សហព័ន្ធស្រូវអង្ករស្នើធនាគារបញ្ចេញកម្ចីឲ្យបានច្រើន និងការប្រាក់សមរម្យដល់វិស័យកសិកម្ម

ជាតិ

សេដ្ឋកិច្ច

សហព័ន្ធស្រូវអង្ករស្នើធនាគារបញ្ចេញកម្ចីឲ្យបានច្រើន និងការប្រាក់សមរម្យដល់វិស័យកសិកម្ម

16, Dec 2019 , 8:59 pm

រូបភាព

ដោយ:

ភ្នំពេញ៖ សហព័ន្ធស្រូវអង្ករកម្ពុជា(CRF) បានស្នើឲ្យគ្រឹះស្ថានហិរញ្ញវត្ថុ ផ្ដល់លំហូរទុនឲ្យបានច្រើនជាងសព្វថ្ងៃ ជាមួយនឹងអត្រាការប្រាក់សមស្រប ដល់វិស័យកសិកម្មទាំងមូល។

លោក ចាន់ សុឃាំង អនុប្រធានសហព័ន្ធស្រូវអង្ករកម្ពុជា បានស្នើឲ្យគ្រឹះស្ថានធនាគារ និងមីក្រូហិរញ្ញវត្ថុ ចូលរួមឲ្យបានប្រសើរជាងសព្វថ្ងៃក្នុងការបញ្ចេញកម្ចីដល់វិស័យកសិកម្ម។ «យើងអំពាវឲ្យដៃគូហិរញ្ញវត្ថុទាំងអស់ ទាំងធនាគារពាណិជ្ជ មីក្រូ សូមពិចារបន្ធូរបន្ថយការប្រាក់ និងរកដំណោះស្រាយមួយដែលអាចឲ្យកសិករ និងវិស័យឯកជនទាំងអស់ក្នុងវិស័យកសិកម្មនេះ អាចទទួលបានប្រភពទុនសម្រាប់ពង្រីកមុខរបរអាជីវកម្មរបស់ខ្លួន និងមានថ្លៃដើមប្រកួតប្រជែងនឹងដៃគូប្រទេសជិតខាង»។ នេះជាប្រសាសន៍លោក ចាន់ សុឃាំង ដែលបានថ្លែងប្រាប់អ្នកកាសែតនាឱកាសដែលលោកចូលរួមជាវាគ្មិនក្នុងសន្និសីទម៉ាក្រូសេដ្ឋកិច្ចប្រចាំឆ្នាំលើកទី៦របស់ធនាគារជាតិនៃកម្ពុជាស្ដីពី វិស័យកសិកម្មក្នុងបរិបទនៃការផ្លាស់ប្ដូរយ៉ាងឆាប់រហ័សនៃរចនាសម្ព័ន្ធសេដ្ឋកិច្ច និងភាពមិនប្រកាដប្រជានៃពាណិជ្ជកម្មពិភពលោក នៅថ្ងៃទី១៦ខែវិច្ឆិកា។

បើតាមលោក ចាន់ សុឃាំង វិស័យកសិកម្មបានរួមចំណែកក្នុងផលិតផលក្នុងស្រុកសរុប (GDP) ពី ២៥ទៅ៣០ភាគរយ តែឥណទានចូលទៅក្នុងវិស័យនេះបានតែ១០ភាគរយនៃទំហំឥណទានទូទៅប៉ុណ្ណោះ។ លោកបន្ថែមថា អត្រាការប្រាក់សម្រាប់ប្រជាកសិករ និងពាណិជ្ជករខ្នាតតូច មានតម្លៃខ្ពស់ណាស់ ដែលមានពី១២ទៅ១៨ភាគរយក្នុងមួយឆ្នាំ។ ដោយឡែកពាណិជ្ជករក្នុងវិស័យកសិកម្មធំៗ ទទួលបានប្រាក់កម្ចីក្នុងអត្រាការប្រាក់ពី ៦,៥ភាគរយ ទៅ៨,៥ភាគរយ។

អ្នកនៅក្នុងវិស័យហិរញ្ញវត្ថុមួយចំនួនបានចាត់ទុកវិស័យកសិកម្មមានហានិភ័យខ្ពស់ សម្រាប់ការបញ្ចេញកម្ចីរបស់ខ្លួន។ ត្រង់ចំណុចនេះអាចជាបញ្ហាដែលគ្រឹះស្ថានហិរញ្ញវត្ថុខ្លះរារែកក្នុងការបញ្ចេញកម្ចីដល់វិស័យកសិកម្ម ឬផ្ដល់កម្ចីក្នុងអត្រាការប្រាក់ខ្ពស់។

