ាង ចិន និងមីយ៉ាន់ម៉ា គឺជាអ្នកជិតខាងល្អនឹងគ្នា ដែលត្រូវតភ្ជាប់ដោយទន្លេ និងភ្នំ ដែលលក្ខខណ្ឌនេះ លោក បានហៅទំនាក់ទំនងទាំងពីរប្រៀបដូចជាបងប្អូន ឬសាច់ញាតិយ៉ាងដូច្នេះឯង។ ជាមួយគ្នានោះ លោក ក៏បានបង្ហើបពីផែនការបន្ទាប់ ដោយអះអាងថា ចិន បានត្រៀមខ្លួនរួចជាស្រេចក្នុងលើកកម្ពស់ទំនាក់ទំនងប្រទេសទាំងពីរក្នុងកម្រិតមួយថ្មីទៀតផង។
គួរជម្រាបផងដែរ ប៉ុន្មានឆ្នាំចុងក្រោយនេះ មីយ៉ាន់ម៉ា បានរងសម្ពាធខ្លាំងពីឆាកអន្តរជាតិ ជាពិសេសនោះពីបណ្តាប្រទេសលោកខាងលិច ដោយបានចោទមីយ៉ាន់ម៉ា ថាបានបំពានគោលការណ៍ពាក់ព័ន្ធនឹងបញ្ហាសិទ្ធិមនុស្ស។ ក្នុងកាលៈទេសៈនេះ ចិន រួមជាមួយនឹងបណ្តាសម្ព័ន្ធមិត្តរបស់ខ្លួនផ្សេងទៀត បានរក្សាជំហរគាំទ្រ និងការពារមីយ៉ាន់ម៉ា ទាំងក្នុងក្របខណ្ឌជាតិ តំបន់ និងអន្តរជាតិផងដែរ៕
© រក្សាសិទ្ធិដោយ thmeythmey.com