តែលោក ចាន់ សុឃាំង អះអាងថា ការចាត់ទុកកសិកម្មថាមានហានិភ័យខ្ពស់ គឺជាផ្នត់គំនិតចាស់ ដែលបច្ចុប្បន្នវិស័យនេះគួរទទួលបានទុនសមស្រប។ «វាជាបរិបទមួយដែលកើតឡើងពីមុនមក ដែលវិស័យកសិកម្មក្នុងប្រទេសកម្ពុជាមានហានិភ័យខ្ពស់ ទៅតាមកត្តាអាកាសធាតុ ទីផ្សារ និងគុណភាពផលិតផល ប៉ុន្តែជាក់ស្ដែងយើងមើលត្រឡប់មកវិញអំពីការគ្រប់គ្រងហានិភ័យក្នុងការផ្ដល់កម្ចីដល់កសិករខ្នាតតូចៗនេះគឺថា ការបាត់បង់ (កម្ចីសងមិនទាន់ពេល) មានអត្រាទាបមែនទែនប្រហែល៣ទៅ៥ភាគរយ»។ នេះជាការគូសបញ្ជាក់របសលោក សុឃាំង។ លោកបន្តដូច្នេះថា៖ដោយឡែកយើងនៅតែបន្តបរិបទហ្នឹង ដោយនិយាយថាវិស័យកសិកម្មនៅកម្ពុជា ជាវិស័យមួយដែលមានហានិភ័យខ្ពស់ ហើយថ្ងៃនេះខ្ញុំបានសង្កត់ធ្ងន់ត្រង់ចំណុចនេះដើម្បីផ្លាស់ប្ដូរការមើលឃើញថាវិស័យនេះជាវិស័យមានសុវត្ថិភាពក្នុងការផ្ដល់កម្ចី»។

អនុប្រធាន CRF រូបនេះ ឲ្យដឹងថា អំឡុងពេលដែលសហភាពអឺរ៉ុបដាក់ពន្ធលើអង្ករកម្ពុជាចាប់ផ្ដើមពីដើមឆ្នាំ២០១៩ ធនាគារពាណិជ្ជមួយចំនួនបានកាត់បន្ថយទំហំនៃការបញ្ចេញសរុបរបស់ខ្លួនប្រមាណ ៤០ភាគរយ ដែលជាផ្នែកមួយប៉ះពាល់ដល់ប្រទុនក្នុងវិស័យស្រូវអង្ករ។ ភ្ជាប់ជាមួយគ្នានេះ លោក សុឃាំង លើកឡើងថា វិស័យស្រូវអង្ករត្រូវការទុនបន្ថែមប្រមាណ២០០លានដុល្លារសម្រាប់ការបង្វិលទិញស្រូវស្តុកនាំចេញ ជាពិសេសដើម្បីសម្រេចគោលដៅនាំចេញអង្ករ១លានតោននាពេលខាងមុខ។ ទន្ទឹមនឹងនេះ តំណាងសហព័ន្ធស្រូវអង្កររូបនេះ បានស្នើឲ្យធនាគារពាណិជ្ជពិចារណាផ្ដល់កម្ចីដល់រោងម៉ាស៊ីនកិនស្រូវ ដោយយកស្តុកស្រូវជាវត្ថុធានាបំណុល ពោលគឺបន្ថែមជម្រើសក្រៅពីការដាក់ធានាជាអចលនទ្រព្យ។

សេដ្ឋវិទូជាន់ខ្ពស់ធនាគារពិភពលោក លោក លី សូដេត ដែលជាវាគ្មិនក្នុងសន្និសីទខាងលើនេះដែរ បានផ្ដល់អនុសាសន៍ថា ដើម្បីបន្ទាបការប្រាក់ចំពោះកម្ចីដែលផ្ដល់ឲ្យវិស័យកសិកម្ម ស្ថាប័នពាក់ព័ន្ធត្រូវកាត់បន្ថយហានិភ័យរបស់វិស័យមួយនេះ។ លោក សូដេត បានថ្លែងដូច្នេះថា៖«កាលណាវិស័យនោះមានហានិភ័យខ្ពស់ គឺគាត់យកអត្រាការប្រាក់ខ្ពស់ ហើយបើយើង(រដ្ឋាភិបាល)ចង់បង្ខំឲ្យទីផ្សារយកការប្រាក់ទាបគឺយើងលូកដៃចូលទីផ្សារ ដែលសេដ្ឋកិច្ចទីផ្សារសេរីគឺមិនល្អ។ អ៊ីចឹងយើងត្រូវសិក្សាថាហេតុអ្វីកសិកម្មរបស់យើងមានហានិភ័យខ្ពស់? គឺដូចនិយាយពីខាងដើម គឺកសិកម្មយើងនៅទន់ខ្សោយ ចង្វាក់ផ្គត់ផ្គង់របស់យើងអត់មានទេ គឺធ្វើដាច់ដោយដុំ»។ លោកបន្ថែមបែបនេះទៀតថា៖«ហើយម្យ៉ាងទៀតប្រទេសយើងគឺដុល្លាររូបនីយកម្ម ដែលយើងអត់មានគោលនយោបាយរូបិយវត្ថុក្នុងដៃរបស់យើងទេ ដែលយើងចង់ដំឡើងឬកាត់បន្ថយការប្រាក់ គឺមានការលំបាក»។

គួរបញ្ជាក់ថា រដ្ឋាភិបាល ក្នុងពេលថ្មីៗនេះ បានទម្លាក់ទុន៥០លានដុល្លារបន្ថែមទៀត សម្រាប់ផ្ដល់កម្ចីដល់រោងម៉ាស៊ីនកិនស្រូវ តាមរយៈធនាគារអភិវឌ្ឍន៍ជនបទ បន្ទាប់ពីមានការលើកឡើងរបស់អ្នកក្នុងវិស័យនេះ ដែលថាខ្វះខាតទុន១០០ទៅ២០០លានដុល្លារសម្រាប់រដូវប្រមូលផលស្រូវខែធ្នូនិងខែមករា៕